Takwe Chintu Chiyookachizya Muntu Uuyanda Jehova Kuti Abe Mukombi Wakwe

1-2. Limwi bbuku lyakatyeni alubo tulalanga-langaanzi muchiiyo eechi?

MAZUBAANO mamiliyoni aabantu baamba kuti basyoma muli Jesu pesi tabazitobeli pe zintu nzyaakayiisya. (2 Tim. 4:3, 4) Limwi bbuku lyakaamba kuti: “Kaansinga kuli umwi muntu uli mbuli Jesu mazubaano, waambuula zintu nzyaakali kwaambuula Jesu . . . , twalikunomukaka na mbuli mbubakamukaka Jesu minyaka iili 2 000 yayinda? . . . Choonzyo nchakuti twalikunomukaka.”

² Bantu biingi bakapona muchiindi chaJesu bakali kumumvwa kayiisya alubo bakamubona kachita zigambyo pesi taakwe nibakasyoma mulinguwe pe. Nkamboonzi? Muchiiyo chayinda, twakabona zintu zili 4 zyakapa kuti bantu bamukake Jesu. Lino atulange-lange zimwi zili 4. Alubo tuzoolanga-langa kuti nkamboonzi bantu biingi mazubaano nibakaka kuswiilila batobeli baJesu akuti nga tulachita biyeni kuti tutazumizyi kufumbwa chintu kuti chitukachizye kukomba Jehova.

(1) JESU TAAKALI KUSALUULA PE

3. Niinzi nchaakachita Jesu chakapa kuti bamwi bamukake?

³ Jesu naakali aanyika wakali kuliswaanizya aabantu basiyene-siyene. Nikuba kuti Jesu wakali kulya aamwi abantu banotede abakali aazyuuno pesi chiindi chiingi wakali kuyandisya kubaamwi abantu bafwaba abalangilwaansi. Alubo wakali kubafwida luzyalo bantu bakali kwaambwa kuti ‘mbasizibi.’ Bamwi zyakababbowa nzyaakachita Jesu. Bakabuzya basikwiiya bakwe kuti: “lno nkaambo nzi ncomulya akunywa antoomwe abasimutelo alimwi abasizibi?” Mpawo Jesu wakabasandula kuti: “Aabo bataciswi tabayandiki musilisi, pele aabo baciswa mbabayandika musilisi. Ndakaboolela kwiita basizibi kuti beempwe ikutali bantu baluleme.”—Lk. 5:29-32.

4. Kweendelana azyakaambwa aamupolofita lsaya, niinzi nzibakeelede kulangilila maJuda atala aMesiya?

⁴ Nzilyaamba Bbayibbele. Mesiya kaatanasika mupolofita lsaya wakali waamba kale kuti bantu biingi bakali kuyoomukaka. Wakaamba kuti: “Wakali kunyansyigwa akutantamukwa abantu . . . Cakali mbuli kuti wakatusisa busyu bwakwe. Muntu ooyu wakali kunyansyigwa, alimwi twakali kumubona kuti unyina mpindu.” (Is. 53:3) MaJuda bakeelede kulangilila kuti Jesu wakali kuyookakwa nkaambo mupolofita lsaya wakaambide kale kuti Mesiya wakali kuyookakwa “abantu.”

5. Bantu biingi mazubaano bababona biyeni batobeli baJesu?

⁵ Maboneno ngibalaawo bantu mazubaano. Bapati bazikombelo bayanda bantu bali aampuwo, banotede ababonwa kuti mbasongo. Balabazumizya bantu aabo muzikombelo zyabo nikuba kuti tabaponi kweendelana amilawu yaJehova pe. Bakombi baJehova baswiilila milawu yakwe pesi bapati bazikombelo babalangilaansi akaambo kakuti tabakwe mpuwo pe munyika. Mbuli mbakaamba Pawulu, Leza wakasala bantu ‘banyansigwa’ naakuti balangilwaansi kuti babe bakombi bakwe. (1 Kor. 1:26-29) Jehova ubabona kabayandikana loko bakombi bakwe.

