Ndilikubotelwa Akubelekela Jehova Nkundakachita

Mumunyaka wakatobela, kwakapegwa chizibisyo kumpuli yaBbeteli yakuCanada kuti kwakali kuyandikana basikulipeda kuti bakabeleke kumutabi wakuSouth Africa nkaambo kwakali kwawulwa munchina mupya wakupulintisya. Ndakalembesya zina lyangu kuti ndakali kuyanda kwiinka. Ndakabotelwa loko kuti ndakasalwa. Bamwi bakwesu batatu bakali kubeleka aaBbeteli ambabo bakasalwa. Bakwesu aaba bakali kuswaanizya Dennis Leech, Bill McLellan aKen Nordin. Twakabuzigwa kuti twakali kuyookkala kuSouth Africa kwachiindi chilamfu.

Ndakafoonena baama kandibabuzya kuti ndiya kuSouth Africa. Baama bakali muntu wumwide, bakali aalusyomo lusimide alubo bakali abweenzinyina busimide aJehova. Taakwe zyiingi nzibakaamba pesi ndakalizi kuti bakali kuyanda kuti ndiinke. Nikuba kuti baama aandeende bakali kukataazikana kuti ndakali kuyookkala kule ambabo pesi bakazuminana akusala nkundakachita.

LWEENDO LWAKUYA KUSOUTH AFRICA

Toonse katuli 4 twakasaanguna kuya kuBbeteli iili kuBrooklyn kuti tukayiisigwe kubelesya minchina yakupulinta kwamyeezi iitatu. Nitwakamana, twakagada bwaato bwakali kuya kuCape Town kuSouth Africa. Aachiindi eechi ndakali ndasisya minyaka iili 20. Nitwakasika kuCape Town twakazoogada chitima mansiku chakali kuya kuJohannesburg. Chitima chakazooyimikila kubusena butegwa Karoo kuseeni zuba kalitanazwa pe. Kubusena oobu teekwakalikwe misamu pe, kwakali kuyumu, kwakazwide museele alubo kwakali kupya loko. Toonse katuli 4 twakalanga mumawindo katugambide nkaambo kakali kakusaanguna kubona ndawu iili boobu. Twakasaanguna kuyeeya kuti nkutuya kulibiyeni. Mukuya kwachiindi, nitwakazooswaya ndawu eeyi twakazoobona kuti nindawu ilikabotu.

Mulimu wangu wakusaanguna kuSouth Africa wakali wakubelesya munchina uusumpukide wakali kupulinta mamagazini aaNgaziyakulinda aAmubuke! Mutabi wakuSouth Africa wakali kupulinta mamagazini aamilaka iisiyene-siyene yaambuulwa muSouth Africa alubo wakali kupulintila zimwi nyika zili muAfrica. Twakabotelwa nitwakabona kuti munchina wakatweeta kuSouth Africa wakali kubeleka loko.

Ndakazoobeleka kudipatimenti lilangania milimu iisiyene-siyene yakupulinta, kutumizya mabbuku amulimu wakusandulula. Nikuba kuti ndakali kukkala kandijisikini pesi ndakali kubotelwa.

KUKWATA AMULIMU MUPYA

Mu1968, ndakachada awumwi muchizi wakali kupayona uutegwa Laura Bowen wakali kukkala aafwiifwi aBbeteli. Laura wakali kugwasilizya mumulimu wakusandulula. Aachiindi eecho, teekwalikwe mabambe aakuti bantu bakachili kuzwa kuchada bakkale aaBbeteli, nkinkaako twakakumbilwa kuti tukabeleke katuli mapayona aayandikana. Ndakakataazikana. Ndakali ndaba aaminyaka iili 10 kandibeleka kuBbeteli, twakali kupegwa chakulya ang’anda yakukkala. Nkinkaako, twakali kukataazikana kuti twakali kuyookonzya na kuula zintu ziyandikana akamali kakali kupegwa mapayona aayandikana. Aachiindi eecho, mapayona aayandikana akali kupegwa mali iisika ku25 rand amweezi (aachiindi eecho yakali $35 US) alubo mali eeyo wakali kwiipegwa kuti wasisya ma-awa aayandikana, namba yamabbuku ayabantu mbwabweedela iiyandikana. Mumali njiyeeyo, twakeelede kuula chakulya, kubbadala lenti, kuula mafuta aamoota, kuula misamu yabusilisi azimwi.

