Bwaami bwaLeza Buzoochitaanzi?

ZYAKAZUZIKIZIGWA AABWAAMI BWALEZA

Muchiiyo chayinda, twabona zitondeezyo Jesu nzyaakaamba. Zitondeezyo eezi zibikka aantanganana kuti Bwaami bwaLeza bwakabikkwa kujulu alubo Jesu Kristu Mwaami waBwaami oobu.

Bbayibbele litondeezya kuti chiindi Jesu naakapegwa nguzu zyakweendelezya wakaanda Saatani amadimoni aakwe kujulu. Nzizyo zyakapa kuti zintu zyiindilile kubija aanyika kuzwa mu1914 akaambo kakuti Saatani wakali wawaalwa aanyika.—Ciyubunuzyo 12:7, 9.

Nikuba kuti kuli zyiimo ziyumu aansi aano, Jesu, Mwaami waBwaami bwaLeza, ulikuchita zintu zikonzya kugwasya bantu bali munyika. Makani mabotu alikukambawukwa munyika yoonse alubo bantu balikubelesya malayilile aamuBbayibbele mubuumi bwako. (Isaya 2:2-4) Mamiliyoni aabantu bakayiya mbubakonzya kusala milimu iilikabotu, kujatana mumpuli akutayanda kuti babikke bunoti mubusena bwakusaanguna mubuumi bwabo. Bantu aaba balikutondeezya kuti bayanda kuyooyendelezegwa aaBwaami bwaLeza.

ZIYOOZUZIKIZIGWA AABWAAMI BWALEZA

Nikuba kuti Jesu ulikweendelezya kujulu pesi mfulumende zyabantu zilikweendelezya aanyika. Nikuba boobo, Leza wakabuzya Jesu kuti: “Nkooko koyaabuzunda akati kabasinkondonyoko.” (Intembauzyo 110:2) Eezi ziyoochitika chiindi Jesu naazoobeteka akunyonyoona basikupapila boonse akufutula aabo bayanda kweendelezegwa aaBwaami bwaLeza.

Aachiindi eecho, Bwaami bwaLeza buyoobweza ntaamu kuti:

• Bukanyonyoone bukombi bwakubeja. Zikombelo ziyiisya makani aakubeja aali atala aJehova ziyoonyonyoonwa. Bbayibbele lyaamba chikombelo chakubeja kuti ndihuule. Chikombelo chakubeja chiyoonyonyoonwa bantu kabatalangilide pe.—Ciyubunuzyo 17:15, 16.

• Buyoogwisya mfulumende zyabantu. Bwaami bwaLeza buyoobweza ntaamu kugwisya mfulumende zyabantu.—Ciyubunuzyo 19:15, 17, 18.

• Buyoogwisya bantu babi. Niinzi zitakachitike kubantu batayandi kulibombya kuBwaami bwaLeza? “Babi bayoonyonyoonwa munyika.”—Tusimpi 2:22.

• Buyoogwisya Saatani amadimoni aakwe. Saatani amadimoni aakwe bayoowalilwa mumulindi uutagoli kuchitila kuti “ateeni limbi masi.”—Ciyubunuzyo 20:3.

Niinzi zitakachitike kuli aabo bayanda kweendelezegwa aaBwaami bwaLeza?

ZILONGEZYO NZIBAYOOJANA BATAKEENDELEZEGWE AABWAAMI BWALEZA

Jesu aakweendelezya muBwaami bwaLeza, uyoochita zintu nzibakakachilwa kuchita baami boonse. Uyooyendelezya abali 144 000 bakasalwa munyika. (Ciyubunuzyo 5:9, 10; 14:1, 3) Alubo Jesu uyooba aachoonzyo chakuti kuyanda kwaLeza kwachitwa aanyika. Bwaami bwaLeza buyoobachitilaanzi bantu batanooli aanyika?

• Buyoogwisya malwazi alufu. “Taakwe muntu naba omwe uukkala munyika uuyakwaamba kuti: ‘Ndaciswa’” alubo “lufwu talukabi limbi.”—Isaya 33:24; Ciyubunuzyo 21:4.

• Buyooyeta luumuno lwachoonzyo akulyiiba. “Bayookkala umwi aumwi munsi lyamusaansa wakwe amunsi lyamukuyu wakwe, alimwi takukabi muntu naba omwe uuyoobayoosya.”—Mika 4:4.

• Tatukabelekeli mahhala pe. “Basale bangu bayakwiikkomanina kapati milimo yamaanza aabo. Tabakabelekeli maliminya pe.”—Isaya 65:22, 23.

• Buyoopa kuti munyika mukabe chakulya. “Inkanda alimwi anyika iinyina maanzi ziyoosekelela, acalo cibanda camucimpayuma ciyookondwa akufwulula mbuli maluba-luba aasaferone.”—Isaya 35:1.

• Buyooyiisya bantu zintu nzibeelede kuchita kuti bakajane buumi butamani. “Eeci caamba buumi butamani, ikuti bakuzyiba yebo O Leza mwini-mwini ooli olikke, ayooyo ngookatuma, Jesu Kristo.”—Johane 17:3.

Leza uyanda kuti ukajane zilongezyo eezi. (Isaya 48:18) Chiiyo chitobela chiyookugwasya kuti uzibe nzweelede kuchita kuti ukajane buumi bulikabotu kunembo.