Tatubalubi pe Aabo Batamvwi kuMatwi

Jehova Leza uyanda kuti bantu boonse bayiiye atala anguwe aBwaami bwakwe bwakujulu kazitakwe ndaba azyiimo zyabo. (1 Timoti 2:3, 4) Akaambo kazeezi, Bakamboni baJehova bali kupanga maBbayibbili amabbuku akwiiya Bbayibbili agwasya bantu biingi kuswaanizya bantu batamvwi kumatwi. Mbunga yesu yakapanga mabbuku miingi kwiinda mumavidiyo amasayini,a aayo ajanika mumilaka yamasayini yiinda ku100. Mabbuku aayo apangwa biyeni alubo agwisigwa biyeni? Mukuya kwachiindi, nkuukuli kuzwidilila kwakabawo?

Mavidiyo aMulaka waMasayini Apangwa Biyeni?

Mabbuku amasayini apangwa atubunga twabasanduluzi bali munyika yoonse. Bamukabunga kamwi akamwi nga balanga-langa bbuku ndibayanda kusandulula. Kuzwa waawo, balasala kuti baabikke biyeni makani aali mubbuku eelyo, mumulaka wamasayini. Nibamaninsya, nga barekkoda bbuku eelyo kalili vidiyo. Kwalino, kuli tubunga tusandulula mabbuku akwiiya Bbayibbili chiindi choonse tuli 60 mumulaka wamasayini alubo chimwi chiindi tumwi tuli 40 nga twachita oobo kuti kakuyandikana.

Chiindi, kwakali kudula loko kupanga mavidiyo amulaka wamasayini. Makkamela aakurekkodesya mavidiyo azimwi zibelesyo zyakali kudula loko kwiinda mazubaano. Alubo mavidiyo aaya akeelede kurekkodelwa mustudio njitwakeelede kuliyakila alubo chimwi chiindi twakeelede kubambulula mayake achiindi. Kuti kabunga kabasanduluzi kamulaka wamasayini kakonzye kuchita mulimu wako akujana zibelesyo ziyandikana, kwakali kuyandikana mali yiinda ku$30,000b.

Kuti kubelesegwe kabotu mali yakasangwa, mbunga yakabeleka changuzu kuti ijane nzila nguba alubo isumpukide yakusandulula. Nkinkaako, tubelesya zibelesyo zyamazubaano zibeleka kabotu alubo zitaduli loko. Mubusena bwakubelesya studio, kabunga kabasanduluzi kalakonzya kurekkoda mavidiyo muwofisi ilaamuduli wamweemvwe (green). Kuti kakuyandika basikusayina biingi, bakwesu abachizi balakonzya kurekkoda zipanzi zyabo kabali muwofisi naakuti mumaanda aabo, kutali kuti bayinke kustudio.

Alubo, twakapanga pulogilamu yakkompiyuta igwasya basikusayina kuti bachite mulimu wabo. Akaambo kazeezi, tubunga twabusanduluzi twaabukonzya kupanga bbuku lyamulaka wamasayini chakufwambaana kwiinda chiindi. Bakwesu balalumba akaambo kamabambe aaya. Mukwesu utegwa Alexander waamba kuti: “Lino mavidiyo amasayini akkala kagwisigwa kwiinda mbaakali kuchita chiindi. Eezi zindipa kubotelwa loko. Ndeebela mavidiyo buzuba abuzuba.”

Mazubaano, kuyandikana mali iitasiki ku$5,000 kuti kabunga kabasanduluzi kakonzye kuchita mulimu wako akujana zibelesyo ziyandikana. Akaambo kazeezi, twabukonzya kupanga mavidiyo aamulaka wamasayini mumilaka myiingi loko.

Mavidiyo aMulaka waMasayini Agwisigwa Biyeni?

Kuti kabunga kabasanduluzi kamana kurekkoda bbuku lyamulaka wamasayini, mavidiyo aayo ayeelede kusika kubantu. Chiindi, twakali kupanga mavidiyo kkaseti adisikki pesi eezi zyakali kudula, kutola chiindi chilamfu alubo wakali mmu mupati. Zintu zyakarekkodwa zyakali kupegwa imwi kkampani kuti ipange mavidiyo kkaseti amadisikki miingi. Mpawo, akali kutumizigwa kumbungano. Mu2013 kupela, twakabelesya mali yiinda ku$2,000,000 kuti tupange madisikki aamulaka wamasayini.

