Nkamboonzi Nitweelede Kukumbila Bamwi Kuti Batulaye?

1. Niinzi chikonzya kutugwasya kuti tusale munzila yabusongo akuti zintu nzitupulana zizwidilile? (Tusimpi 13:10; 15:22)

TOONSE tuyanda kusala munzila yabusongo. Alubo toonse tuyanda kuti zintu nzitupulana zizwidilile. Jwi lyaLeza litubuzya kuti, ikuti tuzichite eezi, tweelede kukumbila kulayigwa.—Bala Tusimpi 13:10; 15:22.

2. Jehova usyomezya kutuchitilaanzi?

² Muntu uukonzya kutupa busongo akutulaya wiinda bantu boonse, nguTaateesu Jehova. Usyomezya kuti ulatugwasya, wakaamba kuti: “Ndiyookulaya kandikulangide.” (Int. 32:8) Majwi aaya atondeezya kuti Jehova utusyomezya kuti ulatupa lulayo lutweelede akuti ulatugwasya kuti tulubelesye.a

3. Tulalanga-langaanzi muchiiyo eechi?

³ Muchiiyo eechi, tulabelesya Jwi lyaLeza kuti litugwasye kusandula mibuzyo iili 4: (1) Mbuubuli buntu mbundeelede kubaabo bukonzya kupa kuti lulayo ndubandipa bamwi lundigwasye nibalikundigwasya? (2) Ngwani uukonzya kundipa malayilile aagwasya? (3) Kujana ndatondeezya biyeni kuti ndiyanda kugwasigwa chachoonzyo? (4) Nkamboonzi ninditayelede kukumbila bamwi kuti bandisalile zyakuchita?

MBUUBULI BUNTU MBUNDEELEDE KUBAABO?

4. Kuti lulayo lutugwasye, mbuubuli buntu mbutweelede kubaabo?

⁴ Tweelede kulibombya chiindi nitugwasigwa aabamwi. Tweelede kuzumina kuti tuyanda kugwasigwa aabamwi kuti tusale munzila yabusongo akuti tatuzizi pe zyoonse kuti katuli muchiimo chipya. Kuti katutalibombyi, Jehova tayootugwasya pe. Nkinkaako, chiindi nitubala Jwi lyakwe tatukookabona pe kaambo kapa kuti tubelesye lulayo ndwatupa. (Mik. 6:8; 1 Pet. 5:5) Nikuba oobo, kuti katulibombya, tulafwambaana kubelesya lulayo luzwa muBbayibbili alubo lulakonzya kutugwasya.

5. Nziizili zintu zibotu nzyaakachita Davida zyakali kukonzya kupa kuti alisumpule?

⁵ Atubone nzitukonzya kwiiya kuchikozyano chaMwaami Davida. Zintu nzyaakazwidilila kuchita zyakali kukonzya kupa kuti alisumpule. Kwaminyaka myiingi katanaba mwaami, wakali aampuwo yakuba mwiimbi alubo wakayinoonga wakumbilwa kuti ayimbile mwaami. (1 Sam. 16:​18, 19) Jehova naakananika Davida kuti azoobe Mwaami uutobela, wakamupa muuya uusalala. (1 Sam. 16:​11-13) Bantu bakwe bakamwizi aakujeya basinkondonyina, kuswaanizya aGoliyati bbabbani lyakuFilisiti. (1 Sam. 17:​37, 50; 18:7) Kaansinga Davida wakali kulisumpula, wakali kunooyeeya kuti mbukunga wakali kukonzya kuchita zintu zyoonse eezi, taakali kuyandikana kulayigwa aabamwi pe. Pesi Davida wakali kulibombya.

6. Tuzizi biyeni kuti Davida wakali kuzumina kugwasigwa? (Langa chifanikisyo chili aachivumbyo.)

⁶ Naakaba mwaami, Davida wakasala beenzinyina bakali kukonzya kumulaya. (1 Mak. 27:​32-34) Eezi tazigambyi pe, Davida wakazibikene aakuswiilila lulayo. Taakali kuswiilila lulayo ndwaakali kupegwa aabaalumi kupela pe, pesi wakaluswiilila nikuba ndwaakapegwa aamwanakazi uutegwa Abbigeli. Abbigeli wakakwetwe aamwaalumi uutalemeki, uutalumbi alubo uulisumpula uutegwa Nabbali. Davida wakaluswiilila lulayo ndwaakapegwa aa-Abbigeli, eezi zyakapa kuti atachiti chibi chipati.—1 Sam. 25:​2, 3, 21-25, 32-34.

