“Nkamboonzi Leza Naatakanjilila?”
“NDIKKALA KANDILIBUZYA KUTI: NKAMBOONZI LEZA NAATAKANJILILA?”— Pope Benedict XVI, wakabuzya mubuzyo ooyo chiindi naakaswayide jele lili kuAuschwitz, kuPoland.
CHIINDI NIKUCHITIKA MAPENZI NGAWALIBUZYA NA KUTI, NKAMBOONZI LEZA NAATAKANJILILA? MUBUUMI BWAKO, KULI CHIMWI CHINTU NCHWAAKASWAANA NA CHAKAPA KUTI ULIBUZYE KUTI LEZA ULAANDABA NA ANDUWE?
Amwi ulimvwa mbuuli mbaakali kulimvwa Sheila ukkala kuUnited States. Wakakomenena mumpuli yakali kuyandisya zintu zyabukombi pesi wakaamba kuti: “Kuzwa kandili muniini ndakali kuyanda kukomba Leza nkaambo nguwe wakatulenga. Pesi teendakali kulimvwa kandili afwiifwi anguwe. Ndakali kuyeeya kuti uli kule loko andime. Ndakalizi kuti Leza ulandiyanda pesi teendakali kusyoma kuti ulaandaba andime.” Nkamboonzi Sheila naakali kuyeeya munzila iili boobo? Wakati: “Mpuli yesu yakali kuswaana mapenzi aakali kutobelana alubo Leza taakali kutugwasya.”
Amwi mbuuli Sheila ulasyoma kuti Leza Singuzuzyoonse mpali. Pesi ulakonzya kubonaanga takwe ndaba pe anduwe. Jobu wakali aalusyomo kuMulengi Singuzuzyoonse pesi chimwi chiindi wakabonaanga Leza takwe ndaba anguwe. (Jobu 2:3; 9:4) Jobu naakasikilwa mapenzi aakali kutobelana wakabuzya Leza kuti: “Undisisilanzi busyu bwako, akundicita mbuli sinkondonyoko?”—Jobu 13:24.
Bbayibbele liyiisyaanzi atala ankani eeyi? NguLeza na utweetela mapenzi? Kuli zintu na zitondeezya kuti Leza ulaandaba andiswe naakuti iwe lwako kukugama? Ubonaanga Leza ulaabona alubo ulaazi na mapenzi ngituswaana akuti ulatuyanda naakuti ulatugwasya chiindi nituli mumapenzi?
Muzyiiyo zitobela, tuyoolanga-langa kuti zintu zyakalengwa zitondeezya biyeni kuti Leza ulaandaba andiswe. (BaRoma 1:20) Alubo tuyoobona kuti Bbayibbele litondeezya biyeni kuti Leza ulaandaba andiswe. Chiindi nuyungizya ‘kuziba’ Leza, kwiinda mukulanga-langa zintu nzyaakalenga akubala Bbayibbele, uyoobona kuti ‘nguukuchebuka lyoonse.’—1 Johane 2:3; 1 Petro 5:7.