Kubelekela Jehova Kupa Kuti Ukkutisikane

MBUYAKABEDE MPULI YESU

Ndakazyalwa mu 1934, bazyali bangu bakalonga kuzwa kuSwitzerland kabaya kuTimmins dolopo lichitwa zyakumayina mu-Ontario kuCanada. Kuma 1939, baama bakasaanguna kubala magazini yaNgaziyakulinda akunjila miswaangano yaBakamboni baJehova. Baama bakali kutweetela mamagazini aaya tubana toonse. Kakutanayinda chiindi, baama bakaba Kamboni waJehova.

Ndeende taakabotelwa pe baama nibakaba Kamboni. Pesi baama bakakayanda kasimpe alubo bakakakatila kulinkako. Baama bakayinkilila kunembo kabakakatide mukasimpe nikuba mulimu waBakamboni baJehova nwaakakasigwa kuma 1940 kuCanada. Baama bakali kumutondeezya luzyalo alubo bakali kumulemeka Ndeende chiindi choonse nikuba kuti wakali kubapopotela. Chikozyano chabaama chakatugwasya toonse tubana kuti tutambule kasimpe. Chibotezya nchakuti mukuya kwachiindi, Ndeende wakazoochincha alubo wakazoosaanguna kutujata kabotu.

MBUNDAKASAANGUNA MULIMU WACHIINDI CHOONSE

Mu 1950 lyachilimo, ndakanjila muswaangano waTheocracy’s Increase muNew York City. Ndakasungwaazigwa kuchita zyiingi mumulimu waJehova nindakazibana aabakwesu abachizi bamunyika yoonse anindakamvwa zintu zyakabachitikila bantu bakagilajuweta kuchikolo chaGiliyadi. Ndakakanza kuti ndinjile mumulimu wachiindi choonse. Nindakabweeda kung’anda, ndakalembela kuti ndibe payona wachiindi choonse. Bakumutabi wakuCanada bakandisandula kabalikundibuzya kuti ndisaangune kubbabbatizigwa. Ndakabbabbatizigwa mu 1 October 1950. Nikwakayinda mweezi ndakaba payona wachiindi choonse alubo ndakabuzigwa kuti ndikakusaangunine kubelekela kuKapuskasing. Dolopo eeli lyakali kule loko ankundakali kukkala chiindi eecho.

Kulwaaka mu 1951, bakuwofesi yamutabi bakakumbila Bakamboni bakali kwaambuula chiFrench kuti bayinke mundawu zyakali kwaambuulwa chiFrench kuQuebec. Kwakali kuyandikana basikupupuluIa biingi. Ndakakomena kandaambuula Chikuwa achiFrench nkinkaako, ndakazumina kwiinka alubo ndakabuzigwa kuti ndikabelekele kuRouyn. Taakwe muntu ngundakazi pe ooko. Nchindakalaacho kupela yakali adilesi mbuli mbundaamba kumasaangunino. Pesi zintu zyakeenda kabotu. Ime aMarcel twakamvwanana loko alubo ndakabelekela kuQuebec kwaminyaka iili 4 kandili payona uuyandikana.

KUNJILA CHIKOLO CHAGILIYADI AKUCHINCHA NZITWAKALI TWABAMBA

Nindakali muQuebec ndakakumbilwa kuti ndikanjile kkilasi yachi 26 yachikolo chaGiliyadi kuSouth Lansing kuNew York. Ndakagilajuweta mu 12 February 1956 alubo ndakakumbilwa kuti ndikabelekele kuliimwi nyika yakuWest Africa lino iitegwa Ghana.b Pesi kanditanayinka ooko, ndakeelede kuti ndibweede kuCanada kwamviki ziche nindakachili kulindila mapepa.

Ndakalindila mapepa aangu kwamyeezi iili 7 muToronto. Muchiindi eechi, ndakali kukkala aampuli yaMukwesu Cripps alubo ndakali kumumenena mate mwanaabo musimbi Sheila. Twakayandana. Chiindi nindakali kuyanda kuti tubambe zyamuchado, mapepa aangu akaba kabotu. Ime aSheila twakayikombela nkani eeyi. Alubo twakasala kuti ime ndibweede kumulimu kuGhana akuti katulembelana magwalo kuchitila kuti tubone kuti tuzoochada lili. Kusala ooku teekwakali kuuba pe, pesi twakazoobona kuti zintu nzitwakasala zyakali kabotu.

