“Nkondo Njiya Jehova”

Mu 1999, mfulumede yakuFrance yakaamba kuti mutabi wesu wakuFrance wakeelede kubbadala mutelo wazipo zyakasangwa kuzwa mu1993 kusika mu 1996. Twakayanduula lugwasyo kunkuta zyamuFrance kuti nkani eeyi iilangwe-langwe munzila yabululami, pesi taakwe nizyakagwasya pe. Twakeezya lubo kuti nkani eeyi twiitole kunkuta mpawo twakazundwa kunkuta, kuzwa waawo mfulumende yamuFrance yakabweza $6 300 000 U.S. mubbenki lyamutabi wesu wamuFrance. Twakabona kuti, ikuti tuboozegwe mali eeyi twakeelede kutola nkani eeyi ku-ECHR. Katutana tola nkani eeyi kunkuta, ba-ECHR bakatubuzya kuti tuswaanane aabayiminini bazyamulawu bamumfulumede kabalaamwi amwiiminini wa-ECHR kuti tuzuminane.

Twakabona kuti mwiiminini Nkuta Mpati wakali kuyanda kuti tugwisye kamali kache kuti tubbadale mfulumede yakuFrance. Nikuba oobo, twakalizi kuti nikuba kubbadala kamali kache biyo, kukazyania aamalayilile aali muBbayibbili. Bakwesu abachizi bakasanga mali kuti basumpule mulimu waBwaami, nkinkaako zintu nzibasanga teezyamfulumende pe. (Mt. 22:21) Nikuba oobo, twakasala kuti tuyinke kumuswaangano ooyu kuchitila kuti tutondeezye kuti tulayilemeka milawu yankuta mpati.

Twakabonana aamwiiminini waNkuta Mpati muliimwi ndawu mbotu loko njibachitila miswaangano. Naakasaanguna kwaambuula, chiimo teechakali kabotu pe akaambo kakuti mwiiminini waNkuta Mpati wakaamba kuti Bakamboni baJehova bakeelede kubbadala mali yamutelo yakali kuyandwa aamfulumende yaFrance. Kuzwa waawo, mwiiminini waNkuta Mpati twakamubuzya kuti, “Mulizizi na kuti mfulumende yaFrance yakabweza $6 300 000 U.S. mubbenki lyesu?”

Nzitwakamubuzya, zyakamuyumya munkanwa. Chiindi bayiminini bazyamulawu bamumfulumede nibakazumina kuti bakali bayibweza chachoonzyo mali eeyo, mwiiminini waNkuta Mpati wakachincha maboneno ngakalaawo atala ankani yesu. Wakabakalalila, mpawo muswaangano wakamana mpawaawo. Ndakabona kuti Jehova wakachincha zintu zyoonse kuchitila kuti tuzunde kunkani eeyi. Nitwakazwa mumuswaangano ooyu, twakali boteledwe alubo twakali gambide akaambo kazintu zyakachitika.

Mu 30 June 2011, bamunkuta ya-ECHR bakasala munzila yakatondeezya kuti bakali kubbazu lyesu. Bakaamba kuti mutelo ngutwakabuzigidwe kuti tubbadale teewakali mumulawu pe alubo bakabuzya mfulumende yamuFrance kuti baboozye mali yesu mpawo bayungizye mali iimbi aajulu. Kusalwa kwakachitwa aabaNkuta Mpati kunkani yesu chiindi, kuchikwabilila bukombi bwakasimpe muFrance nikuba mazubaano. Mubuzyo ngutwakabuzya mwiiminini waNkuta Mpati katutayeeyeli pe, wakali mbuli bbwe lyakajeya Goliyati, wakapa kuti kube mpindu mbotu. Niinzi chakapa kuti tuzunde? Twakazunda akaambo kamajwi Davida ngaakabuzya Goliyati aakuti, “nkondo njiya Jehova.”—1 Sam. 17:​45-47.