Bantu batamvwi kumatwi bakabotelwa loko azibelesyo eezi. Nikuba oobo, kwakali kukataazya kubelesya mavidiyo ikapati kuti makkaseti amadisikki avulisya. Chimwi chiindi, bbuku limwi biyo lyaBbayibbili lyakali kurekkodwa mumadisikki miingi. Mukwesu Gilnei wakuBrazil wakaamba kuti: “Kufumbwa chiindi nitwakali kuyanda kubala lugwalo, twakeelede kuyanduula vidiyo kkaseti ilalugwalo ndutuyanda. Eezi zyakali ziyumu loko.” Muchizi Rafayane, wakali kubelesya madisikki amulaka wamasayini, wakati: “Kwakali kumizya kwiiya Bbayibbili awulikke. Twakali kutola chiindi chilamfu kuti tujane magwalo naakuti majwi akuyungizya.” Chiindi bakwesu abachizi nibakali kuya kumulimu wakukambawuka, bakali kubweza madisikki naakuti mavidiyo kkaseti, ngibakali kubikka aTV yamuntu unooli watondeezya chiyandisyo. Bamwi bakwesu bakali kwiinka amaDVD player aabo. Mukuya kwachiindi, kwakali kwaba maDVD player anyampulika alamasikkirini aayo bakwesu biingi ngibakali kubelesya. Bobby, ukkala ku-United States, wakaamba kuti: “Kuti wabala lugwalo mpawo waabuyanda kubala lumbi lugwalo, wakeelede kuchincha disikki. Eezi zyakali kutola chiindi chilamfu alubo kwakali kutuyumina kubelesya Bbayibbili mumulimu wakukambawuka.”

Mu 2013, mbunga yaJehova yakapanga JW Library Sign Language app alubo iigwasya bakwesu abachizi kuti bakonzye kudawuniloda akweebela mavidiyo aamulaka wamasayini mumafooni aabo naakuti matabbuleti. Niyakasaanguna kugwisigwa, app eeyi yakali kujanika mumulaka wamasayini wakuAmerica. Kuzwa waawo, mu 2017, yakali yaabujanika mumilaka yoonse yamasayini. Bakwesu abachizi bamunyika yoonse bakabotelwa loko. Mukwesu Juscelino wakuBrazil wakaamba kuti: “Eezi zyakandigambya loko! Ndakali kukkala kandiyeeya atala aluyando ndubatutondeezya bamuKabunga Keendelezya ambubayanda kuti twiinkilile kunembo kusima mubukombi mbuli bantu babelesya milaka yaambuulwa. Ndakabotelwa loko alubo app eeyi yakandisungwaazya kuti ndikkale kandibala Bbayibbili.”

Mazubaano, tupanga mavidiyo woonse amulaka wamasayini alubo alajanika awebbusayiti yesu akuJW Library Sign Language app. Akaambo kazeezi, mabbuku amulaka wamasayini alasandululwa, kurekkodwa akugwisigwa mumazuba mache kwiinda kuti atole myeezi naakuti minyaka, mbuli mbaakali kuchita chiindi. Mumilaka yamasayini myiingi, mabbuku agwisigwa achiindi chimwi amabbuku ayimwi milaka yaambuulwa.

Atumvwe zyakaambwa abamwi bakwesu abachizi batamvwi kumatwi. Muchizi utegwa Klízia wakati: “Kuli imwi na mbunga ibikkila maanu bantu batamvwi kumatwi kwiinda mukulipeda kubapa chakulya chamubukombi munzila itakataazyi kuchijana? Munyika, takwe nchitukonzya kweezyanisya anzituchitilwa ambunga yaJehova.” Vladimir wakati: “Mavidiyo atondeezya kuti Jehova ulabayanda bantu batamvwi mbuli mbayanda bantu bamvwa.”

Mavidiyo eesu amulaka wamasayini chiindi chiingi atondeezya kuti: “Bbuku eeli teelyakuuzya pe. Lyakalembelwa kugwasya bantu kwiiya Bbayibbili alubo zipo zyakuliyandila nzizyo zigwasya kusumpula mulimu ooyu wamunyika yoonse.” Tulamulumba loko azipo nzimusanga, chiindi chiingi kamubelesya webbusayiti ya donate.jw.org. Zipo eezi zitugwasya kuti tukonzye kupanga maBbayibbili amabbuku apandulula Bbayibbili agwasya bantu boonse, kuswaanizya abaabo baambuula mulaka wamasayini.