Nikwakayinda mweezi kandili kweenda aachitima, bwaato andeke ndakasika ku-Accra, Ghana. Ndakakumbilwa kuti ndibeleke kandili mulangizi wabbooma. Mulimu ooyu wakali kuswaanizya kweendeenda muGhana yoonse kuyoosika ku-Ivory Coast (lino yiitwa kuti Côte d’Ivoire) akuTogoland (lino yiitwa kuti Togo.) Chiindi chiingi ndakali kweenda aamoota njindakapedwe aawofesi yamutabi kandili aandikke. Kuswaya bakwesu abachizi kwakali kundibotezya loko.

Kumamanino aamviki, ndakali aazyakuchita kumiswaangano yabbazu. Teekwakalikwe Maanda Aachitilwa Miswaangano Mipati. Nkinkaako, bakwesu bakali kuyaka zisanza akuzivumba aabwizu zyakuti bantu batapyi zuba. Akaambo kakuti teekwakalikwe mafiliji pe, bakwesu bakali kuza aabanyama akubajeela mpawaawo aakali kuchitilwa muswaangano kuchitila kuti bantu bakali kunjila muswaangano balye.

Kuli zimwi zintu zyakachitika zinoneezya loko kumiswaangano eeyi. Umwi mukwesu mumishinali uutegwa Herb Jennings,c naakali kupa nkani yakwe, ng’ombe yakachija kuzwa nkuzyakali kujeelwa, yakayinda aakakkede baswiilizi kiiya kuchibumbili. Mukwesu Herb naakayimikila kwaambuula ayilayo ng’ombe yakakubula kwakuya. Bakwesu bali 4 bakayibinga alubo baswiilizi bakali kwiiwanda kabali kukambilila maboko niyakali kubweedezegwa nkuzyakali kujeelwa.

Aakati kamviki, ndakali kutondeezya bantu bamumyuunzi bakali kukkala aafwiifwi chisobano chiti, The New World Society in Action. Kuti boonse bakonzye kuchibona chisobano eechi, ndakali kusunga lembo lituba aazisamu zibili naakuti misamu iibili. Bantu aabo bakachiyanda chisobano eechi. Biingi babo kakali kakusaanguna kubona chisobano mubuumi bwabo. Bakakambilila kapati nibakali kubona bantu kabali kubbabbatizigwa. Chisobano eechi chakagwasya bantu aaba kuti babone kuti Bakamboni baJehova nimbunga iijisini munyika yoonse.

Kandili ndaba aaminyaka iisika ku 2 mu-Africa, ndakabotelwa nindakanjila muswaangano wazisi kuNew York mu 1958. Ndakabotelwa loko kubona Sheila wakazwa kuQuebec ooko nkwaakali kubeleka kali payona uuyandikana. Aachiindi eecho, twakali kulembelana magwalo pesi ndakamubuzya kuti ulayanda na kuti tuchade mpawo wakazumina. Ndakalembela Mukwesu Knorrd lugwalo kandikumbila kuti Sheila anjile chikolo chaGiliyadi kuchitila kuti azookonzye kuza ku-Africa. Mukwesu Knorr wakazumina. Sheila wakasika kuGhana. Twakachadila ku-Accra mu 3 October 1959. Twakabona Jehova mbaakali kutulongezya akaambo kakuti twakasala kumubikka mubusena bwakusaanguna mubuumi bwesu.

KUBELEKAAMWI KUCAMEROON

Mu 1961 twakakumbilwa kuti tukabekele kuCameroon. Bakwesu bakandikumbila kuti ndikagwasilizye kumutabi ooyu mupya. Ndakali aazyiingi zyakuchita alubo ndakakumbilwa kuti ndibe mulangizi wamutabi ooyu. Nzyiingi nzindakeelede kwiiya. Mpawo mu 1965 twakazooziba kuti Sheila wakali wabaada. Kumasaangunino kwakali kutuyumina kuti tuyanda kuba bazyali pesi kumamanino twakazoozitambuula. Katuchigambide amukuli ooyu mupya ngutwakali twabaawo anitwakali kulibambila kuti tubweede kuCanada, kuti tukaakuule ziyandikana zyamwana, kuli chimwi chintu chakachitika chakatuchisa loko.