7. Twiiyaanzi kuchikozyano chaDavida? (Mukambausi 4:13) (Langa zifanikisyo.)

⁷ Kuli zyiiyo nzitukonzya kwiiya kuli Davida. Muchikozyano, kulakonzeka kuti tulaachipo chakuchita chimwi chintu naakuti tuzulwida bamwi. Nikuba oobo, tatweelede kuyeeya kuti tulizizi zyoonse akuti tatweelede kupegwa lulayo. Mbuli mbaakachita Davida, tweelede kuba aachiyandisyo chakuzumina kugwasigwa kazitakwe ndaba kuti ngwani uulikutugwasya. (Bala Mukambausi 4:13.) Kuchita oobo, kulakonzya kutugwasya kuti tutachiti chibi chipati chikonzya kupa kuti iswe abamwi tuswaane mapenzi.

NGWANI UUKONZYA KUNDIPA MALAYILILE?

8. Nkamboonzi Jonatani naakali kweelela kugwasya Davida?

⁸ Atubone chiiyo chimbi nchitukonzya kwiiya kuchikozyano chaDavida. Wakazumina kugwasigwa aabantu bakali aabweenzinyina busimide aJehova alubo bakali kumvwisisisya chiimo nchaakasweene. Muchikozyano, chiindi naakali kuyanda kuziba kuti Mwaami Sawulu wakali kuyanda na kuti abambe luumuno anguwe, Davida wakaswiila malayilile ngaakapegwa aaJonatani mwana waSawulu. Nkamboonzi Jonatani naakakonzya kumugwasya? Akaambo kakuti Jonatani wakali aabweenzinyina bulikabotu aJehova akuti wakamuzi kabotu Sawulu. (1 Sam. 20:​9-13) Twiiyaanzi?

9. Ngwani ngutweelede kukumbila kuti atugwasye? Amba chikozyano. (Tusimpi 13:20)

⁹ Kuti katuyanda kugwasigwa, tweelede kukumbila muntu uuli aabweenzinyina bulikabotu aJehova alubo uuli aaluzibo atala ankani eeyo njituyanda kuti atugwasyaayo.b (Bala Tusimpi 13:20.) Muchikozyano, atuteedi mukwesu wachiniini ulikuyanduula muntu uulikabotu wakukwatanaawe. Ngwani uukonzya kumugwasya munzila iilikabotu? Mweenzinyina uutanakwata ulakonzya kumugwasya kuti wabelesya malayilile aazwa muBbayibbili. Pesi mukwesu wachiniini ulakonzya kujana malayilile aagwasya kuti wakumbila kugwasigwa aamukwesu amuchizi bakwetene alubo basimide mubukombi, bamuzi kabotu alubo baba aachiindi chilamfu kababelekela Jehova kabali mulukwatano. Balakonzya kumubuzya mbakonzya kubelesya malayilile aamuBbayibbili akumubuzya nzibakayiya mulukwatano lwabo.

10. Tulalanga-langaanzi lino?

¹⁰ Twalanga-langa buntu mbutweelede kubaabo akuti ngwani weelede kutupa malayilile. Lino atulange-lange kuti, kujana twatondeezya biyeni kuti tuyanda kugwasigwa chachoonzyo akuti tweelede kukumbila bamwi na kuti batusalile zyakuchita.

KUJANA NDATONDEEZYA BIYENI KUTI NDIYANDA KUGWASIGWA CHACHOONZYO?

11-12. (a) Niinzi nzitweelede kutantamuka? (b) Niinzi nzyaakachita Mwaami Rehobbowamu naakali kuyanda kusala chintu chiyandikana?

¹¹ Chimwi chiindi, muntu ulakonzya kuchitaanga uyanda kugwasigwa, pesi kwaamba choonzyo nga uyanda kumvwa kuti bamwi bazibona biyeni zintu nzyaakasala. Muntu uuli oobo nga tayandi kugwasigwa pe. Muntu ooyo weelede kujana chiiyo kuzintu zyakachitikila Mwaami Rehobbowamu.

