Yiya Kuzwa Kubupolofita bwamuBbayibbili

1. Niinzi chikonzya kukugwasya kuti ube aachiyandisyo chakwiiya atala abupolofita buli muBbayibbili?

UMWI mukwesu uuchikula uutegwa Ben wakaamba kuti, “Ndilakuyanda kwiiya atala abupolofita buli muBbayibbili.” Ulakuyanda na anduwe? Naakuti kwiiya atala ambubo kulakuyumina? Amwi kwiiya atala abupolofita buli muBbayibbili kulakubbowa. Pesi kuti waziba kuti nkamboonzi Jehova naakapa kuti bupolofita oobo bulembwe muJwi lyakwe, zilakugwasya kuti ube aamaboneno aalikabotu.

2. Tulalanga-langaanzi muchiiyo eechi?

² Muchiiyo eechi, tulabona kuti nkamboonzi nitweelede kwiiya atala abupolofita buli muBbayibbili akuti niinzi zikonzya kutugwasya kuti tubumvwisisisye. Alubo tulalanga-langa bupolofita bubili mbwaakaamba Daniyele akubona mbubutugwasya lino kuti twabumvwisisya.

NKAMBOONZI NITWIIYA BUPOLOFITA BULI MUBBAYIBBILI?

3. Niinzi nzitweelede kuchita kuti tumvwisisisye bupolofita buli muBbayibbili?

³ Tweelede kukumbila kugwasigwa kuti katuyanda kumvwisisisya bupolofita bwamuBbayibbili. Muchikozyano, atuteedi ulikuya kundawu njutazi pe pesi mweenzinyokwe ngulikweendawe uliizi ndawu eeyo. Mweenzinyokwe ulizi kuti mwabaali akuti mugwagwa umwi awumwi utozya kuli. Zilaantaganana kuti ulabotelwa kuti mweenzinyokwe wazumina kuti mweendaamwi. Munzila iikozyenie, Jehova ulizi kuti twabaali muchiindi eechino nchitulikupona alubo ulizi kuti mugwagwa ngutuli kweendela utozya kuli. Nkinkaako, kuti tumvwisisisye bupolofita buli muBbayibbili, atulibombye, tukumbile Jehova kuti atugwasye.—Dan. 2:28; 2 Pet. 1:19, 20.

4. Nkamboonzi Jehova naakapa kuti bupolofita bulembwe muJwi lyakwe? (Jeremiya 29:11) (Langa chifanikisyo.)

⁴ Mbuli muzyali woonse, Jehova uyanda kuti bana bakwe bazoopone buumi bulikabotu muchiindi chilikunembo. (Bala Jeremiya 29:11.) Pesi kusiyana amuzyali, Jehova ulakonzya kwaamba zintu zizoochitika muchiindi chilikunembo alubo zintu eezyo nga zyazoozuzikizigwa. Jehova wakapa kuti bupolofita bulembwe muJwi lyakwe kuchitila kuti tuzibe zintu ziyandikana kazitanachitika pe. (Is. 46:10) Nkinkaako, bupolofita buli muBbayibbili nchipo chizwa kuli Taateesu wakujulu. Pesi nga ulachita biyeni kuti ube aachoonzyo chakuti bupolofita buli muBbayibbili buzoozuzikizigwa chachoonzyo?

5. Bachikula bayiyaanzi kuli zyakachitikila Max?

⁵ Kuchikolo, bachikula balibbizya kabali aabantu batalilemeki pe Bbayibbili. Nzibaamba anzibachita zipa kuti Bakamboni bachikula bazumbuuzye atala anzibasyoma. Umwi mukwesu uutegwa Max wakaamba kuti, “Nindakachili kuchikolo ndakasaanguna kuzumbuuzya zintu nzindakayiisigwa abazyali bangu atala achikombelo chakasimpe akuti Bbayibbili lyakazulwidwa aaLeza.” Niinzi nzibakachita bazyali bakwe? Max wakaamba kuti, “Bakalibeteme nikuba kuti ndakalizi kuti bakalikataazikene.” Bazyali baMax bakasandula mibuzyo yakwe kababelesya Bbayibbili. Alubo kuli chimwi chintu nchaakachita Max. Wakaamba kuti, “Ndakayiya atala abupolofita bwamuBbayibbili kandili aandikke, alubo ndakabuzya bamwi atala azintu nzindakayiya.” Kwakaba mpinduunzi? Max wakaamba kuti, “Ndakazooba aachoonzyo chakuti Bbayibbili lyakazulwidwa aaLeza.”