Sheila wakatakanisya. Dokotela wakatubuzya kuti mwana wesu wakali mulombe. Eezi zilaaminyaka ili 50 yayiinda kazichitikide pesi tatuzilubi pe. Nikuba kuti zyakachitika zyakatuchisa loko pesi twakasala kuti tukkale katuli kuCameroon nkaambo twakali kuyanda kugwasya bakwesu abachizi

Bakwesu muCameroon bakali kukkala kabapenzegwa akaambo kakuti teebakali kutola lubazu mulizyapolitikisi. Chiimo chakayungizya kubija nikwakali kuvotelwa beendelezi. Kuli chimwi chintu chiyoosya loko chakachitika mu 13 May 1970, mulimu waBakamboni baJehova wakayimikizigwa muCameroon. Mfulumende yakabweeza mutabi ooyu wakachili mupya mputwakakkala kwamyeezi iili 5 luzutu. Kakutanakkwana mviki, mamishinali boonse kuswaanizya ime aSheila bakaandwa muCameroon. Kwakali kuyumu loko kusiya bakwesu abachizi nkaambo twakali kubayanda alubo twakali kukataazikana kuti niinzi zyakali kuyoosyala kazilikubachitikila.

Twakakkala kumutabi wakuFrance kwamyeezi ili 6. Kandili nkuko ndakayeezya mpundigolela kuti ndibe achoonzyo chakuti bakwesu bakuCameroon balikulanganisigwa. MuDecember mumunyaka nguyooyo, ndakabuzigwa kuti ndikabelekele kumutabi wakuNigeria wakasaanguna kulangania mulimu wamuCameroon. Bakwesu abachizi bakuNigeria bakatutambuula kabotu alubo twakabotelwa loko kubelekaamwi ambabo.

NZITWAKEELEDE KUSALA

Mu 1973 kuli nchitwakeelede kusala. Kusala ooku tekwakali kuuba pe. Sheila wakali kuchiswa bulwazi bubi. Nitwakali kumuswaangano wabboma kuNew York, Sheila wakalila, wakandibuzya kuti: “Tandichikonzyi pe kwiinkilila kunembo amulimu ooyu, ndakatala alubo ndachiswa kwachiindi chilamfu.” Sheila wakabeleka andime kuWest Africa kwaminyaka yiinda ku 14. Ndakalikulidunda akaambo kakusyomeka kwamwanakazi wangu, pesi kuli zintu nzitwakeelede kuchincha. Nitwakazwa kwaambuzyania atala achiimo eechi akukomba kwachiindi chilamfu, twakasala kuti tubweede kuCanada kuchitila kuti akakusilikwe. Kusiya mulimu ooyu wabumishinali amulimu wachiindi choonse kwakali kuyumu loko alubo taakwe majwi pe aakonzya kupandulula mbutwakamvwa.

Nitwakasika muCanada, ndakajana mulimu. Ndakabeleka aamweenzuma ngundakazibanaawe kwachiindi chilamfu wakali kuuzya moota mudolopo lyaToronto nkwiili kunyika. Twakalenta ng’anda mpawo twakawula zintu zyamung’anda zyakali zyabelesegwa kale alubo twakasaanguna kupona buumi bupya katutakwe zikwelete. Twakali kuyanda kupona buumi buuba katulangilila kuti bumwi buzuba tuzoobweeda lubo mumulimu wachiindi choonse. Eezi nzizyo zyakazoochitika. Zyakafwambaana kuchitika katutayeeyeli pe.

Mugibelo amugibelo ndakalipeda kuyoogwasilizya kuNg’anda Yakuchitila Miswaangano Mipati yakali kuyakwa muNorval ku-Ontario. Aachiindi eechi, ndakakumbilwa kuti ndibe mulangizi wamayake aaya. Sheila wakali wasima alubo wakazumina mulimu ooyu mupya. Twakalongela kwakali mayake aaya muJune 1974. Twakabotelwa loko kubweeda lubo mumulimu wachiindi choonse.