6. Kweendelana alugwalo lwa Matayo 11:25, 26, niinzi nzyaakaamba Jesu alubo kujana twachitobelezya biyeni chikozyano chakwe?

⁶ Zikonzya kutugwasya kuti tube aalusyomo. (Bala Matayo 11:25, 26.) Utabi aamaboneno ngibalaawo bantu bali munyika atala abakombi baLeza. Weelede kuziba kuti Jehova ubelesya bantu balibombya kuti bachite kuyanda kwakwe. (Int. 138:6) Alubo yeeya milimu Jehova njaakachita kabelesya bantu baambwa aabantu bali munyika kuti tabakwe busongo akuti tabayiide pe.

(2) JESU WAKAYUBUNUNA NJIISYO ZYAKUBEJA

7. Nkamboonzi Jesu naakaamba kuti baFarisi mbaasikuupawupa aameso alubo nzyaakaamba zyakabajata biyeni?

⁷ Jesu wakatondeezya chibindi kwiinda mukwaamba kuti bapati bazikombelo bakali kuyiisya bantu ziyanza ziteendelani aaMagwalo. Muchikozyano, Jesu wakaamba baFarisi kuti mbaasikuupawupa aameso nkaambo bakali kubikkila maanu kumakani aakusamba kumaboko kutali kuti balanganie bazyali babo. (Mt. 15:1-11) Kweelede kuti basikwiiya baJesu bakagamba anzyaakaamba. Mpawo bakamubuzya kuti: “Sena ulizyi kuti ba Farisi bacimwa nobamvwa nzyowaamba?” Jesu wakabasandula kuti: “Cisyango cili coonse ncaatakasyanga Taata wakujulu ciyoozyulwa. Amubaleke buyo. Mbasololi boofwu. Ikuti moofwu keenzya moofwunyina, boonse bobilo bayoowida mumulindi.” (Mt. 15:12-14) Nikuba kuti bapati bazikombelo bakanyema pesi Jesu taakaleka pe kwaamba kasimpe.

8. Jesu wakatondeezya biyeni kuti teezyoonse pe zikombelo zitambulika kuli Leza?

⁸ Jesu wakayubununa njiisyo zyakubeja. Wakatondeezya kuti teezikombelo zyoonse pe zitambulika kuli Leza. Wakazitondeezya biyeni? Wakaamba kuti bantu biingi bayooyenda munzila mpati iitola kulunyonyooko pesi bache biyo mbayooyenda mukazila kaniini katola kubuumi. (Mt. 7:13, 14) Wakatondeezya kuti bamwi bakali kuyoolyaamba kuti bakomba Leza pesi michito yabo kayitondeezya kuti bukombi bwabo mbwakubeja. Wakaamba kuti: “Amubacenjelele basinsimi bakubeja ibaboola kulindinywe kabasamide zisani zyambelele, pele mukati mbaaumpe babutambo. Kwiinda mumicelo yabo muyoobazyiba.”—Mt. 7:15-20.

9. Nziizili njiisyo zyakubeja nzyakayubununa Jesu?

⁹ Nzilyaamba Bbayibbele. Bupolofita buli muBbayibbele butondeezya kuti Mesiya wakali kuyoosungwaala kuchita milimu mung’anda yaJehova. (Int. 69:9; Joh. 2:14-17) Busungu oobu bwakapa kuti Jesu ayubunune njiisyo zyakubeja aziyanza zitazwi muMagwalo. Muchikozyano, baFarisi bakali kusyoma kuti muuya tufwi pe pesi Jesu wakayiisya kuti bafwide nga balilede. (Joh. 11:11) BaSadusi bakali kwaamba kuti taakwe bubuke pesi Jesu wakabusya mweenzinyina Lazaro. (Joh. 11:43, 44; Mil. 23:8) BaFarisi bakali kuyiisya kuti Leza nguusalila bantu zintu zichitika mubuumi bwabo naakuti nzibachita pesi Jesu wakayiisya kuti bantu balakonzya kulisalila kukomba Leza naakuti pe.—Mt. 11:28.