6. Niinzi nzweelede kuchita kuti kuzumbuuzya alubo nkamboonzi nweelede kuchita oobo?

⁶ Kuti wasaanguna kuzumbuuzya atala akasimpe kamuBbayibbili mbuli Max, utakataazikani pe. Nikuba oobo, weelede kuchita chimwi chintu. Kuzumbuuzya kuli mbuli ngula. Kuti ngula yalekelelwa, ilakonzya kunyonyoona zintu ziyandikana. Kuti umaninsye kuzumbuuzya weelede kulibuzya kuti, ‘Ndilazisyoma na nzilyaamba Bbayibbili atala abuumi buli kunembo ?’ Kuti kutazisyomi, yiya atala abupolofita buli muBbayibbili bwakazuzikizigwa kale. Kujana wazichita biyeni?

NZITUKONZYA KUCHITA KUTI TWIIYE BUPOLOFITA BWAMUBBAYIBBILI

7. Niinzi nzyaakachita Daniyele kuti amvwisisisye bupolofita? (Daniele 12:10) (Langa chifanikisyo.)

⁷ Daniyele wakatusiila chikozyano chibotu chakwiiya bupolofita buli muBbayibbili. Wakali aamakanze aalikabotu chiindi naakali kwiiya atala abupolofita oobu nkaambo wakali kuyanda kuziba kasimpe. Daniyele wakali kulibombya, wakalizi kuti Jehova ulabagwasya aabo bayanda kumuziba akupona kweendelana amilawu yakwe kuti bamvwisisisye bupolofita. (Dan. 2:27, 28; bala Daniele 12:10.) Daniyele wakatondeezya kuti wakali kulibombya kwiinda mukukumbila Jehova kuti amugwasye. (Dan. 2:18) Alubo Daniyele wakali kuyanduulisisya. Wakayanduulisisya muMagwalo aakali kujanika muchiindi nchaakapona. (Jer. 25:11, 12; Dan. 9:2) Nga ulamutobelezya biyeni Daniyele?

8. Nkamboonzi bamwi nibatasyomi kuti bupolofita buli muBbayibbili buzoozuzikizigwa, pesi iswe tweelede kuchitaanzi?

⁸ Langa-langa makanze aako. Ulikwiiya atala abupolofita buli muBbayibbili kulaamakanze aakuziba kasimpe na? Kuti kakuli boobo, Jehova ulakugwasya. (Johane 4:23, 24; 14:16, 17) Niinzi chinga chapa kuti bamwi bayiye atala abupolofita? Bamwi bachita oobo kabayanda kujana bukamboni bwakuti Bbayibbili teelyakazulwidwa aaLeza pe. Kuti bachita oobo, ngababonaanga balakonzya kulibikkila milawu iili atala azintu zilikabotu azitali kabotu akuti bapone munzila njibayanda. Pesi iswe tuchita oobo katuli aamakanze aalikabotu. Mukuyungizya, tweelede kuba aabumwi buntu buyandikana kuchitila kuti tumvwisisisye bupolofita buli muBbayibbili.

