Mibuzyo Yabasikubala

Bbayibbele lityeni atala akukonka?

Chikonke chaamba “kwaamba aamwi majwi kunembo lyabantu naakuti kusyomezya kuzoochita chimwi chintu alubo chiindi chiingi nga ulikwaamba kuti Leza . . . ngukamboni wako.” Chikonke chilakonzya kulembwa aansi naakuti kwaambwa aamulomo.

Bamwi bantu babonaanga kukonka takuli kabotu pe akaambo kakuti Jesu wakaamba kuti: “Mutakonkezyi naaceya . . . Pele kwaamba kwanu kuti ‘Inzya’ akube inzya, akuti ‘Peepe’ akube peepe, nkaambo aayindilila aali yaaya azwa kumubi.” (Mt. 5:33-37) Nikuba boobo, Jesu wakalizi kuti Mulawu waMozesi wakali kuyanda kuti malsrayeli kabachita zikonke alubo wakalizi kuti bakombi baJehova basyomeka bachiindi ambabo bakali kuchita zikonke. (Matl. 14:22, 23; Kul. 22:10, 11) Alubo wakalizi kuti Jehova lwakwe wakali kuchita zikonke. (Heb. 6:13-17) Nkinkaako, Jesu taakwe naakaamba kuti muntu tayelede kukonka pesi wakali kuchenjezya bantu kuti tabeelede kuchita zikonke kuzintu zitayandikani. Chiindi choonse, tweelede kuchita nzitwasyomezya nkaambo nzizyo Jehova nzyayanda kuti tuchite.

Niinzi nzweelede kuchita kuti wabuzigwa kuti ukonke? Chakusaanguna, baachoonzyo chakuti ulakonzya kuchita kweendelana achikonke chako. Kuti kutakwe choonzyo, zilikabotu kuti uleke kukonka. Jwi lyaLeza lyaamba kuti: “Cilainda kubota kutakonka muciindi cakukonka kumane tocizuzikizyi.” (Muk. 5:5) Chachibili, langa-langa malayilile aamuBbayibbele aayendelana achikonke eecho mpawo uchite kweendelana amoyo wako uuyiisidwe. Ngaali amwi malayilile aamuBbayibbele ngukonzya kulanga-langa?

Zimwi zikonke tazikazyanyi pe akuyanda kwaLeza. Muchikozyano, Bakamboni baJehova bachita zikonke chiindi nibali kuchada. Balakonka kunembo lyaLeza abantu kabasyomezyania kuti banooyandana akulemekana ‘kufumbwa boonse kabachipona.’ (Bamwi basikuchada balakonzya kutaamba majwi aakozyenie ayaaya pesi ngabalikuchita chikonke kunembo lyaLeza.) Bantu aaba ngabaambwa kuti mwaalumi amwanakazi alubo lukwatano lwabo talweelede kumana pe kufumbwa kabachipona. (Matl. 2:24; 1 Kor. 7:39) Mabambe aaya alikabotu alubo aleendelana akuyanda kwaLeza.

Zimwi zikonke zikazyania aakuyanda kwaLeza. MuKristu wachoonzyo tayelede kukonka pe kayanda kuti abelesye zibelesyo zyankondo naakuti kwaamba kuti tachisyomi pe muli Leza. Kuchita oobo kukazyania aamilawu yaLeza. MaKristu ‘tabali banyika’ nkinkaako, tabeelede kuliswaanizya pe muzintu zichitwa munyika.—Joh. 15:19; Is. 2:4; Jak. 1:27.

Zimwi zikonke ziyanda kuti muKristu abelesye moyo wakwe. Chimwi chiindi kulayandikana kuti tulange-lange chikonke chesu katubelesya malayilile aakaambwa aaJesu aakuti “amupe Kaisara zintu zya Kaisara, pele zintu zya Leza amupe Leza.”—Lk. 20:25.

Muchikozyano, kuti muKristu kayanda kulembela kuyookkala kuliimwi nyika naakuti kayanda kubweza pasipoti mpawo waziba kuti weelede kuchita chikonke chitondeezya kuti uyoozilemeka zintu zyaambwa aamfulumende. Kuti mfulumende eeyo yamubuzya kuti achite chikonke chikazyania aamulawu waLeza, moyo wakwe uuyiisidwe weelede kupa kuti aleke kuchita chikonke eecho. Pesi mfulumende eeyo ilakonzya kuzumizya kuti majwi aali muchikonke eecho abambululwe kuchitila kuti muKristu ooyo akonzye kuchichita.

Kuchita chikonke eecho chinga chabambululwa kuleendelana amalayilile aajanika muli Baroma 13:1 aakuti: “Muntu uuli woonse kalibombya kubeendelezi.” MuKristu ulakonzya kubona kuti taakwe chibi pe kuti wasala kuchita chikonke kuchintu Leza nchayanda kuti maKristu bachichite.

MuKristu weelede kubelesya moyo wakwe uuyiisidwe kuti wabuzigwa kuti achite chikonke kabelesya chimwi chintu naakuti zipanzi zyamubili wakwe mbuli kutambika kuboko azimwi. MaRoma abaSikkuti bakali kukonka kababelesya mapanga. Bakali kubelesya chitondeezyo eechi chaleza wankondo kuti batondeezye kuti muntu ulasyomeka. MaGrikki bakali kutambika maboko chiindi nibakali kukonka. Nzibakali kuchita zyakali kutondeezya kuti Leza wakali kuzibona zintu nzibakali kwaamba anzibakali kuchita akuti bantu bakali kuyoolyaambilila kulinguwe kuti teebachita kweendelana achikonke eecho.

Mukombi waJehova tayelede kuchita chikonke pe kabelesya chitondeezyo chili aachakuchita abukombi bwakubeja. Pesi niinzi nzweelede kuchita kuti munkuta wabuzigwa kuti ubikke kuboko aajulu aaBbayibbele mpawo ukonke kuti ulaamba bumboni bwachoonzyo. Muchiimo chili boobu, ulakonzya kuchita oobo nkaambo Magwalo aambuula atala abamwi bakombi baLeza basyomeka bakachita zikonke munzila iili boobu. (Matl. 24:2, 3, 9; 47:29-31) Weelede kuyeeya kuti kuchita chikonke chili boobu nga ulikukonka kunembo lyaLeza kutondeezya kuti uyanda kwaamba makani aakasimpe. Weelede kulibambila kusandula makani aachoonzyo kufumbwa mubuzyo ngukonzya kubuzigwa.

Akaambo kakuti tububona kabuyandikana bweenzuma mbutulaabo aJehova, tweelede kukomba akuyeeyesesya atala achikonke nchitwabuzigwa kuti tuchite katuli aachoonzyo chakuti tatunyonganyi moyo wesu uuyiisidwe naakuti tatutyoli malayilile aamuBbayibbele. Nkinkaako, kuti wasala kuchita chikonke, weelede kuba aachoonzyo chakuti wachizuzikizya.—1 Pet. 2:12.