Levitikko
6 Jehova wakayinkilila kunembo kubuzya Mozesi kuti: 2 “Kuti umwi muntu wabisya akutasyomeka kuli Jehova kwiinda mukweena mweenzinyina atala achintu nchaakamupede kuti amulangile naakuti nchaakamupede kuti amubambile naakuti wabbida mweenzinyina naakuti wamunyanga, 3 naakuti wajana chintu chakasweekede, waamba zyakubeja atala anchicho mpawo wakonkezya zyakubeja atala achibi choonse chili boobu nchakonzya kuchita, nzezi nzyayelede kuchita: 4 Kuti wabisya alubo kali aamulandu, weelede kubweedezya nzyaakabba, nzyaakabweza chalweeno, nzyaakanyanga muntu, nzyaakapedwe kuti abambe, naakuti chintu chisweekede nchaakabwezela, 5 naakuti kufumbwa chintu nchaakakonkezya chakubeja, weelede kubbadala muulo wacho uukkwene alubo weelede kuyungizya chipanzi chimwi chazipanzi zili musanu chamuulo wacho. Weelede kuchipa munaacho mubuzuba mulandu wakwe nwaazibikana. 6 Alubo weelede kubweza mugutu uulikabotu kuzwa kubutanga bwakwe, weendelana aamuulo uubikkidwe, kuti ube chipo chamulandu. Mpawo awupe mupayizi kawuli chipo chamulandu kuli Jehova. 7 Mupayizi ulapa chipayizyo chakumaninsya mulandu wakwe kunembo lyaJehova mpawo ulalekelelwa kuchibi choonse nchaakachita, chakapa kuti abe aamulandu.”
8 Jehova wakayinkilila kunembo kwaambuula aaMozesi kati: 9 “Layilila Aroni abana bakwe kuti, ‘Ngoyu mulawu uuli atala azipo zitentwa: Zipo zitentwa zyeelede kuba aachikko chaachipayililo busiku boonse kusika kuseeni alubo mulilo weelede kukkala kawuyaka aachipayililo. 10 Mupayizi weelede kuzwaata chigogo chamulembo mubotu alubo weelede kuzwaata chibbudula* chamulembo mubotu. Mpawo weelede kugwisya dyota* lyachipo chitentwa chakatentwa amulilo aachipayililo, aliyumbile kumbali aachipayililo. 11 Alubo weelede kugwisya zigogo zyakwe azwaate zimwi zigogo mpawo dyota alitole aanze aakkeempu kundawu iitakwe doti. 12 Mulilo weelede kukkala kawuyaka aachipayililo. Tuuyelede kuzima pe. Mupayizi weelede kuyala nkuni aalinchicho buzuba abuzuba kuseeni, achibambe kabotu-kabotu chipo chitentwa aajulu aankuni. Alubo weelede kutenta mafuta aachipayizyo chalumvwanano kuti asuke busi aamulilo. 13 Mulilo weelede kukkala kawuyaka aachipayililo. Tuuyelede kuzima pe.
14 “‘Ngoyu mulawu uuli atala achipo chazilyo: Inywe nibana ba-Aroni, mweelede kucheeta kunembo lyaJehova, kunembo lyachipayililo. 15 Umwi wabo, weelede kunokola fulawa nante iikkwana mukuboko yachipo chazilyo amafuta aacho atununkilizyo toonse tutuba tuli aachipo chazilyo alubo weelede kuzitenta kuti zisuke busi aachipayililo kazili aabweema bununkilila* kazyiiminina chipo choonse* kuli Jehova. 16 Aroni abana bakwe beelede kulya zyasyaala zyachipo eecho. Chizooligwa mbuli chinkwa chitakwe bumena mundawu iisalala. Bazoochilida mulubuwa lwatente lyakuswaanganina. 17 Tacheelede kujikwa nikuba kuswaanizigwa aakufumbwa chintu chili aabumena. Ndabapa kachili chaabilo chabo kuzwa kuzipo zyangu zitentwa aamulilo. Nchintu chisalalisya, mbuli chipayizyo chachibi achipo chamilandu. 18 Bana ba-Aroni boonse bachaalumi beelede kuchilya. Nchaabilo chabo chitamani mumazyalani aabo woonse chizwa kuzipo zyaJehova zitentwa aamulilo. Chintu choonse chiguma nzizyo* chizoosalala.’”
19 Jehova wakaambuula lubo aMozesi kati: 20 “Nchechi chipo Aroni abana bakwe nchibeelede kuzoopa kuli Jehova mubuzuba mbwananikwa: chakkumi cha-efa* yafulawa nante nchibanoopa chiindi choonse kachili chipo chazilyo. Hafu yacho inoopegwa kuseeni mpawo imwi hafu inoopegwa goko. 21 Cheelede kuswaanizigwa aamafuta mpawo chijikilwe mumpani yakukangila. Weelede kucheeta kachiswaanizidwe kabotu-kabotu amafuta mpawo ucheete kachili chinkwa chijikidwe chikwamwidwe chachipo chazilyo chili aabweema bununkilila* kuli Jehova. 22 Umwi wabana bakwe uunanikidwe uunoonjila mundawu yakwe, uzoochipa. Ngoyu mulawu wacho walyoonse alyoonse: Chipo choonse chikkwene chizootentwa kuti chisuke busi kuli Jehova. 23 Chipo choonse chazilyo chamupayizi cheelede kutentwa choonse. Tacheelede kuligwa pe.”
24 Jehova wakaambuula lubo aMozesi kati: 25 “Buzya Aroni abana bakwe kuti, ‘Ngoyu mulawu uuli atala achipayizyo chachibi: Chipayizyo chachibi chizoojayigwa kunembo lyaJehova kundawu kujayilwa chipo chitentwa. Nchintu chisalalisya. 26 Mupayizi uuchipa akaambo kachibi chachitwa, uzoochilya. Chizoolidwa mundawu iisalala, mulubuwa lwatente lyakuswaanganina.
27 “‘Chintu choonse chiguma nyama yacho chizoosalala alubo kuti umwi muntu walosezya ganzi lyacho aachigogo chakwe, chigogo eecho weelede kuchiwachila mundawu iisalala. 28 Chilongo muchakajikilwa cheelede kupwachuulwa. Pesi kuti chakajikilwa muchilongo chakkopa,* chilongo eecho cheelede kukumbwa mpawo chisanzigwe aamaanzi.
29 “‘Bapayizi boonse bachaalumi bazoochilya. Nchintu chisalalisya. 30 Nikuba oobo, taakwe chipayizyo chachibi cheelede kuligwa kuti ganzi lyacho limwi lyeetwa mutente lyakuswaanganina kuti limaninsye milandu mundawu iisalala. Cheelede kutentwa mumulilo.