Jesu Wakeenda Atala Amaanzi

Jesu wakachita malele asiyene-siyene mbuli kuponia bachiswa, kubusya bakafwide akuumuzya guwo pati. Naakamana kukomba kuchilundu, Jesu wakabona guwo pati lyakali muLwizi lwakuGalilaya. Baapostolo bakwe bakali kweenzya bwaato kakuli guwo pati. Jesu wakayinka kulimbabo kali kweenda atala amaanzi. Baapostolo bakayoowa nibakabona muntu wakali kweenda atala amaanzi. Pesi Jesu wakababuzya kuti: ‘Ndime. Mutayowi pe.’

Petro wakati: ‘Mwaami, ikuti nduwe, ndibuzye ndisike kulinduwe.’ Jesu wakati: ‘Kweza.’ Petro wakazwa mubwaato kakuli guwo, mpawo wakasaanguna kweenda atala amaanzi kaya kuli Jesu. Pesi naakasweena afwiifwi aJesu, Petro wakalanga guwo, mpawo wakasaanguna kuyoowa. Petro wakoompolola kati: ‘Mwaami, kondivuna.’ Jesu wakamujata kuboko mpawo wakati: ‘Nkamboonzi nwayoowa? Tukwe lusyomo na?’

Jesu aPetro bakanjila mubwaato, mpawo guwo lyakamana. Ubonaanga baapostolo bakamvwa biyeni? Bakati: “Ncobeni nduwe mwana a-Leza.”

Aaka teekakali kakusaanguna Jesu kawumuzya guwo. Chimwi chiindi, Jesu naakali abaapostolo bakwe mubwaato, wakalala kusule mubwaato. Mpawo kwakaba guwo pati naakali koona. Bwaato bwakazula maanzi nikwakaba mayuwe. Baapostolo bakamusinsimuna, akoompolola kabati: ‘Muyiisi, twaamba kufwa! Tugwasye!’ Jesu wakabuka mpawo wakawumuzya guwo kati: ‘Wuumuna!’ Muchiindi eecho, guwo lyakali mulwizi lyakamana. Jesu wakabuzya baapostolo bakwe kuti: ‘Nkamboonzi nimutakwe lusyomo?’ Bakabuzyania kabati: ‘Niliba guwo, niluba lwizi, zyoonse zilamumvwa.’ Baapostolo bakayiya kuti kusyoma Jesu amoyo woonse kuyoopa kuti batayoowi kufumbwa chintu.