Mabbuku aBraille Aali Kuchincha Buumi Bwabantu

Ngaziyakulinda yamu1 June 1912 yakaamba kuti: “Basikubala magazini eesu biingi balizibene awumwi muntu uutaboni.” Alubo yakati: “Balakonzya kujana mabbuku aakubala kabatabbadali pe . . . . Mabbuku aaya alembedwe munzila yakuti bantu bataboni bakonzye kwaabala.” Ngaziyakulinda eeyi yakayinkilila kunembo kwaamba kuti: “Bantu bataboni biingi balabotelwa kuziba kuti munyika mpya ilikunembo, bantu bazoojana zilongezyo zyiingi.”

Naakalembwa majwi aaya, munyika zisiyene-siyene mwaambuulwa mulaka waChikuwa, mabbuku abantu bataboni akali kulembwa munzila zisiyene-siyene. Nikuba oobo, Bakamboni baJehova bakali basaanguna kale kupupulula kasimpe kamuBbayibbili mubraille. Alino mbubachichita! Mabbuku abantu bataboni abujanika mumilaka iyiinda ku 150. Apangwa biyeni mabbuku aya?

Mbaapangwa Mabbuku aBantu Bataboni

Chisaanguna kuchitwa, nkusandulula mabala kuti abe mbuli mbaalembwa mubraille. Michael Millen, ubeleka muDipatiment lyaText Processing Services kuPatterson iili kuNew York, wakaamba kuti: “Chiindi, twakali kubelesya mapulogilamu akulemba braille akapangwa aamwi makampani, pesi taakali kubeleka pe mumilaka yoonse. Pesi lino, twaabubelesya Watchtower Translation System, eeyo igwasya kuti tulembe mabbuku abantu bataboni mumilaka myiingi yaambuulwa munyika yoonse. Ndiyeeya kuti taakwe iimwi pulogilamu iili mbuli eeyi.”

Mabbuku abraille aswaanizya bupanduluzi bwazifanikisyo. Muchikozyano, chifanikisyo chili aachivumbyo chabbuku lyaMbukonzya Kubotelwa Mubuumi Kukabe Kutamani! chilaabupanduluzi bwakuti: “Mwaalumi ulokweenda mukazila kalaamaluba amisamu yeebeka, tulundu azilundu.” Jamshed, mubelesi ubelekela alubo payona uutaboni, wakaamba kuti: “Bupanduluzi bwazifanikisyo bulandigwasya loko.”

Kuti mabala amana kubikkwa mubraille, anga atumizigwa kumitabi ipanga mabbuku abraille. Nkukooko, balapanga mabbuku abraille kababelesya pepa litafwambaani kuzakala, litadabuki chiindi nililikulembelwa alubo lilakonzya kubelesegwa kwachiindi chilamfu. Nizyayinda eezi, balaswanizyaamwi mapeji kuti libe bbuku mpawo balaatumizya kumbungano antaamwi aamwi mabbuku. Muli zimwi ndawu, mabbuku aaya alatumizigwa kakubelesegwa post office ikuti kitabbadalisyi kutumizya mabbuku abantu bataboni. Kuti kakuyandikana kuchita oobo, mitabi eeyi ilakonzya kubelesya nzila zifwambaana kusisya mabbuku kumbungano kuchitila kuti abelesegwe abantu bataboni kumiswaangano.

Kuti mulimu ooyu mupati ukonzye kuchitwa, kuyandikana mali achiindi. Muchikozyano, munchina wakudinda mabbuku uli kuWallkill, kuNew York, upanga maBbayibbili aali 50,000 achiindi chomwe nikupangwa maBbayibbili aabili kupela abraille. Bbayibbili limwi lyagiredi 2 muChikuwa lyabraille lilazipanzi zili 25, alubo mali iiyandikana kukupanga zipanzi eezi zili 25 zyaBbayibbili lyabraille iyindulwidwe ka 123 kumali iiyandikana kupanga Bbayibbili limwi biyo litali lyabraille.a Kuyandikana U.S.$150 kuti kupangwe chivumbyo chimwi biyo chazipanzi eezi zili 25 zyaBbayibbili lyabraille.

