Tulakonzya Kusyoma Nzilyaamba Bbayibbili Atala Achibotu Achibi

Tatukonzyi pe kuziba kuti zintu ziyootweendela biyeni kuti twasala kweendelana ambutulimvwa naakuti mbubalimvwa bamwi. Bbayibbili litondeezya kuti nkamboonzi nikuli oobu alubo litubuzya zyiingi. Lilatugwasya kuti tukonzye kusiyanisya chibotu achibi akuti tubotelwe akupona buumi bulaampindu.

TUYANDA KUZULWIDWA AALEZA

MuBbayibbili, Jehovaa Leza wakaamba kuti makanze aakwe akali aakuti bantu bazulwidwe aanguwe kutali kuti balyeendelezye. (Jeremiya 10:23) Eezi nzizyo zyakapa kuti atupe malayilile aazwa muBbayibbili aali atala akusiyanisya chibotu achibi. Ulabayanda bantu alubo uyanda kuti bataswaani mapenzi ayeetwa akaambo kakutasala kabotu. (Deuteronomo 5:29; 1 Johane 4:8) Mukuyungizya, mbukunga Mulengi wesu ulaabusongo aluzibo lutugwasya kuti tukonzye kusiyanisya chibotu achibi. (Intembauzyo 100:3; 104:24) Pesi Leza tabasungilizyi pe bantu kuti bapone kweendelana azyeelelo zyakwe.

Jehova wakapede mwaalumi amwanakazi bakusaanguna, Adamu aEva zintu zyoonse zyakali kukonzya kupa kuti babotelwe. (Matalikilo 1:28, 29; 2:8, 15) Alubo wakabapede milawu myuuba njibakeelede kutobelezya. Pesi wakabapa lwaangunuko lwakulisalila kuti balayanda na kuswiilila milawu eeyi naakuti pe. (Matalikilo 2:9, 16, 17) Chuusisya nchakuti, Adamu aEva bakasala kupona mbuli mbubayanda kutali kutobelezya milawu yaLeza. (Matalikilo 3:6) Eezi zyakeeta mpinduunzi? Bantu balikubotelwa na akaambo kakusala kuchita nzibayanda? Peepe. Zilikuchitika kuzwa chiindi zitondeezya kuti kutaswiilila milawu yaLeza takweeti luumuno pe akubotelwa.—Mukambausi 8:9.

Bbayibbili litupa malayilile aakonzya kutugwasya kuti tusale kabotu kazitakwe ndaba kuti tuzwa kuli. (2 Timoti 3:16, 17; langa kabbokesi katii “Bbuku Lyabantu Boonse.”) Amubone Bbayibbili mbulikonzya kumugwasya.

Yiya zyiingi atala kuti nkamboonzi Bbayibbili nilyaambwa kuti ‘ndijwi lyaLeza.’—1 Batesalonikka 2:13. Yebela vidiyo itii Ngwani Wakalemba Bbayibbele? iijanika aa-jw.org.

NKAMBOONZI BAMWI NIBAYEEYA KUTI BBAYIBBILI TALIKONZYI PE KUBAGWASYA?

Bamwi baamba kuti Bbayibbili talikonzyi pe kubagwasya kusiyanisya chibotu achibi. Balakonzya kwaamba zintu zitobela.

Nzibaamba bamwi: “Bbayibbili lilakazyania.”

Kasimpe: Amwi mavesi aamuBbayibbili aabonekaanga alakazyania, tulakonzya kubona kuti taakazyani pe kuti twalanga-langa makani aazyungulukidwe, akuti akalembelwa kuli amuzeezo ngwaakalaawo sikulemba atumwi twaambo.

Kuti ubone zimwi zikozyano, bala chiiyo chiti “Sena Twaambo Tuli mu Bbaibbele Tulakazyanya?” chijanika aajw.org.

Nzibaamba bamwi: “Bantu balyaamba kuti babala Bbayibbili bachita zibi zipati loko eezi zitondeezya kuti Bbayibbili taligwasyi pe.”

Kasimpe: Tatweelede kusola Bbayibbili pe akaambo kamichito yabantu bataponi kweendelana anzilyaamba. Bbayibbili lyakaambilizya kuti bantu biingi kuswaanizya abapati bazikombelo bakali kuyookachilwa kupona kweendelana anzilyaamba. Alubo litubuzya kuti eezi ziyoopa kuti njiisyo zyamuBbayibbili ‘zyaambuulwe bubi.’—2 Petro 2:1, 2.