10. Nkamboonzi bantu biingi nibatuzonda akaambo kazintu nzituyiisya?

¹⁰ Maboneno ngibalaawo bantu mazubaano. Bantu biingi balatuzonda akaambo kakuti zintu nzituyiisya katubelesya Bbayibbele ziyubununa njiisyo zyabo zyakubeja. Bapati bazikombelo bayiisya kuti Leza utenta bantu babi mumulilo. Babelesya njiisyo eeyi kuti bayoosezye bantu. Bakombi baJehova balizizi kuti Leza uli aaluyando alubo batondeezya bantu kuti njiisyo yakutenta bantu mumulilo njakubeja. Bapati bazikombelo bayiisya kuti muuya tufwi pe. Pesi tutondeezya bantu kuti njiisyo eeyi njakubeja nkaambo kaansinga njachoonzyo nikuli taakwe bubuke pe. Alubo bayiisya kuti Leza nguwe uusalila bantu zintu zyakuchita pesi swebo tuyiisya bantu kuti Leza utupede lwaangunuko lwakulisalila. Eezi zibajata biyeni bapati bazikombelo? Zilabanyemya.

11. Kweendelana amajwi aaJesu ali mulugwalo lwa Johane 8:45-47, Leza uyanda kuti bakombi bakwe bachiteenzi?

¹¹ Zikonzya kutugwasya kuti tube aalusyomo. Kuti katuyanda kasimpe tweelede kuswiilila nzyaamba Leza. (Bala Johane 8:45-47.) Kusiyana aSaatani Dyabbulosi, tukakatila mukasimpe. Tatuyandi kuchita zintu ziteendelani aaMagwalo. (Joh. 8:44) Leza uyanda kuti bakombi bakwe ‘basesemwe acintu cibi alubo bakakatile kucibotu’ mbuli mbaakachita Jesu.—Rom. 12:9; Heb. 1:9.

(3) JESU WAKAPENZEGWA

12. Nkamboonzi nzila njakajayigwa aayo Jesu niyakapa kuti maJuda biingi bamukake?

¹² Niinzi chimwi chakapa kuti maJuda bamukake Jesu? Pawulu wakaamba kuti: “Swebo tukambauka Kristo iwakajaigwa aacisamu, icilebyo kuba Juda.” (1 Kor. 1:23) Nkamboonzi nzila njakajayigwa aayo Jesu niyakapa kuti maJuda biingi bamukake? Kugankaminwa aachisamu chakupenzezya kwakapa kuti maJuda bamubone mbuli chigwebenga naakuti sizibi kutali Mesiya.—Dt. 21:22, 23.

13. Niinzi nzibakeelede kuziba bantu bakakaka Jesu?

¹³ MaJuda bakakaka Jesu bakeelede kuziba kuti Jesu taakalikwe mulandu pe akuti taakajatwa kabotu pe. Bantu bakamubeteka teebakamubeteka munzila iilikabotu pe. BaNkuta Mpati yamaJuda bakafwambaana-fwambaana kumubeteka Jesu alubo teebakali kutobelezya milawu chiindi nibakali kumubeteka. (Lk. 22:54; Joh. 18:24) BaNkuta Mpati teebakayanduula makani woonse atala amulandu ngwaakali kupegwa pesi “bakali kuyandaula kaambo kakumubejekezya Jesu kutegwa bamujaye.” Nibakakabula, mupayizi mupati wakeezya kupa kuti Jesu aambe zintu zyakali kuyoopa kuti bamujanine mulandu. Zyoonse eezi teezyakali kweendelana pe amulawu wakubeteka muntu. (Mt. 26:59; Mk. 14:55-64) Jesu naakabusigwa baNkuta Mpati bakapa masoja amaRoma bakali kulinda kabanda kakwe “mali aansiliva aali mbwaabede” mpawo bakababuzya kuti baambe makani aakubeja aakuti basikwiiya bakwe bamubba.—Mt. 28:11-15.