9. Mbuubuli buntu buyandikana kuti tumvwisisisye kasimpe kamuBbayibbili? Pandulula.

⁹ Libombye. Jehova usyomezya kugwasya aabo balibombya. (Jak. 4:6) Nkinkaako, tweelede kukomba katukumbila kuti atugwasye kumvwisisisya bupolofita buli muBbayibbili. Alubo tweelede kuziba kuti kuli nzila iimwi njabelesya kutupa chakulya chamubukombi aachiindi cheelede kuchitila kuti tumvwisisisye kasimpe kamuBbayibbili. (Lk. 12:42) Jehova nguLeza uubambikene, nkinkaako zili aamutwe kuti abelesye nzila iimwi kuti atugwasye kumvwisisisya kasimpe kamuBbayibbili.—1 Kor. 14:33; Ef. 4:4-6.

10. Wayiyaanzi kuzwa kuchikozyano cha-Esther?

¹⁰ Yanduulisisya. Saanguna kwiiya atala abupolofita mbuyandisya. Eezi nzizyo nzyaakachita umwi muchizi uutegwa Esther. Wakali kuyandisya bupolofita bwaambuula atala akuza kwaMesiya. Esther wakaamba kuti, “Nindakali aminyaka iili 15, ndakasaanguna kuyanduula bukamboni bwakuti nichoonzyo na kuti bupolofita oobu bwakalembwa Mesiya katanasika.” Nzyaakayiya kuzwa mumabbuku aakupeta aakuLwizi Lufwide zyakamugwasya kuti abe aachoonzyo chakuti bukamboni mbwaakajana mbwachoonzyo. Wakaamba kuti, “Bumwi bupolofita bwakalembwa Kkristu katanasika, nkinkaako eezi zitondeezya kuti bupolofita oobu bwakazwa kuli Leza.” Alubo Esther wakaamba kuti, “Ndakabala atala ankani eeyi kwaziindi zyiingi kuchitila kuti ndiimvwisisisye.” Pesi lino ulikubotelwa akaambo kakuti wakabeleka changuzu kuti amvwisisisye bupolofita oobu. Naakamana kuyanduulisisya atala abupolofita bwiingi buli muBbayibbili, Esther wakaamba kuti, “Lino ndalibonena kuti Bbayibbili lyaamba kasimpe.”

11. Tugwasigwa biyeni akuliyandwiida bukamboni butondeezya kuti Bbayibbili lilaamakani aakasimpe?

¹¹ Kuti twabona mbubwakazuzikizigwa bumwi bupolofita buli muJwi lyaLeza, zilatugwasya kuti tusyome Jehova amoyo woonse akuti tusyome zintu zyoonse nzyatubuzya. Mukuyungizya, bupolofita buli muBbayibbili butugwasya kuti tukkale katuli aabulangilizi bwabuumi bulikunembo nikuba kuti twaswaana masunko lino. Mubufwiifwi, atulange-lange bupolofita bubili bwakalembwa aaDaniyele bulikuzuzikizigwa lino. Kumvwisisisya bupolofita oobu kutugwasya kuti tusale munzila yabusongo.

NKAMBOONZI NWEELEDE KUZIBA ZITUTA ZYABUTALE BUVWELEENE AABULONGO?

12. Zituta ‘zyabutale buvwelene abulongo butete’ zyiimininaanzi? (Daniele 2:41-43)

¹² Bala Daniele 2:41-43. Muchiloto Daniyele nchaakapandulwida Mwaami Nebbukkadinezari, zituta zyachibumbwa nchaakabona Mwaami zyakapangidwe “abutale buvwelene abulongo butete.” Kuti twalanga-langa bupolofita oobu abumwi buli mubbuku lyaDaniyele aChiyubunuzyo, tubona kuti zituta eezyo zyiiminina Britain a-America, mfulumende iilaanguzu loko mazubaano. Kaliikwaamba mfulumende eeyi iilaanguzu loko, Daniyele wakaamba kuti “bwami oobo bunooli buyumu aciindi nciconya bunooli buteteete mbuli bulongo bupwaika buyo.” Nkamboonzi mfulumende eeyi nitasimide pe? Nkaambo bantu bayimininwa aabulongo butete bapa kuti bwaami oobu butasimi pe mbuli nsimbi.b

