Kuba Muntu Uulikabotu Kupa Kuti Uzoopone Buumi Bulikabotu Na Kunembo?
Kuzwa chiindi, bantu bakali kubonaanga kuti muntu waba kabotu akuti walijata munzila iilikabotu ulakonzya kuzoopona buumi bulikabotu kunembo. Muchikozyano, bantu biingi bakuAsia, bakazuminana azyakaambwa aawumwi syaabusongo uutegwa Confucius wakati: “Zintu nzutayandi kuchitilwa, toyelede kuzichitila bamwi pe.”a
NZIBASALA KUCHITA BANTU BIINGI
Biingi bachisyoma kuti, kubaabuntu bulikabotu nkuko kupa kuti bazoopone buumi bulikabotu kunembo. Baleezya kulemeka bamwi, kubaabuntu bulikabotu, kukkazyania kabotu abamwi akuba aamoyo uutabapi mulandu. Linh uukkala kuVietnam, wakati, “Ndakali kusyoma kuti kusyomeka akubajata kabotu bamwi kupa kuti ndilongezegwe.”
Bamwi kumacheechi aabo bayiisigwa kuti kabachitila bamwi zintu zilikabotu. Umwi mwaalumi uutegwa Hsu-Yun uukkala kuTaiwan wakati, “Ndakayiisigwa kuti zintu nzyachita muntu nzizyo zipa kuti akajane buumi butamani naakuti akatentwe mumulilo.”
NZIIZILI MPINDU ZILIKUBA?
Nisimpe, kuti katuchitila bamwi zintu zibotu, tulakonzya kubotelwa mubuumi. Nikuba boobo, bantu biingi beezya kuchitila bamwi zintu zilikabotu pesi kumamanino ngabajana zintu nzibatayeeyeli pe. Umwi mwanakazi uutegwa Shiu Ping uuzwa kuHong Kong wakaamba kuti, “Ndakabona kuti bantu beezya kuchitila bamwi zintu zibotu, tabachitilwi zintu zibotu pe. Ndakali kweezya kuchitila bamumpuli yangu zintu zilikabotu, pesi zyalukwatano zyakakaka, mulumaangu wakandichija mpawo wakandisiya aamwana.”
Biingi bakabona kuti, cheechi tayichinchi buntu bwamuntu pe. Etsuko uukkala kuJapan wakati, “Ndakanjila chimwi chikombelo, mpawo ndakaba mupati-pati wabachikula. Ndakali kugamba kubona kuti bantu bamucheechi eeyi teebakali kulijata kabotu pe, bakali kulwanina zyuuno alubo teebakali kwiibelesya kabotu pe mali yacheechi.”
“Ndakali kweezya kuchitila bamumpuli yangu zintu zilikabotu, pesi zyalukwatano zyakakaka, mulumaangu wakandichija mpawo wakandisiya aamwana.”—SHIU PING, HONG KONG
Bamwi bakamana manguzu nibakabona kuti taakwe wakali kubabona pe kuti balikubeleka changuzu kuti bachitile bamwi zintu zibotu. Mbubo mbaakalimvwa Van wakuVietnam. Wakati, “Buzuba abuzuba ndakali kuula mafulawuzi, chakulya akuyootentelezya kumizimu kandiyeeya kuti ilandicheba akundilongezya. Nikuba kuti ndakali kweezya kuchita zintu zibotu mulumaangu wakajatwa bulwazi buchisa loko. Alubo mwanaangu wakali kuyiila kunze aanyika wakafwa kali muniini loko.”
Kuti kakuli kuba muntu uulikabotu teenkuko pe kupa kuti uzoopone buumi bubotezya kunembo, animpo niinzi loko chikonzya kupa kuti tuzoopone buumi bulikabotu? Kuti tukonzye kusandula mubuzyo ooyu, tweelede kujana chintu chituzulwida, chili aamakani aachoonzyo aakonzya kusandula mibuzyo yesu akututondeezya mbutukonzya kujana buumi bulikabotu kunembo. Niinzi chikonzya kutuzulwida?
a Kuti kuyanda kumvwa zyiingi zyakwaambwa aamwaalumi ooyo, langa limwi bbuku litegwa Mankind’s Search for God chaandaano 7 palagilafu 31-35. Bbuku eeli lyakapupuluwa aaBakamboni baJehova alubo lilajanika aawebbusayiti yesu iitegwa www.jw.org.