¹² Rehobbowamu wakaba mwaami wa-Israyeli wisi Solomoni naakafwa. Rehobbowamu naakaba mwaami, bantu bakali aazintu zyiingi zibotu, pesi bakali kuyeeya kuti Solomoni wakali kupa kuti babeleke changuzu loko. Bantu bakayinka kuli Rehobbowamu alubo bakamukombelezya kuti abawubisizye mulimu. Rehobbowamu wakabakumbila kuti bamupe chiindi chakuti ayeeye nzyaakali kuyanda kusala. Kumasaangunino, wakakumbila baalumi bapati bakali bagwasya Solomoni, kuti bamulaye. (1 Bam. 12:​2-7) Nikuba oobo, taakaluswiilila pe lulayo ndwaakapegwa aabaalumi aaba bapati. Nkamboonzi naakachita oobo? Amwi wakali wasala kale nzyaakali kuyanda kuchita akuti wakali kulangilila kuti baalumi bapati bakali kunoozuminana aanguwe. Nkinkaako, naakakumbila beenzinyina bachiniini kuti bamugwasye anibakazuminana aanguwe, wakaziyanda nzibakaamba. (1 Bam. 12:​8-14) Rehobbowamu wakabasandula bantu bakwe akubabuzya zintu nzibakamubuzya beenzinyina. Akaambo kazeezi, bantu bakamupapila Rehobbowamu alubo bakasala mwaami uumbi. Kuzwa waawo, wakasaanguna kuswaana mapenzi.—1 Bam. 12:​16-19.

13. Niinzi chikonzya kutugwasya kuti tuzibe kuti tulayanda na chachoonzyo kuti bamwi batugwasye?

¹³ Twiiyaanzi kuchikozyano chaRehobbowamu? Chiindi nitukumbila kugwasigwa, tweelede kutondeezya kuti tulayanda kugwasigwa chachoonzyo. Niinzi chikonzya kutugwasya kuti tuzibe kuti tuyanda kugwasigwa na chachoonzyo? Tulakonzya kulibuzya kuti, ‘Nga ndakumbila kugwasigwa na mpawo ndaleka kuswiilila kuti zintu nzindabuzigwa kazitali nzizyo nzindali kuyanda?’ Atubone chikozyano.

14. Chiindi nitwagwasigwa, niinzi nzituteelede kuluba? Amba chikozyano. (Langa chifanikisyo.)

¹⁴ Atuteedi mukwesu wajana mulimu uufozya mali nyingi. Katanazumina mulimu ooyo, wakumbila umwi mwaalu kuti aambe maboneno aakwe. Mukwesu ooyo ulikwaamba kuti unoobelekela kule ampuli yakwe kwachiindi chilamfu. Mwaalu ooyo wayeezya mukwesu ooyo malayilile aamuBbayibbili aakuti, mukuli uuyandikana loko ngwalaawo mukwesu ooyo ngwakuti bamumpuli yakwe bajane zintu zyamubukombi. (Ef. 6:4; 1 Tim. 5:8) Atuteedi mukwesu ooyo taazuminana aanzyaawamba mwaalu ooyo. Nkinkaako, wayinkilila kunembo kalikubuzya bamwi balimumbungano kusikila umwi wamubuzya kuti ulakonzya kuzumina mulimu ooyo. Mukwesu ooyo ulikuyanda kugwasigwa na chachoonzyo naakuti wakasala kale nzyayanda kuchita alubo ulikuyanduula muntu kupela uuzuminana aanguwe? Tatweelede kuluba kuti moyo wesu uleena. (Jer. 17:9) Tulakonzya kubuzigwa zintu nzitutayandi umwi nalikutugwasya, pesi chimwi chiindi zintu eezyo nga nzizyo zikonzya kutugwasya.

NDEELEDE KUKUMBILA BAMWI NA KUTI BANDISALILE ZYAKUCHITA?

