Nziizili Zintu Leza Nzyayoochita?

Kuti kuli mubuyumu-yumu nga ulangilila kuti mweenzinyokwe akugwasye. Bamwi bantu baamba kuti Leza takwe ndaba ambabo nkaambo babonaanga tabagwasyi chiindi nibali mubuyumu-yumu. Leza wakatuchitila zintu zyiingi zitugwasya alubo uyootuchitila zintu zibotu ziyoopa kuti mapenzi ngituswaana akamane. Nziizili zintu Leza nzyayoochita?

UYOOMANINSYA BUBI BOONSE

Leza uyoomaninsya bubi boonse kwiinda mukugwisya muntu ulikubweeta. Bbayibbele litondeezya muntu ulikweeta bubi, litii: “Nyika yoonse ili mumaanza aamubi.” (1 Johane 5:19, NW) Ooyu ‘mubi’ nguSaatani Dyabbulosi alubo Jesu wakamwaamba kuti “mwami wenyika ino.” (Johane 12:31) Lweeno lwaSaatani luli kupa kuti munyika kuvule mapenzi. Nziizili zintu Leza nzyayoochita?

Lino-lino, Jehova Leza uyoobelesya Mwanaakwe Jesu Kristu kuti “akamwaye oyo uujisi nguzu zyalufu, nkokuti Saatani.” (BaHebrayo 2:14; 1 Johane 3:8) Bbayibbele litondeezya kuti Dyabbulosi ulizi kuti “ciindi ncajisi nciniini buyo” kuti akanyonyoonwe. (Ciyubunuzyo 12:12) Leza uyoonyonyoona bantu boonse bapa kuti kube mapenzi.—Intembauzyo 37:9; Tusimpi 2:22.

UYOOPA KUTI NYIKA IBE PARADAYIZI

Aakugwisya bubi boonse buli munyika, Mulengi wesu uyoozuzikizya makanze aakwe ali atala abantu anyika. Niinzi nzitulangilila?

Luumuno lutamani alukwabililo. “Pele babombemyoyo bayoovuba nyika, bayookondwa muluumuno lunji.”—Intembauzyo 37:11.

Chakulya chiingi chiyaka mubili. “Maila avule ansi, atala lyazilundu.”—Intembauzyo 72:16.

Maanda amulimu uubotezya. “Lino bayooyaka maanda akukala mulingao, bayoobyala myuunda yamisaansa akulya micelo yayo. . . . Abantu mbensalide bayoongozya milimo yamaanza aabo.”—Isaya 65:21, 22.

Ulayanda na kuyoobona zintu eezi kazilikuzuzikizigwa? Lino-lino zintu eezi ziyoochitika munyika kukabe kutamani.

UYOOMANINSYA MALWAZI ALUFU

Mazubaano, bantu boonse balachiswa akufwa pesi kuchiindi chili kunembo zintu eezi ziyooba lwaano. Lino-lino Leza uyoobelesya chinunuzyo chaJesu kuti “umwi umwi uumusyoma atafwidilili, pele abe abuumi ubutamani.” (Johane 3:16) Ziyoochitika biyeni?

Malwazi ayoomana. “Lino takukooyooba naba omwe akati kabantu banyika uuamba kuti, Ndaciswa. Bantu boonse bakede mulinjiyo bayoolekelelwa milandu yabo.”—Isaya 33:24.

Lufu luyoomana. “Lufu walumenenena mane kukabe kutamani. Mwami Jehova uyoosindula misozi kumasyu oonse.”—Isaya 25:8.

Bantu bayoopona kukabe kutamani. “Caabilo ca-Leza mbuumi butamani bwamuli-Kristo Jesu Mwami wesu.”—BaRoma 6:23.

Bafwide bayoobusigwa. “Kulaba kubuka kwabafu, akwabaluleme akwabataluleme.” (Incito 24:15) Bantu batakabusigwe bayoogwasigwa achipo chachinunuzyo chakazwa kuli Leza.

Leza uyoozichita biyeni eezi?

UYOOBIKKA MFULUMENDE MBOTU

Leza uyoobelesya mfulumende yakujulu itakeendelezegwe aaJesu Kristu kuti akazuzikizye makanze aakwe aali atala abantu anyika. (Intembauzyo 110:1, 2) Jesu wakayiisya batobeli bakwe kuti bakombele mfulumende naakuti bwaami oobu, naakati: “Taateesu ooli kujulu, . . . abuze Bwami bwako.”—Matayo 6:9, 10.

Bwaami bwaLeza buyooyendelezya nyika yoonse alubo buyoogwisya zintu zyoonse zyeeta mapenzi aali munyika. Bwaami oobu nimfulumende yiinda zyoonse. Eezi nzizyo zyakapa kuti Jesu abeleke changuzu mukukambawuka “makani mabotu aa-Bwami” chiindi naakachili aanyika alubo wakabuzya basikwiiya bakwe kuti bachite mbuuli mbaakachita.—Matayo 4:23; 24:14.

Jehova Leza wakasyomezya kutuchitila zintu eezi zilikabotu nkaambo ulatuyanda. Kuziba zintu eezi takupi kuti uyande kumuziba na akuti uyande kuba mweenzinyina? Kuziba Leza akuba mweenzinyina kuyookugwasya biyeni? Chiiyo chitobela chiyoosandula mubuzyo ooyu.