Twakakumbilwa kuti tukapayone kuDurban. Twakali kunjila aambungano yakali aabantu bache. Kubusena ooku kwakazwide bantu bakuIndia bakiinkide kuSouth Africa kuma1875 kuti bakabeleke kukkampani yakali kupanga sugar. Bantu aaba bakali baabubeleka imwi milimu pesi bakachili kutobelezya ziyanza zyabo akulya chakulya chakulimbabo. Kwakali kuuba kukambawukila bantu aaba nkaambo bakalichizi Chikuwa.

Mapayona aayandikana bakali kulangililwa kuti basisye ma-awa aasika ku150 amweezi, nkinkaako, ime aLaura twakasala kuti katukambawuka kwama-awa ali 6 abuzuba. Kwakali kupya loko. Teetwakalikwe bantu bakubweedela azyiiyo zyaBbayibbele. Nkinkaako, twakeelede kukambawuka aang’anda ang’anda kwama-awa aali 6. Kakuli kwayinda kayindi katuli twasaanguna kukambawuka, ndakalanga aawachi yangu mpawo ndakabona kuti kwakali kwayinda maminesi aali 40 luzutu. Ndakakataazikana kuti twakali kuyookonzya na kuba mapayona aayandikana.

Mukuya kwachiindi, twakazoozibilana aazyiimo. Buzuba abuzuba, nitwakali kuya mumulimu wakukambawuka twakali kubbanga chakulya. Kuti twaba aanzala, twakali kupaka kamoota kesu aansi amusamu mpawo twasaanguna kulya. Chimwi chiindi bana babantu bakuIndia bakali kusika kabali kutulangisisya nkaambo twakalisiyene ambabo. Kakutanayinda mazuba, twakabona kuti chiindi chakasaanguna kuchijaana.

Twakabotelwa loko kuyiisya bantu kasimpe kamuBbayibbele kundawu eeyo. Twakabona kuti bantu bakuIndia balalemeka, bali aaluzyalo akuti balamulemeka Leza. MaHindu biingi bakali kuswiilila mulumbe ngutwakali kubakambawukila. Bakali kuyanda kwiiya atala aJehova, Jesu, Bbayibbele, nyika mpya abulangilizi buli atala abantu bafwide. Nwakamana munyaka, twakali twaba aazyiiyo zyaBbayibbele zili 20. Buzuba abuzuba twakali kulyaamwi abantu mbitwakali kwiiyaabo. Twakali kubotelwa loko.

Nikwakayinda chiindi, twakakumbilwa kuti tukabelekele mumulimu wakweendeenda mundawu zili mumbali aIndian Ocean. Mviki amviki twakali beenzu mumaanda aabakwesu alubo twakali kusungwaazya bakwesu abachizi chiindi nitwakali kukambawuka aamwi. Bakali kutujata mbuli umwi wamumpuli zyabo alubo twakali kubotelwa kujana chiindi chakubaamwi abana babo alubo twakali kusaana aazivuubwa zyabo. Kakuli kwayinda minyaka iibili, bakwesu bakumutabi bakatufoonena. Bakatubuzya kuti bakali kuyanda kuti tukabelekele kuBbeteli mpawo ndakabasandula kuti iswe tulikubotelwa kubelekela ookuno nkutubede. Nikuba boobo, twakalilipedelede kubelekela kufumbwa nkutwakali kukumbilwa kuti twiinke.

TWAKABWEEDA KUBBETELI

KuBbeteli ndakakubeleka kuDipatimenti yaMulimu, ooko nkundakakubelekaamwi abakwesu basimide mubukombi alubo bali aaluzibo. Aachiindi eecho, mulangizi wabbazu naamana kuswaya mbungano wakali kulemba lipoti yakali kuya kumutabi mpawo bakwesu bali muDipatimenti yaMulimu bakali kulembela mbungano eeyo lugwalo kweendelana alipoti yamulangizi wabbazu. Magwalo aayo akali aakusungwaazya bakwesu abachizi akubapa amwi malayilile ngibakeelede kutobela. Kwakali bakwesu bakali kusandulula magwalo aayo akalembedwe mumilaka yakali kuswaanizya chiXhosa, Zulu ayimwi milaka kababikka muChikuwa mpawo bakali kusandulula magwalo akalembedwe muChikuwa akali kulembwa amutabi kababikka muli iimwi milaka. Mulimu ngubakali kuchita bakwesu aaba wakandigwasya loko kuti ndikonzye kuziba buyumu-yumu mbukali kuswaana bakwesu abachizi basiya bamuAfrica.

