Bantu Boonse Bayanda Kupona Buumi Bulikabotu
Uyanda kuti buumi bwako buzoobe biyeni kunembo? Mbuli bantu boonse, zilaantanganana kuti uyanda kupona buumi bulikabotu abamumpuli yako, kamubotelwa, kamutachiswi pe, kamuli aaluumuno alubo kamukkede kabotu.
Pesi bantu biingi, babonaanga tazichiti pe kuti bazoopone buumi bulikabotu mbubalombozya. Nga babona mapenzi aasika chachibukila mbuta katulyiibide, mbuli bulwazi bwakkorona, bwapa kuti bantu babule milimu alubo bulikujaya bantu biingi loko. Zintu zyoonse eezi zibi zilikuchitika, nga zyapa kuti bantu babonaanga tabazooponi buumi bubotezya pe.
Bantu balikweezya anzila zyoonse, kuti bayanduule zintu zikonzya kupa kuti bazoopone buumi bulikabotu kunembo. Bamwi babonaanga kusyoma masalamusi kulakonzya kubagwasya kuti bazoopone buumi bulikabotu kunembo. Bantu biingi balikuyanduula lwiiyo lwaajulu abunoti kababonaanga zintu eezi, zizoopa kuti bazoopone buumi mbubayanda. Alubo bamwi babonaanga kuba muntu uulikabotu nkuko kukonzya kubagwasya kuti bapone buumi bulikabotu.
Zintu zyaambwa aajulu aawa, nzizyo zipa kuti muntu azoopone buumi mbwayanda na? Kuti uzibe nsandulo yamubuzyo ooyu, weelede kuziba nsandulo zyamibuzyo iitobela:
Mpaali aayeeme buumi bwako bwajuunza?
Kuba aalwiiyo lwaajulu amali kupa kuti muntu apone buumi bulikabotu na?
Kuba muntu uulikabotu kupa kuti uzoopone buumi bulikabotu na?
Niinzi chikonzya kukugwasya kuti uzoopone buumi mbulombozya?
Magazini eeyi ilakugwasya kuti ujane nsandulo zyamibuzyo eeyi.