Kuti ubone chimwi chikozyano chitondeezya kuti bapati bazikombelo biingi tabachitobelezyi nzilyaamba Bbayibbili, bala chiiyo chiti “Sena Bukombi Makwebo?” chijanika aa-jw.org.

Nzibaamba bamwi: “Bantu batobelezya zyaambwa aaBbayibbili tabakwe ndaba pe abamwi bantu.”

Kasimpe: Bbayibbili liyiisya kuti bantu beelede kulemekana. Pesi likasya. . .

kulibona kusumpukide kwiinda bamwi. —Bafilipi 2:3.
kutalemeka bantu balaamaboneno aasiyene anduwe naakuti basyoma zintu zisiyene anzusyoma.—1 Petro 2:17.
kusungilizya bamwi kuti babe aamaboneno aali mbuli aako.—Mateyo 10:14.

Bbayibbili litondeezya kuti Leza ujata bantu munzila iilikabotu alubo uyanda kuti bantu batobelezye chikozyano chakwe.—Baroma 9:14.

Kuti ujane makani miingi, bala chiiyo chiti “Bbaibbele Mbolikonzya Kutugwasya Kutabeteka Bamwi” chijanika aa-jw.org.

BBAYIBBILI LITUBUZYA ATALA AZINTU LEZA NZYAYANDA KUTI TUCHITE

Bbayibbili litubuzya makani aachoonzyo atala aJehova mbajata bantu. Makani aajanika muBbayibbili atugwasya kuti tuzibe maboneno aaLeza atala achibotu achibi, zintu zigwasya, azintu zitunjizya mumapenzi. (Intembauzyo 19:7, 11) Malayilile ngitwiiya alagwasya muzyiimo zyoonse alubo atugwasya kuti tukonzye kusala kabotu mubuumi.

Muchikozyano, amuyeeye atala amalayilile aajanika mulugwalo lwa Tusimpi 13:20: “Ooyo weenda abasongo ulaba musongo, pele ooyo uuyanzana abafwubafwuba ulajana mapenzi.” Nikuba kuti malayilile aaya ngachiindi pesi achibeleka mazubaano. MuBbayibbili muzwide malayilile aali oobu aakonzya kutugwasya.—Langa kabbokesi kati, “Bbayibbili Ndibbuku Lilaabusongo Bugwasya Chiindi Choonse.”

Amwi ulakonzya kulibuzya kuti, ‘Niinzi chipa kuti ndibe aachoonzyo chakuti malayilile aamuBbayibbili achibeleka nikuba mazubaano?’ Muchiiyo chitobela, tuyoolanga-langa zyakachitikila bamwi mubuumi.

a Jehova ndizina lyaLeza.—Intembauzyo 83:18.

MALAYILILE AAMUBBAYIBBILI ACHIGWASYA

Nikuba kuti Bbayibbili lyakamana kulembwa muminyaka iisika ku 2000 yayinda pesi lichigwasya nikuba mazubaano. Nzibayanda bantu tazinachincha pe, bachiyanda kukkutisikana akubotelwa mubuumi. (Mukambausi 1:9) Malayilile aazwa muBbayibbili alakonzya kutugwasya kuti tukkutisikane akuti tubotelwe mubuumi.

Kusyomeka

“Tuyanda kuti katusyomeka muzintu zyoonse.”—Mahebberu 13:18.
“Ooyo uubba, atachibbi lubo pe, pesi abeleke changuzu.”—Ba-efeso 4:28.

Kumvwanana aabamwi

“Umwi awumwi ayinkilile kunembo kuyanduula zintu zigwasya umwi, kutali zintu zigwasya nguwe kupela.”—1 Bakkorinte 10:24.
“Amwiinkilile kunembo kutondeezyania moyo mulamfu alubo kamulekelelana amoyo woonse.”—Bakkolose 3:13.

Kusala kabotu

“Muntu mufwubafwuba ulaasyoma makani oonse, pele ooyo uucenjede ulakkala ansi kuyeeya ntaamu zyakwe.”—Tusimpi 14:15.
“Muntu uucenjede abona mapenzi ulayuba, pele aabo batakwe maano balaunka nkukonya ooko, aboobo balapenga.”—Tusimpi 22:3.