Jesu Wakasanina Bantu Biingi

Kayitanachitwa Pasika, mumunyaka wa32 C.E., baapostolo bakazwa kukukambawuka. Bakali bakatala, nkinkaako Jesu wakati banjile mubwaato baye kuBbetisayida kuti bakalyookezye. Pesi nibakasika afwiifwi akunkomwe, Jesu wakabona bantu biingi bakali kuzabutobela. Jesu wakabatambula kabotu bantu nikuba kuti wakali kuyanda kuba abaapostolo luzutu. Wakaponia bakali kuchiswa mpawo wakabayiisya. Buzuba boonse wakabayiisya atala aBwaami bwaLeza. Nilyakaba goko, baapostolo bakwe bakamuzida akumubuzya kuti: ‘Bantu baba anzala. Babuzye beende bakayanduule chakulya.’

Jesu wakati: ‘Tabeelede kwiinka pe, amubasombe zyakulya nywebo.’ Baapostolo bakamubuzya kuti: ‘Uyanda kuti tukabawulile chinkwa na?’ Umwi mwaapostolo utegwa Filipi wakati: ‘Nikuba kuti tuli amali nyingi, tatukonzyi pe kuula chakulya chabantu boonse aaba.’

Jesu wakabuzya kuti: ‘Chakulya nchituli acho nchiingi biyeni?’ Andreya wakati: ‘Nchiche loko. Tuli azinkwa zili musanu atuswi tubili.’ Mpawo Jesu wakati: ‘Amundipe zinkwa eezyo atuswi.’ Wakabuzya bantu kuti bakkale amasokwe kabali muzibunga zyabantu bali 50 azyabali 100. Jesu wakabweza zinkwa atuswi mpawo wakalanga kujulu wakomba. Mpawo wakapa baapostolo chakulya kuchitila kuti bape bantu. Baalumi bakali 5 000, bamakayintu abana boonse bakalya akukkuta. Kuzwa waawo, baapostolo bakabwezelela zyakasyaala alimwi taakwe zyakasowegwa pe. Bakazuzya zisewe zili 12! Taagambyi na malele aaya?

Bantu bakabotelwa zyakuti bakayanda kuti Jesu abe mwaami wabo. Pesi Jesu wakalizi kuti teechakalinasika pe chiindi chakuti Jehova amubikke kuba mwaami. Kuzwa waawo, wakabuzya bantu kuti beende, mpawo wakabuzya baapostolo bakwe kuti baye kubbazu limwi kuLwizi lwakuGalilaya. Bakanjila mubwaato, mpawo Jesu wakaya kuchilundu alikke. Nkamboonzi? Nkaambo wakali kuyanda kuyookomba kuli Wisi. Nikuba kuti wakali azyiingi zyakuchita, pesi taakali kuleka pe kukomba.