15. Niinzi nzituteelede kuchita alubo nkamboonzi?

¹⁵ Umwi awumwi wesu uli aamukuli wakuti alisalile nzyayanda. (Gal. 6:​4, 5) Mbuli mbutwabona, muntu uuchenjede uyanduula malayilile muJwi lyaLeza akumaKkristu basimide mubukombi katanasala nzyayanda kuchita. Pesi tatweelede kukumbila bamwi kuti batusalile zyakuchita. Bamwi balakonzya kuzichita kwiinda mukubuzya muntu ngubalemeka kuti, “Kaansinga ndinywe nimuli muchiimo changu, mwalikunoochita biyeni?” Bamwi balakonzya kusala kupela mbuli mbasala umwi kabatayeeyede pe.

16. Nkuukuli kusala nkubakeelede kuchita maKkristu bamumbungano yakuKkorinte atala anyama yakali kupayizigwa kuzibumbwa? (1 Bakkorinte 8:7; 10:​25, 26)

¹⁶ Atubone kusala nkubakeelede kuchita maKkristu bamumbungano yakuKkorinte atala akulya nyama yakali kupayizigwa kuzibumbwa. Pawulu wakabuzya maKkristu aabo kuti: “Tulizi kuti chibumbwa taakwe ambuchibede pe munyika akuti kuli Leza uumwi biyo.” (1 Kor. 8:4) Katuli aamuzeezo nguyooyu, bamwi mumbungano bakasala kuti balakonzya kuyilya nyama eeyo yakali kupayizigwa kuzibumbwa yakalinoonga yawuzigwa mukuya kwachiindi kumusika wanyama. Bamwi bakasala kuti tabakooyilya pe nyama eeyo nkaambo yalikunoopa kuti myoyo yabo iiyiisidwe aBbayibbili ibape mulandu. (Bala 1 Bakkorinte 8:7; 10:​25, 26.) Umwi awumwi wakeelede kulisalila. Pawulu taakwe naakasungwaazya maKkristu bakuKkorinte kuti basalile bamwi naakuti bachite mbuli mbubakali kuchita bamwi. Umwi awumwi wabo wakali ‘kuzoolyaambilila kunembo lyaLeza.’—Rom. 14:​10-12.

17. Niinzi zikonzya kuchitika kuti twatobelezya nzibakasala bamwi? Amba chikozyano. (Langa zifanikisyo.)

¹⁷ Nchiichili chiimo chikozyenie aacheechi chikonzya kuchitika mazubaano? Atubone nkani iili atala atupanzi tuniini twaganzi. MuKkristu umwi awumwi weelede kulisalila kuti ulayanda na kubikkwa tupanzi ootu.c Kulakonzya kutuyumina kuti tuyimvwisisisye kabotu nkani eeyi, pesi kusala ooku mukuli wawumwi awumwi wesu ngwayelede kulinyampwida. (Rom. 14:4) Kuti twatobelezya zyakasalwa aabamwi tunooli bafuba-fuba. Tulakonzya kuba basongo kupela kuti twalisalila katutobelezya malayilile aamuBbayibbili. (Heb. 5:14) Nkinkaako, ndiilili nitweelede kukumbila muKkristu uusimide mubukombi kuti atugwasye? Nitwayanduulisisya atulikke pesi katuchiyanda kugwasigwa kumvwisisisya malayilile aamuBbayibbili mbaayendelana aachiimo chesu.

KKALA KUYANDUULA KUGWASIGWA

18. Wakatuchitilaanzi Jehova?

¹⁸ Jehova wakatondeezya kuti ulatusyoma kwiinda mukutuzumizya kuti tulisalile zyakuchita. Wakatupa Jwi lyakwe, Bbayibbili. Alubo wakatupa beenzuma bakonzya kutugwasya kuti tubone mbutukonzya kubelesya malayilile aamuBbayibbili. Munzila eezi, Jehova wakatondeezya kuti nguNdeende uuli aaluyando. (Tus. 3:​21-23) Kujana twatondeezya biyeni kuti tulamulumba Jehova?

19. Niinzi nzitukonzya kuchita kuti tukkale katubotezya Jehova?

¹⁹ Bazyali balabotelwa kubona bana babo kabali kukomena akuba bakombi baJehova bagwasya bamwi. Munzila iikozyenie, Jehova ulabotelwa chiindi natubona katwiinkilila kunembo kukomena mubukombi, nituyanduula kugwasigwa anitusala zintu zimubotezya.