Nyimbo Zitupa Kuti Tuswene Afwiifwi aLeza

Nyimbo nchipo chibotu loko chizwa kuli Jehova. Zilakonzya kuchincha mizeezo yesu, mbutulimvwa alubo zilatusungwaazya. Oobu mbubo mbutulimvwa kuti twaswiilila nyimbo zimbi. Kwiinda zyoonse, nyimbo eezi zilakonzya kupa kuti tuswene afwiifwi aJehova.

Kuzwa mu 2014, kwakapangwa nyimbo zimbi zyiinda ku 70 alubo imwi ayimwi yanyimbo eezi ilajanika mumilaka yiinda ku 500. Amwi wakali walibuzya kuti, ‘Mbaani bapanga nyimbo eezi alubo bazipanga biyeni?’

Mbuzipangwa Nyimbo

Nyimbo zimbi zipangwa akabunga kabakwesu abachizi bapanga nyimbo bali mudipatimenti lya-Audio/Video, lizulwidwa aKkomiti yaKuyiisya yamuKabunga Keendelezya. Kabunga kanyimbo kapangidwe abakwesu abachizi bali 13 bagwasizya kufula, azimwi zyoonse ziswaanizidwe mukupanga nyimbo. Mukuyungizya, Kkomiti yaKuyiisya yakasala bakwesu abachizi bagwasilizya kababelekela kumaanda bali munyika zisiyene-siyene kuti bachite mulimu ooyu. Bakwesu abachizi aba baswaanizya basikufula, bayimbi abakonzya kulizya zibelesyo zyanyimbo zisiyene-siyene alubo babelesya zipo zyabo munzila yakulichesya nkaambo tabaliyandwidi mpuwo pe.

Zipangwa biyeni nyimbo zimbi? Chakusaanguna, baKkomiti yaKuyiisya balasala lugwalo muzwa nyimbo alubo ambiyeelede kupa kuti basikuswiilizya balimvwe. Kuzwa waawo, kabunga kapanga nyimbo kapa mulimu ooyo kuli basikufula abasikulemba nyimbo. Mpawo balarekkoda nyimbo eeyo. BaKkomiti yaKuyiisya balayiswiilizya akupa aamwi malayilile ayandikana. Kuzwa waawo, kabunga kapanga nyimbo kalabambulula ziyanda kubambululwa akurekkoda nyimbo kamamanino. Nyimbo eezi zilarekkodwa mundawu zisiyene-siyene kuswaanizya mumitabi amumaanda abantu ajisi zibelesyo zyakurekkoda nyimbo.

Kuti bafule akurekkoda nyimbo, bakwesu babelesya zibelesyo zisiyene-siyene zyamumakkompiyuta. Alubo kuti mulimu ooyu uchitwe, kuyandikana zibelesyo zyakwiimbya, ma-ampulifaya, masipika alubo mamayikkirofoni. Mamayikkirofoni aaya alakonzya kudula kuzwa a-U.S.$100 naakuti kwiinda ku-U.S.$1,000. Mu 2020, twakabelesya mali isika ku-U.S.$116,000 kuula zibelesyo zyakurekkodesya nyimbo.

Nga kwachitwa biyeni kuti kutabelesegwi mali nyingi? Kwiinda kuti kube mbunga mpati yabasikupanga nyimbo aBbeteli pesi nga kwabelesegwa basikugwasilizya babelekela kumaanda aabo. Alubo, muchiindi chakuti basikulizya abasikwiimba babunganaamwi, nga kwabelesegwa minchina yamakkompiyuta ipa kuti kulimvwisye anga bakalaamwi.

“Zisimya Lusyomo Lwangu”

Bakwesu abachizi balakuyanda kuswiilizya nyimbo zimbi. Tara ukkala kuGermany, wakati: “Nyimbo eezi zindipa kuti ndilimvwe kabotu chiindi nindikataazikene. Kuziswiilizya mumulaka wangu kupa kuti ndilimvwaanga Jehova wandimbundila.” Mukwesu Dmitry wakuKazakhstan wakaamba kuti: “Ndilakuyanda kuswiilila nyimbo eezi nkaambo chiindi nindiswiilila nyimbo tandilibiliki pe kuti zileendelana na azyeelelo zyamuBbayibbili. Kuyungizya waawo, nyimbo eezi zindigwasya kuti ndibikkile maanu kuzintu zyamubukombi.”

Muchizi Delia wakuSouth Africa waamba mbalimvwa atala anyimbo zimbi kati: “Zisimya lusyomo lwangu. Chiindi nindikataazikene naakuti nindiswaanana abuyumu-yumu, nga kuli nyimbo iyeendelana achiimo changu. Chiindi chiingi kumvwa mbiilila nyimbo kupa kuti ndilimvwe kabotu!”

Kuli zimwi nyimbo zimbi bamwi nzibayandisya loko. Lerato wakuSouth Africa, wakati: “Nyimbo zitii ‘Nyika Mpya Ilaafwaafwi’ ayiti ‘Amweezyeezye Kuti Muli mu Paradaiso’ zindigwasya kubona mbukunoobede kubona baama nibabusigwa. Chiindi nindimvwa nyimbo eezi ndibona baama kabali kundichijaanina kuti bakandimbundile.”

Umwi musimbi ulaaminyaka ili 16 wakuSri Lanka wakagwasigwa ayimwi yanyimbo zimbi. Wakaamba kuti: “Ticha wangu wasayensi wakanditukila kunembo lyakkilasi yoonse akaambo kakuti ndili Kamboni waJehova. Ndakayoowa loko alubo ndakabula zyakwaamba. Nindakasika kung’anda, baama bakandisungwaazya kuti ndiswiilile nyimbo itii ‘Study Makes You Strong.’ Nyimbo eeyi yandigwasya kubona mbukuyandikana kuti ndiyanduulisisye akulibambila mbundikonzya kusandula. Buzuba bwakatobela, ndakaambuula aticha wangu. Wakandiswiilisisya alubo wakamvwisisisya nzibasyoma Bakamboni baJehova. Ndilayilumba loko mbunga yaJehova akutupa nyimbo eezi zisungwaazya loko.”

Nkuukuli nkutujana mali yakugwasilizya kuti kupangwe nyimbo eezi? Nkwiinda mukusanga kuchitwa munyika yoonse, chiindi chiingi kuchitwa kakubelesya webbusayiti ya donate.jw.org. Tulamulumba loko akulipeda kusanga nkumuchita.