Aachiindi eecho, kuSouth Africa bantu bakali kusaluulana misyobo yabo. Musyobo umwi awumwi wakali aandawu nkwaakali kukkala. Teekwakali kuzumizigwa pe kuba aabamwi bantu bakuli uumwi musyobo. Bakwesu abachizi basiya bakali kwaambuula milaka yabo luzutu, kukambawuka kababelesya milaka yabo alubo bakali kunjila aambungano zyaambuulwa milaka wabo.

Teendakazibene kabotu pe abakwesu abachizi basiya bamuAfrica nkaambo milimu yoonse njitwakali kupegwa yakali kugwasilizya mumbungano zyaChikuwa. Pesi ndakazoojana mweenya wakwiiya atala abantu bamuAfrica aziyanza zyabo. Ndakazoobuziba buyumu-yumu mbubakali kuswaana bakwesu abachizi akaambo kakukaka kutobela ziyanza anjiisyo ziteendelani aaMagwalo. Bakwesu aaba bakali aachibindi nkaambo teebakali kutobela ziyanza ziteendelani aaMagwalo nikuba kuti bakali kukazigwa abamumpuli zyabo abamuchilawu chabo. Bantu bakali kukkala kumyuunzi bakali kufwaba loko. Bamwi bakayiide mbichaani alubo bamwi teebakayiide pe pesi bantu aaba bakali kulilemeka Bbayibbele.

Ndakaba aachilongezyo chakwiiminina bakwesu abachizi munkuta munkani zili atala alwaangunuko lwakukomba akutatola lubazu muli zyapolitikisi. Zyakasimya lusyomo lwangu kubona chibindi nchibakali aacho bana baBakamboni bakasala kutandwa kuchikolo akaambo kakukaka kuliswaanizya munkombyo zyakali kuchitwa kuchikolo anyimbo zyakali kwiimbwa.

Bakwesu abachizi bakuSwaziland (lino yabutegwa Eswatini) bakaswaanana aabumwi buyumu-yumu chiindi Mwaami Sobhuza II naakafwa. Bantu boonse bakali kulangililwa kuti bachite ziyanza zichitwa kuti muntu wafwa. Baalumi bakali kukulula mitwe yabo alubo banakazi bakali kugela masusu aabo kuti abe mafwiifwi. Pesi bakwesu abachizi biingi bakakaka kuliswaanizya mumichito eeyi nkaambo teeyakali kuzwa muMagwalo pe. Kusyomeka nkubakachita kuli Jehova kwakapa kuti tubotelwe loko. Zikozyano zyabakwesu abachizi bamuAfrica bakali kusyomeka alubo bakali aamoyo mulamfu zyakatugwasya andiswe kuti tukkale katuli aalusyomo lusimide.

KUBELEKELA KUDIPATIMENTI LYAKUPULINTA LUBO

Mu1981 ndakakumbilwa kuti ndigwasilizye lubo kudipatimenti lyakupulinta akaambo kakuti minchina yakupulinta yakali yaabupulinta kakubelesegwa makkompiyuta. Eechi chakali chiindi chibotu loko. Kwakali kwaba nzila mpya zyakupulinta. Umwi sibbizinesi wakapa mutabi munchina uusumpukide loko kuti bawubelesye babone kuti ubeleka kabotu na. Nibakabona kuti ubeleka kabotu, bakachincha minchina iili 9 njibakali kubelesya chiindi mpawo bakawula iili 5 iili mbuli ngubakapedwe aasibbizinesi. Bakazoowula umwi munchina wakudinda. Eezi zyakapa kuti tupulinte mabbuku miingi.