Teempawo kupela pe mputwakazunda kunkuta. Nikuba kuti mfulumende zilaamanguzu akuti zikombelo zilatukazya, pesi twakazunda munkuta zili 1 225 muNkuta Mpati zili munyika zili 70 amunkuta zyamunyika yoonse. Kuzunda nkutwakachita munkuta kwakagwasya kuti bukombi bwesu bube mumulawu, tukambawuke aantanganana, tukake kutola lubazu mumapobwe aapolitikisi akukaka kubikkwa ganzi.

Nkamboonzi nindakatola lubazu kunkani yazyamulawu mu-Europe nikuba kuti ndakali kubelekela kuMawofesi Mapati aaBakamboni baJehova kuNew York, U.S.A.?

NDAKAKOMEZEGWA AABAZYALI BAKALI BASUNGU

Bazyali bangu, George aLucille bakagilajuweta mukkilasi yakuGiliyadi yachi 12 mpawo bakabelekela ku-Ethiopia nindakatumbukwa mu 1956. Bakanduuzika zina lyamuBbayibbili lyakuti Philip. (Mil. 21:8) Munyaka wakatobela, mfulumende yakakasya bukombi bwesu mu-Ethiopia. Nikuba kuti ndakachili muniini, ndichiyeeyede kuti bazyali bangu bakali kuchita zintu zyabukombi chakusisikizya. Mbukunga ndakachili muniini, ndakali kubonaanga zyakali kuchitika zyakali kunoneezya! Ziwusisya nzyakuti, balupati-pati bamfulumede bakatubuzya kuti tuzwe mu-Ethiopia mu 1960.

Mpuli yesu yakalongela kuWichita, Kansas ku-U.S.A., bazyali bangu bakachili basungu mumulimu wakukambawuka mbuli mbubakabede nibakachili mamishinali. Bazyali besu bakatuyiisya kasimpe akutugwasya kuti tube aachiyandisyo chakubelekela Jehova, ime amukulana wangu wachanakazi Judy amwanike wangu wachaalumi Leslie. Ambabo kabali babili bakazyalilwa mu-Ethiopia. Ndakabbabbatizigwa kandili aaminyaka iili 13. Nikwakayinda minyaka iitatu, mpuli yesu yakalongela kundawu kwakali kuyandikana basikupupulula biingi ku-Arequipa kuPeru.

Mu 1974 kandili aaminyaka iili 18, mutabi wakuPeru wakandikumbila abamwi bakwesu bali 4 kuti tubeleke katuli mapayona aayandikana. Twakayelede kuyookambawukila kuzilawu kwakatayina kambawukwa pe kuZilundu zyakuCentral Andes. Eezi zyakali kuswaanizya kukambawukila bantu baambuula chiQuechua achi-Aymara. Twakali kweenda aamoota yakali aamarumu njitwakali kwiita kuti Bwaato akaambo kakuti yakali kubonekaanga ndibbokesi. Nga ndabotelwa kuti ndayeeya atala achiindi nitwakali kugwasya bantu katubelesya Bbayibbili kuti babone kuti Jehova uzoomanisya kufwaba, kuchiswa alufu lino-lino. (Chi. 21:​3, 4) Bantu biingi, bakawuswiilila mulumbe waBwaami.

NDAKABELEKELA KUMAWOFESI MAPATI

Mukwesu Albert Schroeder wakali mukabunga keendelezya kaBakamboni baJehova naakaswaya kuPeru mu 1977, wakandisungwaazya kuti ndi-apulayile kuyoobelekela kuBbeteli kumawofesi mapati. Nkinkaako, ndaka-apulayila. Kakutanayinda chiindi, mu 17 June 1977, ndakasaanguna kubeleka kuBbeteli yakuBrooklyn. Kwaminyaka yiinda ku 4, ndakabelekela kuDipatimenti lyaKukkilina ayaKubambulula zintu.

Mu June 1978, ndakabonana aa-Elizabeth Avallone kumuswaangano wazisi wakachitilwa kuNew Orleans muLouisiana. Wakakomezegwa aabazyali bakali basungu kukubelekela Jehova. Elizabeth wakali waba aaminyaka iili 4 kali payona wachiindi choonse alubo wakali kuyanda kubelekela Jehova mumulimu wachiindi choonse kwabuumi bwakwe boonse. Twakali kukkala katwaambuuzyania. Kalitanalampa, twakabbila muluyando. Twakachada mu 20 October 1979 alubo katuli babili twakasaanguna kubelekela kuBbeteli.