14. Mupolofita lsaya wakaambilizyaanzi atala aMesiya?

¹⁴ Nzilyaamba Bbayibbele. MaJuda biingi bakali kubonaanga Mesiya takeelede kuzoofwa pe pesi mupolofita lsaya wakaamba kuti: “Wakatila buumi bwakwe naakafwa alimwi wakabalilwa antoomwe abasikusotoka mulawo; walo wakatola cibi cabantu banji, akwiiminina basikusotoka mulawo.” (Is. 53:12) Nkinkaako, teekwakalikwe kaambo pe kakapede kuti maJuda bamukake Jesu akaambo kakuti zyakali zyaambwa kale kuti wakali kuzoojayigwa mbuli sizibi.

15. Njiili milandu njibalikutamikizigwa Bakamboni baJehova ilikupa kuti bamwi batabaswiilili pe?

¹⁵ Maboneno ngibalaawo bantu mazubaano. Jesu wakatamikizigwa mulandu ngwatakachita pe. Bakamboni baJehova mazubaano balikujatwa munzila iikozyenie. Muchikozyano, kuzwa mu1930 kusika mu1950 kuUnited States, Bakamboni baJehova bakali kusungwa akaambo kalusyomo lwabo. Bankuta teebakali kutubeteka munzila iilikabotu pe. Bapati bazikombelo amfulumende bakabeleka aamwi kuti bakasye mulimu wesu kuQuebec akuCanada. Basikupupulula biingi bakabikkwa mujele akaambo kakukambawukila bantu atala aBwaami bwaLeza. Chiindi nikwakali kweendelezya mfulumende yaNazi kuGermany bamwi bakwesu bachikula bakajayigwa akaambo kalusyomo lwabo. Mazubaano, bakwesu biingi bakuRussia balikusungwa akubikkwa mujele akaambo kakukambawukila bantu. Bapati bamfulumende baamba kuti nzibalikuchita bakwesu aaba nkupapila mfulumende. Nikuba Bbaibbele LyaBusanduluzi Bwanyika Mpya lyachiRussia lyakakasigwa alubo lyaambwa kuti lili aamakani aasungwaazya bantu kuti bapapile mfulumende akaambo kakuti muBbayibbele eelyo mujanika zina lyaJehova.

16. Kweendelana alugwalo lwa 1 Johane 4:1, niinzi nzitweelede kuchita kuti twamvwa makani akubeja atala abakombi baJehova?

¹⁶ Zikonzya kutugwasya kuti tube aalusyomo. Yanduula makani woonse atala ankani njwaamvwa. MuNkambawuko yakwe Yakuchilundu, Jesu wakachenjezya baswiilizi bakwe kuti bakali kuyoobejelezegwa “zintu zibi ziindene-indene.” (Mt. 5:11) Twaambo twakubeja toonse ootu tuzwa kuli Saatani. Alubo Saatani ulikupa kuti basikutukazya baambe manwa mapati atala andiswe. (Ciy. 12:9, 10) Tatweelede kwaaswiilila pe manwa ngibaamba. Alubo tatweelede kuzumizya manwa aayo kuti atuyoosezye akuti ape kuti tuleke kukomba Leza.—Bala 1 Johane 4:1.