13. Twiiyaanzi kuzwa kubupolofita bwakapandululwa aaDaniyele?

¹³ Twiiya zintu zyiingi kuzwa kuzintu zyakapandululwa aaDaniyele atala achibumbwa ikapati zituta zyacho. Chakusaanguna, mfulumende yaBritain a-America yakatondeezya kuti ilaanguzu. Muchikozyano, mfulumende eeyi yakazunda muNkondo Yanyika Yoonse Yakusaanguna amuNkondo Yabili Yanyika Yoonse. Nikuba oobo, mfulumende eeyi tayisimide pe alubo iyooyinkilila kunembo kayili oobo akaambo kakuti bantu mbiyendelezya balikukazyaniaayo. Chachibili, mfulumende yaBritain a-America njiyo yakumamanino ilaanguzu itanoyendelezye kusikila Bwaami bwaLeza buzoonyonyoone mfulumende zyabantu zyoonse. Nikuba kuti chimwi chiindi zimwi zisi ngazyeezya kukazyaniaayo pesi tazizooyizundi pe. Tulizizi eezi akaambo kakuti “bbwe,” eelyo lyiiminina Bwaami bwaLeza lizoopwaya zituta zyachibumbwa zyiiminina mfulumende yaBritain a-America—Dan. 2:34, 35, 44, 45.

14. Kumvwisisisya bupolofita buli atala azituta zyabutale buvweleene aabulongo butete kutugwasya biyeni kuti tusale munzila iilikabotu?

¹⁴ Ulasyoma na kuti bupolofita bwakapandululwa aaDaniyele buli atala azituta zyabutale buvweleene aabulongo butete mbwachoonzyo? Kuti kakuli boobo, zilaboneka muzintu nzusala mubuumi bwako. Tumaninsyi chiindi kuli kuyanduula zintu zyiingi zyakumubili nkaambo zyaba aafwiifwi kunyonyoonwa. (Lk. 12:16-21; 1 Joh. 2:15-17) Kumvwisisisya bupolofita oobu kulakugwasya kuti ubone mbuuyandikana mulimu wakukambawuka awakuyiisya bantu. (Mt. 6:33; 28:18-20) Nwaamana kubala bupolofita oobu akuyanduulisisya, libuzye kuti, ‘Zintu nzindisala zilatondeezya na kuti ndilasyoma kuti Bwaami bwaLeza bwaba aafwiifwi kunyonyoona mfulumende zyabantu zyoonse?’

NKAMBOONZI NWEELEDE KUZIBA “MWAAMI WAKUNYIKA” ‘AMWAAMI WAKUMUSANZA’?

15. Ngwani wiiminina “mwaami wakunyika” ‘amwaami wakumusanza’ mazubaano? (Daniele 11:40)

¹⁵ Bala Daniele 11:40. Daniele chaandaano 11 chaambuula atala abaami babili naakuti mfulumende zilikulwanina kweendelezya nyika yoonse. Kuti twalanga-langa bupolofita oobu abumwi buli muBbayibbili, tubona kuti “mwaami wakunyika” niRussia anyika nziijisinaayo alubo “mwaami wakumusanza” niBritain a-America.c

16. “Mwaami wakunyika” ulikubajata biyeni bakombi baLeza?

¹⁶ Bakombi baLeza beendelezegwa ‘aamwaami wakunyika’ balikupenzegwa amwaami ooyu. Bamwi Bakamboni balikuumwa akubikkwa mujele akaambo kalusyomo lwabo. Kwiinda kuti bakwesu aaba bayoowe, zintu zilikuchitwa ‘aamwaami wakunyika’ zilikusimya lusyomo lwabo. Nkamboonzi? Akaambo kakuti bakwesu aaba balizi kuti kupenzegwa kwabakombi baLeza kuzuzikizya bupolofita bwakaambwa aDaniyele.d (Dan. 11:41) Kuziba makani aaya kutugwasya kuti tukkale katuli aabulangilizi akuti tusyomeke kuli Jehova.