Bakwesu abachizi bamumbungano yesu yakusaanguna yaBrooklyn Spanish, bakali kutuyanda loko. Twakabelekela kumbungano zimbi zitatu zyakali aabakwesu abachizi bakali kutuyanda alubo bakali kutusungwaazya kuti twiinkilile kunembo amulimu wesu wakuBbeteli. Tulabalumba bakwesu abachizi aaba akaambo kakutugwasya kuti tulanganie bazyali besu bachembaala.

NDAKABELEKELA KUDIPATIMENTI LYAMULAWU

Mu January 1982, ndakachinchilwa kuDipatimenti yazyaMulawu kuBbeteli. Minyaka iitatu yakatobela, ndakakumbilwa kuti ndiyinke kuchikolo chazyamilawu akuti ndikabe loya. Ndakayiya kuti bantu bamu-United States abamulizimwi nyika, bali aalwaangunuko lwakuchita zintu zyiingi akaambo kakuzunda kwaBakamboni baJehova munkuta. Nkani eezi nzibakazunda zyakali kukkala kazyaambuulwa mukkilasi.

Mu 1986 kandili aaminyaka iili 30, ndakasalwa kuti ndibe mulangizi waDipatimenti lyaMilawu. Mbukunga ndakachili muniini akuti teendakazi pe kuti niinzi zikonzya kuzoochitika kunembo, ndakabotelwa akaambo kachilongezyo eechi pesi ndakali kuyoowa.

Ndakaba loya mu 1988, pesi teendakazibwene pe kuti chikolo chakali chandipambanisya biyeni akuti chakali chabupambanisya biyeni bweenzuma mbundilaabo aJehova. Lwiiyo lwaajulu lulakonzya kupa kuti muntu alisumpule akubona bamwi batakwe lwiiyo ndwalaalo kuti taakwe mbubabede pe. Mwanakazi wangu Elizabeth nguwe wakandigwasya. Wakandigwasya kuti ndisaangune lubo kuchita zintu nzindakali kuchita kanditanayinka kuyunivesiti kuchitila kuti ndibe aabweenzuma busimide aJehova. Zyakanditolela chiindi kuti ndibe aabweenzuma busimide lubo aJehova. Kuzintu zyakandichitikila ndakabona kuti kuba aaluzibo lwiingi teechintu chiyandikana loko pe mubuumi. Pesi chintu chiyandikana loko, nkuba aabweenzinyokwe busimide aJehova akuti umuyande akubayanda bakombi bakwe.

KUKWABILILA MAKANI MABOTU AKUPA KUTI ABE MUMULAWU

Nindakamanisya chikolo chabuloya, ndakabikkila maanu kukugwasilizya kulangania nkani zyamilawu zyakali kuyandikana aaBbeteli akwiiminina mulimu wesu wakukambawuka munkuta. Mulimu wangu wakali kunoneezya pesi kwakali buyumu-yumu mbundakali kuswaana akaambo kakuti zintu zyakali kufwambaana kuchincha mumbunga. Muchikozyano, kuzwa mu 1991, Dipatimenti lyaMulawu yakali kuyanduula nzila zyakubuzya bantu kuti baleke kugwisya mali nibakali kubweza mabbuku eesu. Kuzwa waawo, Bakamboni baJehova bakasaanguna kupa bantu mabbuku kabatabbadalisyi pe. Eezi zyakapa kuti mulimu wuube kuBbeteli amumulimu wakukambawuka alubo mazubaano zilikugwasizya kuti tutabbadali mutelo. Bamwi bakali kubonaanga kuchincha ooku kulakonzya kuzoopa kuti tubule mabbuku akaambo kakuti mali yalikunoocheya akuti bantu biingi teebakali kuzookajana pe kasimpe. Nzibakali kuyeeyela teenzizyo pe zyakachitika. Namba yabantu bakomba Jehova kuzwa mu 1991, yakayungizya aanamba mpati loko alubo bantu boonse mazubaano balikujana chakulya chamubukombi kabatabbadali pe. Ndakayiya kuti kuchincha kupati kunga kwachitika mumbunga kulazwidilila akaambo kakuti tugwasigwa aaJehova amalayilile aazwa kumuzike uusyomeka.—Kul. 15:2; Mt. 24:45.