(4) JESU WAKAWUZIGWA ALUBO WAKAKAKWA

17. Kweelede kuti niinzi zyakachitika zyakapa kuti bamwi bamukake Jesu?

¹⁷ Jesu katanafwa wakawuzigwa awumwi wabaapostolo bakwe bali 12. Mpawo kali waba aafwiifwi kuti afwe umwi wabaapostolo bakwe wakamukaka kwaziindi zitatu alubo bamwi baapostolo boonse bakamuchija. (Mt. 26:14-16, 47, 56, 75) Eezi teezyakamugambya pe Jesu nkaambo wakali waamba kale kuti zyakali kuzoochitika. (Joh. 6:64; 13:21, 26, 38; 16:32) Kulakonzeka kuti bamwi nibakazibona bakamukaka. Amwi bakayeeya kuti, ‘Kuti baapostolo bakwe bamukaka tazichiti pe kuti ndibe umwi wabasikwiiya bakwe.’

18. Mbuubuli bupolofita bwakazuzikizigwa Jesu katanafwa?

¹⁸ Nzilyaamba Bbayibbele. Jesu katanaza aanyika, Jehova wakaambide kuti Mesiya wakali kuzoowuzigwa aamasiliva aali 30. (Zek. 11:12, 13) Jesu wakali kuzoowuzigwa aamweenzinyina. (Int. 41:9) Mupolofita Zekkariya wakalemba kuti: “Komuuma mweembezi, kutegwa mbelele zimwaike.” (Zek. 13:7) Bantu bakali aalusyomo teebakali kuyoomukaka pe Jesu akaambo kazintu eezi. Kubona bupolofita oobu kabuli kuzuzikizigwa kwakali kuyoosimya lusyomo lwabo mulinguwe.

19. Niinzi nzibazi bantu bayanda Jehova?

¹⁹ Maboneno ngibalaawo bantu mazubaano. Bamwi Bakamboni bakasiya kasimpe akuba basiluleyo alubo balikweezya kupa kuti bamwi Bakamboni babatobele. Basiluleyo babelesya manews paper, malediyo, maTV aIntaneti kuti bapupulule makani aakubeja atala aBakamboni baJehova. Pesi bantu bayanda Jehova tabaaswiilili pe makani aayo. Balizi kuti Bbayibbele lyakaamba kale kuti zintu eezi zizoochitika.—Mt. 24:24; 2 Pet. 2:18-22.

20. Niinzi nzitweelede kuchita kuti tutazumizyi bantu basala kusiya kasimpe kuti batukachizye kukomba Jehova? (2 Timoteyo 4:4, 5)

²⁰ Zikonzya kutugwasya kuti tube aalusyomo. Kuti tukonzye kuba aalusyomo lusimide, tweelede kukkala katubala Bbayibbele akukomba chiindi choonse. Alubo tweelede kuba aazintu zyiingi zyakuchita mumulimu ngwatupede Jehova. (Bala 2 Timoteyo 4:4, 5.) Kuti twaba aalusyomo lusimide tatukayoowi pe nitwakumvwa makani aakubeja atala aBakamboni baJehova. (Is. 28:16) Kuyanda Jehova, Jwi lyakwe abakombima kuyootugwasya kuti tuzumanane kukomba Jehova nikuba kuti bamwi Bakamboni basala kusiya kasimpe.

21. Tweelede kuba aachoonzyo chanzi nikuba kuti bamwi bantu mazubaano tabawuswiilili pe mulumbe ngutubakambawukila?

²¹ Bantu biingi bakapona muchiindi chaJesu bakamukaka pesi bamwi bakamusyoma. Bantu bakasyoma Jesu baswaanizya umwi waNkuta Mpati yamaJuda ‘ankamu mpati yabapaizi.’ (Mil. 6:7; Mt. 27:57-60; Mk. 15:43) Mazubaano, mamiliyoni aabantu balikutondeezya kuti balamusyoma Jesu. Nkamboonzi? Nkaambo balikazi kasimpe kamuBbayibbele alubo balakayanda. Jwi lyaLeza lyaamba kuti: “Aabo bayanda mulawo wako balijisi luumuno lunji; kunyina cintu cikonzya kubaleba pe.”—Int. 119:165.