3 | Kugwasigwa Azikozyano ZyamuBbayibbili

BBAYIBBILI LYAAMBUULA ATALA . . . Baalumi abanakazi basyomeka bakali kulimvwa “mbuli ndiswe.”—JAKKOBO 5:17.

Eezi Zyaamba Kuti

MuBbayibbili muzwide zikozyano zyabaalumi abanakazi bakali kuswaanana aazyiimo zyakali kupa kuti bakataazikane. Chiindi nitubala atala azintu zyakabachitikila, tulakonzya kubona kuti bakali kuswaanana aazyiimo zili mbuli zyesu.

Zitugwasya Biyeni?

Toonse tulayanda kuti bamwi batumvwisisisye. Eezi ziyandikana loko, ikapati kuti katulwana aapenzi lyakukataazikana mumizeezo. Chiindi nitubala zintu zyakachitikila bantu bali muBbayibbili, nga twabona kuti bantu aaba bakali kulimvwa mbuli ndiswe. Eezi zipa kuti tubone kuti tatuli aatulikke pe alubo kuchita oobo kutugwasya kuti tutalimvwi katulendeledwe.

Bbayibbili lyaambuula atala azikozyano zyiingi zyabantu bakali kulimvwa kabatagwasyi alubo kabatachizizi zyakuchita. Amwi wakali wasikilwa aamuzeezo wakwaamba kuti, ‘Zyandiyumina, tandichiyandi pe kupona.’ Mozesi, Elija aDavida bakalimvwa munzila iili oobu.—Myeelwe 11:14; 1 Bami 19:4; Intembauzyo 55:4.
Bbayibbili litubuzya atala amwanakazi wakali kutegwa Hana ‘wakawuside kapati’ akaambo kakuti taakalikwe bana alubo wakali kukkala kasampawulwa amukazinyina.—1 Samuele 1:6, 10.
Alubo Bbayibbili litubuzya atala amwaalumi uutegwa Jobu wakaswaanana aamapenzi aali mbuli eesu. Nikuba kuti wakali kusyomeka kuli Jehova, wakaswaanana aazyiimo zikataazya loko zyakuti chimwi chiindi wakaamba kuti: “Buumi bwandicima; tandiyandi kuzumanana kupona.”—Jobu 7:16.

Kuziba kuti bantu aaba balembedwe muBbayibbili bakayizunda biyeni mizeezo iitali kabotu, kulatugwasya kuti tulisimye muzyiimo zitukataazya.

Mbulili Kumugwasya Bbayibbili Kevin

Buyumu-Yumu Mbundilikuswaana Akaambo Kabulwazi Bwa-bipolar

“Chiindi nindakali aaminyaka iisika kuma50 ndakajatwa aabulwazi bwa-bipolar. Aali chimwi chiindi ndakali kulimvwa kuti ndilakonzya kuzunda zyiimo kufumbwa nzindiswaana. Pesi chimwi chiindi ngandabona kuti buumi tabugwasyi pe.”

Bbayibbili Mbulili Kundigwasya

“Mwaapostoli Petro nguumwi muntu uulembedwe muBbayibbili wakaswaanana aazyiimo zili mbuli zyangu. Wakachita zintu zyakapa kuti alimvwe katagwasyi. Pesi kwiinda kuti akkale kali aamizeezo iili oobu, Petro wakasala kuba aafwiifwi abantu bakali aandaba anguwe. Chiindi nindili kukataazigwa aabulwazi oobu bwa-bipolar, kulubizya kwangu nga kwapa kuti ndikataazikane loko alubo ndilimvwe kanditagwasyi. Mbuli Petro, ndakayiya kuti kuba aafwiifwi aabeenzuma kundigwasya kuti ndikonzye kwiinkilila kunembo akuti nditamani manguzu.

“Mwaami Davida nchiimwi chikozyano chamuBbayibbili chipa kuti nduumbulizigwe loko. Davida wakali kukkala kakataazikene akaambo kazyiimo nzyaakali kuswaana alubo wakali kulisola akaambo kazibi nzyaakachita chiindi. Ndilimvwa mbuli Davida nkaambo chimwi chiindi nga ndachita zintu zipa kuti ndizoolisole. Majwi aakaambwa aaDavida muli Intembauzyo 51 alanduumbulizya. Muvesi 3, Davida wakati: ‘Ndilizizyi kabotu zinyonyoono zyangu, alimwi cibi cangu cili kumbele lyangu lyoonse.’ Majwi aaya apandulula mbundilimvwa chiindi nindikataazikene loko nkaambo nga zyandiyumina kuti ndilibone munzila iilikabotu. Alubo ngandalimvwa mbuli mbaakaamba Davida muvesi 10 naakati: ‘Kondipa kuba amoyo uusalala, O Leza, alimwi kobikka muuya mupya, uukkalikene mulindime.’ Andime ngandaamba majwi aakozyenie kandikumbila Leza kuti andigwasye kuti ndilibone munzila iilikabotu. Mpawo vesi 17 ngayanduumbulizya loko. Yaamba kuti: ‘Moyo uuside alimwi uutyompedwe, O Leza, tokaukaki.’ Vesi eeyi indigwasya kubona kuti Leza ulaandaba andime.

“Kuyeeyesesya atala azikozyano zyabantu balembedwe muBbayibbili azintu nzyandipede lino Leza kupa kuti ndisimye bulangilizi bwangu buli atala abuumi bwakunembo. Zisyomezyo zili muBbayibbili ndizibona kazili zyachoonzyo alubo zilikundigwasya kuti ndikonzye kulisimya muchiimo changu.”