MIBUZYO IBUZIGWA ABACHIKULA
Nkamboonzi Nindeelede Kukomba?
Kweendelana akumwi kuyanduulisisya kwakachitwa, 80 pesenti yabachikula bakuAmerica balakomba, pesi hafu yabantu aabo bakomba buzuba abuzuba. Zilantanganana kuti bamwi ngabalibuzya kuti: ‘Kukomba kundigwasya kuti ndilimvwe kabotu na naakuti kulizimwi nzikugwasya?’
Kukomba chambaanzi?
Kukomba nkwambuula aaMulengi wazintu zyoonse. Yeeya nzyaamba majwi aaya. Jehova ulisumpukide kwiinda zintu zyoose, pesi “tali kulamfwu kuli umwi aumwi wesu.” (Milimo 17:27) Bbayibbele litubuzya kuti: “Amuswene kuli Leza, eelyo awalo ulaswena kulindinywe.”—Jakobo 4:8.
Nga ulasweena biyeni aafwiifwi aLeza?
Nzila yakusaanguna, nkukomba—eeyi ninzila njukonzya kwaambuula aayo aLeza.
Yachibili, nkwiiya Bbayibbele—eeyi ninzila Leza njaambuula aayo anduwe.
Kwaambuuzyania munzila eeyi, chaamba kukomba akwiiya Bbayibbele, kuyookugwasya kuti ube abweenzinyokwe busimide aLeza.
“Kwaambuula aJehova—muntu uusumpukide loko, nchilongezyo chipati bantu nchibalaacho.”—Jeremy.
“Kubuzya Jehova zili mumoyo wangu kwiinda munkombyo kupa kuti ndiswene afwiifwi anguwe.”—Miranda.
Leza ulaswiilila na?
Nikuba kusyoma kuti Leza mpali akuti kukomba kulinguwe, kulakonzya kukuyumina kusyoma kuti ulaswiilila chiindi nukomba. Nikuba boobo, Bbayibbele limwaamba kuti uswiilila nkombyo. (Intembauzyo 65:2) Bbayibbele litusungwaazya kuti tuwaale “makatazyo [eesu] oonse kulinguwe.” Nkamboonzi? ‘Nkaambo ulatubikkila maano.’—1 Petro 5:7.
Nzweelede kuyeeya: Kweelede kuti ukkala kuwaambuula abantu mbumvwanana aabo. Ulakonzya kuchita zikozyene akuli Leza. Kkala kuwaambuula aawe kwiinda mukukomba alubo komba kubelesya zina lyakwe lyakuti Jehova. (Intembauzyo 86:5-7; 88:9) Bbayibbele lyaamba kuti: “Amupaile cakutaleka.”—1 Batesalonika 5:17.
“Kukomba nkwaambuzyania nkundichita aTaata wakujulu kandimubuzya zyoonse zilimumoyo wangu.”—Moises.
“Ndaambuula aaJehova kandimubuzya nsiswa zili mumoyo wangu mbuli mbundali kunoochita kandaambuula abaama naakuti muntu ngundimvwanana loko aawe.”—Karen.
Niinzi nzindeelede kukombela?
Bbayibbele lyaamba kuti: “Muzintu zyoonse, kwiinda mumupailo akukombelezya antoomwe akulumba, amumuzyibye Leza nzyomulomba.”—Bafilipi 4:6.
Eezi zyaamba kuti weelede kumubuzya na Jehova zintu zikukataazya? Iiyi! Bbayibbele lyaamba kuti: “Kowaala mukuli wako uuminya mumaanza aa Jehova, eelyo walo uyookulanganya.”—Intembauzyo 55:22.
Nisimpe kuti tweelede kubuzya Leza zintu zitukataazya pesi teenzizyo luzutu nzitweelede kukombela. Umwi musimbi uutegwa Chantelle wakati: “Ndibonaanga tazili kabotu pe kuti kandikkala kandikumbila Jehova luzutu kuti andigwasye. Ndibonaanga ndeelede kumulumba saansi kandimubuzya zintu zyiingi zibotu zyaandichitila.”
Nzuweelede: Nziizili zintu nzukonzya kulumba? Ulakonzya na kusala zintu zitatu sunu mpawo ulumbe Jehova atala azintu eezyo?
“Nikuba kujana chiindi chakulangisisya tuntu tuniini tuli mbuli fulawuzi kulakonzya kupa kuti tukombe kuli Jehova katumulumba.”—Anita.
“Ulakonzya kuyeeya atala azintu zyakalengwa nzuyanda naakuti vesi iikusika aamoyo mpawo ulumbe Jehova atala anjiyo.”—Brian.