Kuzunda kwesu munkuta takuyeeme aakuti tuli aamaloya bazi mulimu pe. Chiindi chiingi, zintu zinga zyapa kuti babetesi abamwi balupati-pati bamfulumende batugwasye, ninzila njibalijataayo bakombi baJehova. Ndakazibona kazichitika eezi mu 1998 bakwesu batatu bamukabunga keendelezya abanakazi babo nibakanjila miswaangano iiyandikana kuCuba. Bakwesu aaba bakali aaluzyalo alubo bakali kulemeka, eezi zyakapa kuti balupati-pati bamfulumende balibonene abalikke kuti tatunjilili pe mulizyapolitikisi.

Nikuba oobo, chimwi chiindi, nzila iinga ilikabotu yakuti tubambuulule kutajatwa kabotu, ‘nkukwabilila makani mabotu akupa kuti abe mumulawu’ munkuta. (Flp. 1:7) Muchikozyano, kwaminyaka myiingi, balupati-pati bamu-Europe akuSouth Korea teebakali kuzumina pe kuti tuleke kuchita milimu yachisooja. Akaambo kazeezi, bakwesu basika ku 18 000 mu-Europe abayinda ku 19 000 muSouth Korea bakakkala kwachiindi chilamfu mujele.

Mu 7 July mu 2011, ba-ECHR bakagwisya mulawu wakali kukachizya bantu bakali munyika zyamu-Europe kuti babeleke iimwi milimu kuti kabatayandi kunjila mulimu wachisooja akaambo kazintu nzibasyoma. Mu 28 June mu 2018, mulawu ooyu wakagwisigwa akuSouth Korean Constitutional Court. Wakagwisigwa akaambo kakuti bakwesu aaba bachikula bakasala kuti batatoli lubazu pe mulizyapolitikisi.

BaDipatimenti lyaMulawu bali kumawofesi mapati abali mumitabi iili munyika yoonse, balikubeleka changuzu kuti bayiminine mulimu waBwaami. Tulabotelwa kwiiminina bakwesu abachizi balikukazigwa aamfulumende. Nikuba kuti twazunda munkuta naakuti teetwazunda, nga tulikupa bukamboni kuli balupati-pati bamfulumende, kubaami akuzisi. (Mt. 10:18) Babetesi, bayiminini bamfulumende, bantu bapupulula makani aa-intaneti abantu boonse, beelede kwaalanga-langa mavesi ngituswaanizya munkani zyesu zyakunkuta. Bantu bali aamyoyo iibombede nga babaziba kabotu Bakamboni baJehova alubo ngabaziba kuti nzitusyoma ziyeeme muBbayibbili. Bamwi babantu aaba, bakaba bakombima.

NDAKULUMBA, JEHOVA!

kwaminyaka yiinda ku 40, ndakali aachilongezyo chakubelekaamwi amawofesi aamitabi aali munyika yoonse aazyamilawu akuyinka kuNkuta Mpati zisiyene-siyene kandiswaanana aabalupati-pati bamfulumende biingi. Ndilabayanda bakwesu baDipatimenti lyaMulawu bakumawofesi eesu mapati abali munyika yoonse. Ndakajana zilongezyo zyiingi mubuumi bwangu alubo ndilakkutisikana.

Elizabeth wakandigwasilizya kwaminyaka iili 45 yayinda, muzyiindi zilikabotu azitali kabotu. Ndilamulumba akaambo kakuti uchindigwasya nikuba kuti uchiswa bulwazi bupa kuti amane manguzu.

Twakalibonena kuti manguzu akuzunda tazizwi kulindiswe pe. Mbuli mbakaamba Davida, “Jehova ninguzu zyabantu bakwe.” (Int. 28:8) Nichoonzyo, “nkondo njiya Jehova.”