Chiyubunuzyo chaJohane

Mwaapostolo Johane naakasungidwe kukasuwa kategwa Patimosi, Jesu wakamutondeezya zilengaano zili 16 zili atala azintu ziyoochitika kunembo. Zilengaano eezi zyakatondeezya mbuliyoosalazigwa zina lyaJehova, kuboola kwaBwaami bwakwe akuti kuyanda kwakwe kuyoochitwa munyika mbuli kujulu.

Muchilengaano chimwi, Johane wakabona Jehova kakkede achuuno chakwe chabulemu kujulu kazyungulukidwe abaalu bali 24 bazweete zisamo zituba amisini yangolida kumitwe. Kuchuuno chabwaami kwakaboneka tulabi akudilima kupati. Baalu aaba bali 24 bakafugamina Jehova akumukomba. Muchilengaano chimwi, Johane wakabona bantu biingi bakali kukomba Jehova kabazwa kuzisi, kumisyobo akumilaka isiyene-siyene. Jesu, Mwanaambelele, wakali kubeembela akubatola kumaanzi aapa buumi. Alubo muchilengaano chimwi, Jesu wakasaanguna kweendelezya kali Mwaami kujulu abaalu bali 24. Muchilengaano chakatobela, Johane wakabona Jesu kalikulwana asimwaaba Saatani amadimoni aakwe. Jesu wakabawaalila ansi.

Johane wakabona chilengaano chibotu chaMwanaambele abali 144 000 bakiimvwi aChilundu chaZiyoni. Alubo wakabona mungelo wakali kuuluka munyika kabuzya bantu kuti bayoowe Leza akumupa bulemu.

Muchilengaano chakatobela, kwakaba nkondo yaArmagedoni. Munkondo eeyo, Jesu abasilumamba bakwe bakazunda nyika yaSaatani mbi. Muchilengaano chamamanino, Johane wakabona kuti kujulu amunyika kwakali luumuno akujatana. Saatani alunyungu lwakwe bakanyonyoonwa. Bantu boonse kujulu aanyika bakasalazya zina lyaJehova akukomba nguwe alikke.