Aabo bagwasilizya mumulimu wakupanga mabbuku abraille, bawubona biyeni mulimu ooyu? Nadia, ubelekela kumutabi wakuSouth Africa wakaamba kuti: “Bakwesu abachizi bataboni abataboni kabotu bapona buumi buyumu loko, nkinkaako, ndibona kachili chilongezyo chipati kubagwasya. Zili aantanganana kuti Jehova ubayanda loko.

Yiiya Kubala Braille

Kujana wachita biyeni kuti muntu utaboni katakonzyi kubala braille? Minyaka miche yayinda twakapupulula kabbuku kategwa Learn to Read Braille, kabbuku aaka kabambilidwe bantu babona abataboni. Kabbuku aaka kajisi zibelesyo zyakuti muntu utaboni akonzye kulemba mubraille. Nkinkaako, muntu ulikwiiya braille nga wayiiya kulemba mabala mubraille. Eezi zipa kuti akonzye kulemba akubala kabelesya tunwe twakwe.

“Nsichikonzyi pe Kuleka Kwaabala”

Mabbuku abraille abagwasya biyeni bakwesu abachizi bataboni alubo bataboni kabotu? Ernst ukkala kuHaiti wakali kunjila miswaangano pesi takalikwe pe mabbuku abraille. Nkinkaako, wakeelede kujata amutwe zipanzi nzyakali kupegwa achikolo ansandulo zyoonse nzyakali kupa kumiswaangano. Wakaamba kuti: “Lino, ndabukonzya kusandula kumiswaangano kufumbwa chiindi. Ndijana zyiiyo zikozyenie azijana bakwesu abachizi babona nkaambo tujana chakulya chamubukombi achiindi chomwe.”

Jan, mwaalu utaboni kabotu ukkala ku-Austria alubo uchitisya Chiiyo chaBbayibbili chaMbungano aNgaziyakulinda, wakaamba kuti: “Mabbuku eesu abraille alamvwisisika kwiinda aamwi mabbuku ngindakabala. Muchikozyano, mabbuku eesu alamanamba aamapeji, makani aamunsi atakatazyi kujana abupanduluzi bwazifanikisyo.”

Seon-ok, payona ukkala kuSouth Korea taboni alubo tamvwi pe. Chiindi wakali kunjila miswaangano kakubelesegwa mulaka wamasayini wakujata mumaboko, pesi lino wabulibalila alikke mabbuku abraille. Wakaamba kuti: “Amwi mabbuku abraille alakatazya kubala nkaambo chimwi chiindi asotoka mabala, imwi mizila nga ilinjilene alubo pepa libelesedwe anga nditeteete. Pesi Bakamboni baJehova babelesya pepa bbotu alubo mabala alembedwe kabotu zyakuti mawuba kubala. Wakayungizya kuti: “Chiindi, ndakali kugwasigwa abamwi kuti ndibale mabbuku amuBbayibbili. Pesi lino, ndabulibalila biya. Ndilabotelwa loko kubambila miswaangano yachiKkristu akutola lubazu mulinjiyo. Ndilaabala mabbuku eesu oonse abraille. Nsichikonzyi pe kuleka kwaabala.”

Mbuli mabbuku oonse apupululwa ambunga, mabbuku abraille alembedwe kuti: “Bbuku eeli teelyakuuzya pe. Lyakalembelwa kugwasya bantu kwiiya Bbayibbili alubo zipo zyakuliyandila nzizyo zigwasya kusumpula mulimu ooyu wamunyika yoonse.” Tulamulumba loko azipo nzimusanga kamubelesya webbusayiti ya donate.jw.org. Kusanga nkumuchita kupa kuti chakulya chabukombi chijanike kubantu boonse, kuswaanizya bantu bataboni abataboni kabotu.