Makkompiyuta akatugwasya kuti tujane zimwi nzila nguba zyakubelesya kuti mabbuku eesu azwe kabotu katubelesya pulogilamu iitegwa MEPS (Multilanguage Electronic Publishing System). Kuzwa nitwakazwa kuCanada katuya kuSouth Africa minchina njitwakali kubelesya kukupulinta yakali kuyoobusumpuka akaambo katekkinoloji. (Is. 60:17) Aachiindi eecho, toonse katuli 4 twakali twakwata bachizi babotu bakali kupayona alubo bakasimide mubukombi. Ime aBill twakachili kubeleka kuBbeteli. Ken aDennis bakali baba aabana.

Milimu yakali kuchitwa aaBbeteli yakali kuyoobuvula. Mbukunga mabbuku eesu akali aabusandululwa mumilaka myiingi, nkinkaako mabbuku miingi akali kupulintwa alubo akali kutumizigwa kuliimwi mitabi. Kwakali kwabuyandikana aamwi mawofesi. Bakwesu bakayaka amwi mawofesi kuJohannesburg nkwiili kububbila mpawo akapedwa mu1987. Ndakabotelwa loko kubona mulimu kuli kuyungizya muSouth Africa akubeleka kandili muKkomiti yaMutabi kwaminyaka myiingi.

TWAKAPEGWA UMWI MULIMU

Mu2001, twakabula lyakwaamba chiindi nitwakatambwa kuti tukabelekele kuUnited States kandili muKkomiti yaMutabi. Nikuba kuti twakalikataazikene kuti twakali kuyoosiya mulimu abeenzuma kuSouth Africa pesi twakali kubotelwa kuyoobaamwi ampuli yaBbeteli yakuUnited States.

Twakalikataazikene kuti twakali kuyookkala kule abayina baLaura bakali bachembaala. Taakwe zyiingi pe nzitwakali kuyoochita kuti tubagwasye katuli kuNew York pesi banike baLaura batatu bakalipeda kubagwasya muzintu zyoonse nzibakali kuyandikana. Bakaamba kuti, “Tatukonzyi pe kuba mumulimu wachiindi choonse pesi kuti twalangania baama kuyoomugwasya kuti mwiinkilile kunembo amulimu wanu.” Tulabalumba akulipeda kwabo.

Mbuli mbubakachita banike baLaura, anguwe mukulana wangu amwanakazi wakwe bakali kukkala kuToronto kuCanada bakalipeda kulangania baama bakali baba mukamufu. Bakakkalaabo kwaminyaka yiinda ku20. Tulabalumba akutondeezya luyando nkubakachita akulangania baama kusikila chiindi nibakazootusiya. Baama bakatusiya chiindi nitwakachili kusika-sika kuNew York. Nchilongezyo kuba mumpuli iili aabantu balipeda kuti balanganie bazyali banga bachembaala nikuba kuti chimwi chiindi nga nkuyumu kuchita oobo.

Nitwakasika kuUnited States, ndakali kubeleka kudipatimenti lilangania mabbuku. Mulimu uuchitwa kudipatimenti eeli wakawuba akaambo kakuti kwaabubelesegwa zibelesyo zyamazubaano. Kuzwa minyaka miche yayinda, ndili kubeleka kandili kuDipatimenti lyaZyakuula. Ndaba aaminyaka iili 20 kandibeleka kumutabi wakuUnited States. Mutabi ooyu ulaabakwesu abachizi basika ku5 000 ababeleka kabazwa kung’anda basika ku2 000.

Minyaka iili 60 yayinda, teendakali kuyeeyela pe kuti ngandizooba ookuno. Minyaka yoonse eeyi yayinda, Laura wali kundigwasya amoyo wakwe woonse. Twakabotelwa loko mubuumi bwesu. Tulamulumba Jehova nkaambo twakaba aachilongezyo chakubeleka milimu iisiyene-siyene, kubeleka aabantu basiyene-siyene kuswaanizya abaabo mbitwakali kuswaya kuli iimwi mitabi iisiyene-siyene. Mbukunga ndaba aaminyaka yiinda ku80, ndakapegwa mulimu muche nkaambo kuchili bakwesu biingi basimide bakonzya kubeleka mulimu ooyo.

Sintembawuzyo wakalemba kuti: “Cilikkomene cisi cijisi Jehova kuba Leza wancico.” (Int. 33:12) Majwi aaya ngachoonzyo. Ndilabotelwa kuti ndakaba aachilongezyo chakubelekela Jehova kandilaamwi abakombi bakwe babotelwa.