17. Mbuubuli buyumu-yumu buswaanwa aabakombi baLeza bayendelezegwa ‘aamwaami wakumusanza’?

¹⁷ Chiindi, ‘mwaami wakumusanza’ anguwe wakali kulwana bakombi baJehova. Muchikozyano, muNkondo Yanyika Yoonse Yakusaanguna amuNkondo Yabili Yanyika Yoonse, bakombima biingi bakasungwa akaambo kakutatola lubazu mulizyapolitikisi alubo bamwi bana baBakamboni bakali kwaandwa kuchikolo akaambo kankani eeyi. Muminyaka miche yayinda, kusyomeka kwabakombi baJehova beendelezegwa aaMwaami wakumusaanza kulikusunkwa muli zimwi nzila. Muchikozyano, nikuchitwa zyakuvoota, muKkristu ulakonzya kusunkwa kuti asapote iimwi paati naakuti alombozye kuti kaansinga kwawina uumwi ngwabonaanga uleendelezya kabotu. Ulakonzya kutayinka kukuvoota pesi mumizeezo amumoyo wakwe nga ulikutola lubazu. Kulayandikana kuti tukkale katutatoli lubazu mulizyapolitikisi kwiinda muzintu nzituchita anzituyeeya.—Joh. 15:18, 19; 18:36.

18. Kutamvwanana kuli aakati ‘kamwaami wakunyika’ ‘amwaami wakumusanza’ kupa kuti tuchite biyeni? (Langa chifanikisyo.)

¹⁸ Bantu batasyomi bupolofita bwamuBbayibbili balakataazikana zyiindilide chiindi nibabona “mwami wakumusanza” ‘katonkana’ ‘amwami wakunyika.’ (Dan. 11:40) Baami aaba kabali babili bali azilwanisyo zikonzya kujeya zintu zyoonse zipona zili aanyika. Pesi tulizi kuti Jehova tazoozilekeli pe eezi kuti zichitike. (Is. 45:18) Kwiinda kuti zitukataazye, kutamvwanana ‘kwamwaami wakunyika’ ‘awakumusanza’ kusimya lusyomo lwesu. Kutamvwanana ooku kutondeezya kuti nyika eeyi yaba afwiifwi kunyonyoonwa.

YINKILILA KUNEMBO KWIIYA ATALA ABUPOLOFITA

19. Niinzi nzitweelede kuziba atala abupolofita buli muBbayibbili?

¹⁹ Tatuzi pe kuti bumwi bupolofita buli muBbayibbili buzoozuzikizigwa biyeni. Nikuba mupolofita Daniyele taakali kuzimvwisisisya pe zyoonse nzyaakali kulemba. (Dan. 12:8, 9) Pesi eezi tazyaambi kuti bupolofita oobo tabukazuzikizigwi pe. Tulaachoonzyo chakuti Jehova uyootugwasya kuti tumvwisisisye zintu muchiindi cheelede mbuli mbaakachita chiindi.—Am. 3:7.

20. Mbuubuli bupolofita buli muBbayibbili buzoozuzikizigwa lino-lino alubo niinzi nzitweelede kuzumanana kuchita?

²⁰ Kuzoowambilizigwa atala ‘aluumuno akulyiiba.’ (1 Tes. 5:3) Mpawo bazyapolitikisi bazoobukila chikombelo chakubeja alubo bazoochinyonyoona. (Chi. 16:16, 17) Kuzwa waawo, bazoolwana bakombi baLeza. (Ezk. 38:18, 19) Zintu eezi zizoopa kuti kube nkondo yamamanino, nkondo ya-Armagedoni. (Chi. 16:14, 16) Tulaachoonzyo chakuti zintu eezi zizoochitika lino-lino. Nkinkaako, atuzumanane kumulumba Taateesu wakujulu kwiinda mukwiinkilila kunembo kwiiya atala abupolofita bwamuBbayibbili akugwasya bamwi kuti ambabo bayiye atala abupolofita oobu.