2 | ‘Luumbulizyo Luzwa muMagwalo’

NZILYAAMBA BBAYIBBILI: “Nkaambo zintu zyoonse zyakalembwa chiindi, zyakalembelwa kuti tuyiisigwe, kuchitila kuti kwiinda mukulisimya aluumbulizyo luzwa muMagwalo, tube aabulangilizi.”—BAROMA 15:4.

Eezi Zyaamba Kuti

MuBbayibbili muli makani aawumbulizya aakonzya kutugwasya kuti tulisimye akuti tuzunde mizeezo iitali kabotu. Alubo mulumbe wamuBbayibbili utugwasya kuti tube aachoonzyo chakuti zintu zitukataazya zizoomana.

Zitugwasya Biyeni?

Toonse tulakataazikana pesi aabo bali aapenzi lyakukataazikana mumizeezo balwana aapenzi eeli buzuba abuzuba. Kujana Bbayibbili lyatugwasya biyeni?

Bbayibbili lilakonzya kutugwasya kuti tuyeeye zintu zilikabotu kutali zintu zibi kupela. (Bafilipi 4:8) Lilakonzya kutuumbulizya akutugwasya kuti tubatame kuchitila kuti tukonzye kulwana mizeezo iitali kabotu.—Intembauzyo 94:18, 19.
Bbayibbili lilakonzya kutugwasya kuti tulwane mizeezo iipa kuti tuyeeye kuti tatugwasyi pe.—Lukka 12:6, 7.
Mavesi miingi aamuBbayibbili atugwasya kuti tube aachoonzyo chakuti tatuli aatulikke pe akuti Leza Mulengi wesu ulatumvwisisisya.—Intembauzyo 34:18; 1 Johane 3:19, 20.
Bbayibbili litusyomezya kuti Leza uyoopa kuti tutakayeeyi zintu zyoonse zibi zyakachitika. (Isaya 65:17; Ciyubunuzyo 21:4) Chiindi nitulimvwa katukataazikene, kuyeeya chisyomezyo eechi kulakonzya kutupa manguzu aakuti twiinkilile kunembo.

Mbulili Kumugwasya Bbayibbili Jessica

Buyumu-Yumu Mbundilikuswaana Akaambo Kakukataazikana Zyiindilide

“Nindakali aaminyaka iili 25, ndakasaanguna kukataazikana zyiindilide. Ndakali kukkala kandiyeeya atala azintu zibi zyakandichitikila chiindi. Madokotela bakandibuzya kuti penzi eeli lyakaba akaambo kakuti ndakali kukkala kandiyeeya zintu zibi zyakachitika mubuumi bwangu. Ndakajana busilisi pesi ndakeelede kuti ndigwasigwe kuti ndilwane mizeezo iitali kabotu.”

Bbayibbili Mbulili Kundigwasya

“Chiindi nindakali kuchiswa loko abulwazi oobu, ndakali kuvundumuka andikke, kuyoowa zyiindilide alubo ndakali kubula ng’onzi. Chiindi chiingi mansiku kwakali kundiyumina kuti ndileke kuyeeya zintu zibi. Mbuli mbulwaamba lugwalo lwa Intembauzyo 94:19, Leza ulatuumbulizya akutugwasya kuti tubatame chiindi nitukataazikene. Ndakali kukkala kandili aaBbayibbili akabbuku kakali aamagwalo aawumbulizya aafwiifwi amubbeeda wangu. Chiindi nindakali kubula ng’onzi ndakali kubala mavesi aamuBbayibbili aapa kuti mizeezo yaLeza induumbulizye.

“Bbayibbili litusungwaazya kuti tutasyomi makani aakubeja aali atala aLeza. Chiindi ndakali kubonaanga tandigwasyi pe, bantu tabandiyandi akuti taakwe ambundibede. Pesi ndakazooyiya kuti zintu nzindakali kusyoma tazyeendelani pe azyaambwa aaBbayibbili nkaambo litondeezya kuti Leza nguTaata uuli aaluyando, ulaalweetelelo alubo ulaandaba aandime. Mbichaani-mbichaani ndakasaanguna kweendelezya mizeezo yangu kwiinda kuti ndeendelezegwe aanjiyo. Lino ndaabulibona mbuli mbandibona Leza. Eezi zyakandigwasya kuti ndisaangune kulibona munzila ilikabotu.

“Ndichilangilila aameso aasalala chiindi mizeezo iichisa akuyeeya zintu zibi nikutazoomane. Kuziba kuti muchiindi chili kunembo taachikwe muntu utanooli aapenzi lyakukataazikana mumizeezo, kundigwasya kuti ndilisimye lino akuti ndibe aabulangilizi bwabuumi bubotu.”