Kugwasya Bakwesu Abachizi Bali Munyika Yoonse Chiindi Chacorona

MuMarch 2020, chiindi baWorld Health Organization nibakaambilizya kuti kwaba bulwazi bwaCOVID-19, bantu biingi teebakali kuyeeyela pe kuti bulwazi oobu nga bulazula nyika yoonse kwachiindi chiinda munyaka uumwi. Mamiliyoni aabantu kuswaanizya aBakamboni baJehova balikuswaanana aabuyumu-yumu bwakeetwa akaambo kabulwazi oobu buswaanizya kubula zintu zyakumubili, kukataazikana akubula mali. Bakamboni baJehova bali kubagwasilizya biyeni bantu muchiindi eechi chabulwazi bwacorona?

Kugwasya Aabo Bayanda Lugwasyo

Kabazulwidwa aaKkomiti Yabeendelezi yaKabunga Keendelezya kaBakamboni baJehova, maKkomiti Aagwasyilizya Nikwachitika Mapenzi aayinda ku950 alikugwasilizya muchiindi chaCorona. Mumasena aamwi, makkomiti aaya achita mabambe aakuti bakwesu bajane lugwasyo kuzwa kuli Bakamboni bali kumasena aayo alubo kumwi Bakamboni bagwasigwa amfulumende. Kuyungizya waawo, bachita mabambe aakugwasilizya bantu biingi aachiindi chimwi.

Muchikozyano, atubone chakachitika kuParaguay. Limwi pepa twaambo lyakapa lipoti yakuti, akaambo kapenzi lyakubula mali lyaba akaambo kabulwazi oobu, “bantu biingi bamuchisi tabachikwe chakulya pe.” Pesi maKkomiti Aagwasyilizya Nikwachitika Mapenzi aaParaguay akali atalika kale kupa zyakulya, zibelesyo zyakubelesya kusalazya ansipa. Zibelesyo zyoonse eezi zyakali kukonzya kukkala kwamviki zibili aang’anda aakkala bantu bali 4. Zintu zyakali kwiinka aang’anda imwi ayimwi zyakali kuchita mali iisika ku$30 (U.S.).

Bantu babeleka mumakkomiti aaya balikwabilila biyeni kuzwa kubulwazi bwaCOVID-19? Bazwaata mamask alubo balatantamukana. Baba aachoonzyo chakuti kumakkampani nkubawula zintu takukwe doti pe alubo balatobelezya malayilile aakulikwabilila kubulwazi oobu. Eezi ziswaanizya kuba aachoonzyo chakuti aabo balangania zintu zyawulwa bazweete zyakulikwabilila, balajaya tuzunda kwiinda mukusanzya moota zyabo akubikka zintu zyawulwa aandawu iitakwe doti. Mpawo aabo batola zintu balawuswiilila mulawu wakutantamukana chiindi nibapa bakwesu zintu.

Kubelesya Mali Iisangwa Munzila Iilikabotu

Kusika muJanuary 2021, Kkomiti Yabeendelezi yakazumizya mali yiinda ku25 miliyoni kuti igwasilizye muchiindi chaCOVID-19. Bakumitabi abakwesu babeleka mumaKkomiti Aagwasyilizya Nikwachitika Mapenzi bayibelesya kabotu mali iisangwa alubo babeleka changuzu kuti bajane zintu ziyandikana zitaduli pe. Muchikozyano kuChile, bakwesu babeleka mulimu wakugwasilizya nikwachitika mapenzi bakali kuyanda kuula nyangu zilema makkilogilamu aali 750. Pesi muulo wanyangu eezi wakalitantide kwaziindi zibili mumweezi uumwi luzutu. Nikwakayinda ma-awa aabili kuzwa nibakazumina kuula nyangu eezyo amuulo uudula, sikuuzya umwi wakababuzya kuti umwi muntu wakawulide nyangu waziboozya. Eezi zyakapa kuti bawule nyangu eezyo amuulo uuchipide!

Nikuba boobo, chiindi bakwesu nibakayinka kuti bakabweze nyangu zyabo, sikuuzya wakasaanguna kuyumya mutwe akubabejelezya kuti teebakali kuzyaabanya kabotu zyakulya mbuli mbunga zimbi mbuzyakali kuchita. Umwi mukwesu wakakombela mumoyo mpawo wakasaanguna kupandulwida sikuuzya kuti bakasaanguna kuyanduulisisya mumbungano imwi ayimwi kuti bakonzye kuziba bantu bakali kuyanda lugwasyo. Bakwesu aaba bakapandulula kuti, akaambo kakuti bantu bakali kuyoopegwa chakulya bakali siyene, zyakulya eezyo bakali kuyoozibikka kweendelana aziyandwa aampuli imwi ayimwi. Kumamanino, bakabuzya sikuuzya ooyu kuti mali yoonse njibabelesya Bakamboni baJehova iisangwa biya alubo mulimu ngubabeleka ngwakuliyandila. Wakabotelwa loko naakamvwa oobo. Sikuuzya ooyu wakazumina kubawuzizya amuulo uuchipide alubo wakababuzya kuti nibazooboola lubo kuzoowula uzobapa nyangu zilema makkilogilamu aali 400.

“Bumboni Bwaluyando Lwini-lwini”

Umwi muchizi uutegwa Lusu, ngumukamufu ukkala kuLiberia, ukkala aabamumpuli yakwe bali 5. Bumwi buzuba nibakali kulya chakulya chakuseeni alubo bakali kulingawula lugwalo lwabuzuba, muzukulu wabo uli aaminyaka iili 7 wakabona kuti chakulya chamana mung’anda. Wakabuzya kuti, “Tulachita kutyeni?” Muchizi Lusu wakamubuzya kuti wakalilibambilide kukumbila lugwasyo alubo wakali aachoonzyo chakuti Jehova wakali kuyoobagwasya. Mubuzuba mbuboobo muchizi Lusu wakatambula fooni kuzwa kubaalu bamumbungano mpawo bakamubuzya kuti azoobweze zyakulya. Kumane bakaamba kuti: “Muzukulu wangu waziba kuti Jehova ulaswiilila akusandula nkombyo nkaambo wayisandula yangu.”

Umwi mwanakazi wakuDemocratic Republic of Congo ukkala afwiifwi ampuli yaBakamboni. Naakabona mumpuli eeyi kayitambula chakulya kuzwa kubakombinyina, wakaamba kuti, “Nibwamana bulwazi bwaCorona andiswe tulaba Bakamboni baJehova nkaambo balabalangania bakombinyina muziindi zyamapenzi.” Mulumaakwe wakamubuzya kuti, “Uyanda kuba Kamboni waJehova akaambo kasaka lyarice luzutu?” Mwanakazi ooyu wakasandula kuti, “Peepe pesi saka lyarice eeliya mbumboni butondeezya kuti bantu aaba bali aaluyando lwachoonzyo.”

Bakamboni baJehova bachikonzya kufwambaana kujana zintu nzibayandikana bakwesu abachizi muchiindi eechi chabulwazi bwaCorona akaambo kazipo zyanu zizwa aansi aamoyo. Tumulumba loko akaambo kakusanga nkumuchita kamubelesya nzila zijanika aadonate.jw.org.