Sheila wakasima zyakupona. Minyaka iibili yakatobela twakazumina kuyoobeleka mumulimu wabbazu. Bbazu eelyo lyakali kuManitoba muchilikiti chili muCanada. Muchiindi champeyo kubusena ooko kutontola loko zyakuti ngakwaba zigodo zyamaanzi. Nikuba oobo, bakwesu abachizi bakatutambuula munzila iilikabotu. Twakabona kuti tazikwe ndaba pe kuti ulikubelekela Jehova koli kuli pesi chiyandikana nchakuti ulakonzya kubelekela Jehova kufwumbwa nkubede.

CHIIYO CHIYANDIKANA NCHINDAKAJANA

Nikwakayinda minyaka myiingi katuli mumulimu wabbazu, mu 1978 twakatambwa kuti tukabelekele kuBbeteli yaku-Canada. Kakutanayinda chiindi chilamfu, ndakayiya chimwi chiiyo chiyandikana munzila iichisa. Ndakakumbilwa kuti ndipe nkani ya-awa ahafu muchiFrench kumuswaangano uuyandikana kuMontreal. Chuusisya nchakuti, nkani yangu ndakayipa munzila yakatabasika aamoyo baswiilizi alubo mukwesu wamuDipatimenti yaMulimu wakandipa lulayo atala ankani eeyi. Kuzwa waawo, ndakabona kuti ndakeelede kuzibona chiindi kuti tandikwe chipo pe chakupa nkani, pesi teendakalutambula munzila iilikabotu pe lulayo. Nitwakali kwaambuula taakwe wakayanda kuswiilila uumwi pe. Alubo twakapambana nkaambo ndakayeeya kuti wakali kulangisisya zintu zitalikabotu kupela nzindakachita kwiinda kuti andilumbayizye atala azintu zibotu nzindakachita. Ime mpundakapambanisya mpakuti, ndakalanga nzila njindakapegwaayo lulayo amuntu wakandipa lulayo oolu.

Nikwakayinda mazuba mache, umwi mukwesu wamuKkomiti yaMutabi wakandiita kuti twaambuule nkani eeyi. Ndakazumina kuti tendakalutambula munzila iilikabotu pe lulayo. Ndakalisola. Kuzwa waawo, ndakaambuula aamukwesu wakandipede lulayo kuti andilekelele. Wakandilekelela. Kuzwa kuli eezi zyakachitika, ndakayiya chiiyo chakuti ndeelede kulibombya alubo tandizoozilubi pe eezyi. (Tus. 16:18) Ndikkala kandikomba kuli Jehova kuti andigwasye kuti ndibe muntu uulibombya alubo taakwe mpunditazookake lulayo pe.

Ndaba aaminyaka yiinda ku 40 kandilikubelekela aaBbeteli yamu-Canada alubo kuzwa mu 1985 ndali kubeleka kandili muKkomiti yaMutabi. MuFebruary 2021, muyandwa wangu Sheila wakoona mulufu. Ndilikumuyeeya loko alubo ime ndilikuchiswa-chiswa. Kubelekela Jehova kupa kuti ndikkale kandijisikini alubo ndilikubotelwa ‘nkaambo tandili kwaabona mbaalikwiinda mazuba.’ (Muk. 5:20) Nikuba kuti ndakaswaana buyumu-yumu mubuumi pesi tabukonzyi pe kweezyanizigwa aakubotelwa nkundakajana. Kubikka Jehova mubusena bwakusaanguna akubeleka mulimu wachiindi choonse kwaminyaka iili 70 kwakapa kuti ndijane zilongezyo zyiingi. Ndikombela kuti bakwesu abachizi bachiniini ambabo babikke Jehova mubusena bwakusaanguna nkaambo ndili aachoonzyo chakuti bazoojana zilongezyo zyiingi alubo taakwe uumbi pe mulimu ngubakonzya kuchita wiinda kubelekela Jehova.