Levitikko

20 Jehova wakayinkilila kunembo kwaambuula aaMozesi kati: 2 “Buzya ma-Israyeli kuti, ‘Kufumbwa mu-Israyeli naakuti mweenzu uukkala mu-Israyeli uupa mwanaakwe kuli Molekki, weelede kujayigwa. Bantu bamunyika eeyo beelede kumutulula mabwe kusikila afwe. 3 Ndizoomukaka muntu ooyo alubo ndizoomujaya aakati kabantu bakulimbabo, nkaambo bamwi bana bakwe wabapa Molekki alubo wasofwaazya ndawu yangu iisalala azina lyangu lisalala. 4 Kuti bantu bamunyika bachitaanga tabazibwene pe nzyaachita muntu ooyo chiindi napa bana bakwe kuli Molekki alubo baleka kumujaya, 5 ime lwangu ndilamukaka muntu ooyo ampuli yakwe. Ndilamujaya aakati kabantu bakulimbabo aamwi abantu boonse bakaliswaanizya aanguwe mukuchita bwaamu kuli Molekki.

6 “‘Muntu wiinka kubasondi akubantu baamba zitazoochitike kunembo kuti achite aabo bwaamu mubukombi, kwaamba choonzyo, ndizoomukaka alubo ndizoomujaya aakati kabantu bakulimbabo.

7 “‘Mweelede kulisalazya, musalale nkaambo ndime Jehova Leza wanu. 8 Mweelede kubamba milawu yangu akwiitobela. Ndime Jehova uulikumusalazya.

9 “‘Kufumbwa mwaalumi uutuka wisi naakuti banyina, weelede kujayigwa. Mbukunga unooli watuka wisi naakuti banyina, mulandu waganzi lyakwe awube aalinguwe.

10 “‘Kumakani aali atala amwaalumi uuchita bumambi amwanakazi wawumwi mwaalumi, nzezi zyeelede kuchitwa: “Mwaalumi uuchita bumambi amwanakazi wamweenzinyina weelede kujayigwa, kuswaanizya amwanakazi ngwaachitaawe bumambi. 11 Mwaalumi woona aamwanakazi wawisi, umufwisya bweeme wisi. Boonse kabali babili beelede kujayigwa. Mulandu waganzi lyabo uli aalimbabo. 12 Kuti mwaalumi woona aamukamwana wakwe, boonse kabali babili beelede kujayigwa. Bachita chintu chitondwa. Mulandu waganzi lyabo uli aalimbabo.

13 “‘Kuti mwaalumi woona aamwaaluminyina mbuli mbawoona aamwanakazi, boonse kabali babili bachita chintu chisesemya, beelede kujayigwa. Mulandu waganzi lyabo uli aalimbabo.

14 “‘Kuti mwaalumi wakwata mwanakazi aamwi abanyina bamwanakazi ooyo, unooli wachita chintu chitondwa. Mwaalumi ooyo weelede kutentwa mumulilo aamwi abanakazi aabo, kuchitila kuti michito eeyi iitondwa itayinkilili kunembo kuchitwa aakati kanu.

15 “‘Kuti mwaalumi woona aamunyama, weelede kujayigwa, anguwe munyama ooyo mweelede kumujaya. 16 Kuti mwanakazi wayinka kumunyama kuti akoonaawe, mweelede kumujaya mwanakazi ooyo aamwi amunyama ooyo. Boonse beelede kujayigwa. Mulandu waganzi lyabo uli aalimbabo.

17 “‘Kuti mwaalumi woona aamuchizi wakwe, mwana wawisi naakuti mwana wabanyina mpawo wabona chinkuna chamuchizi wakwe, amuchizi wakwe wabona chinkuna chamunyaandumi wakwe, masampu. Beelede kujayigwa kunembo lyabantu bakulimbabo. Wapa kuti muchizi wakwe abe aabweeme.* Mwaalumi ooyo weelede kulisandwida mulandu wakwe.

18 “‘Kuti mwaalumi woona aamwanakazi uuli kumweezi, boonse kabali babili, bavumbula kasensa kaganzi lyakwe. Boonse kabali babili beelede kujayigwa aakati kabantu bakulimbabo.

19 “‘Utooni aamukulana wabanyoko naakuti mwanike wabo, naakuti muchizi wawuso, nkaambo kuchita oobo nkumufwisya bweeme bbululu wako. Beelede kulisandwida mulandu wabo. 20 Mwaalumi woona aamwanakazi wawisi mupati naakuti wawisi muniini umufwisya bweeme wisi mupati naakuti muniini.* Beelede kulisandwida mulandu wabo. Beelede kufwa kabatakwe bana pe. 21 Kuti mwaalumi wakwata mwanakazi wamukulanaakwe naakuti wamwanikaakwe, nchintu chisesemya. Umufwisya bweeme mukulanaakwe naakuti mwanikaakwe.* Tabeelede kuba aabana pe.

22 “‘Mweelede kubamba milawu yangu yoonse anzila zyangu zyakubeteka zyoonse akuzitobela, kuchitila kuti mutazootandwi munyika mundili kumutola. 23 Tamweelede kutobela milawu yazisi nzindili kutanda kunembo lyanu nkaambo zyakachita zintu zyoonse eezi alubo zilandisesemya. 24 Nchindakamubuzya kuti: “Muzookona nyika yabo, andime ndizoomupa njiyo kuti ibe lukono lwanu, nyika iikunka malili abuchi. Ndime Jehova Leza wanu, wakamupambula kubantu boonse.” 25 Mweelede kusiyanisya munyama uusalala amunyama uusofweede, muyuni uusofweede amuyuni uusalala. Tamweelede kulisofwaazya akaambo kamunyama naakuti muyuni naakuti kufumbwa chintu chiyavula aanyika nchindakapambula kuti muchibone kachisofweede. 26 Mweelede kusalala kulindime nkaambo ime ndiJehova ndilasalala alubo ndamupambula kuli bamwi bantu kuti mube bangu.

27 “‘Kufumbwa mwaalumi naakuti mwanakazi musondi naakuti muntu waamba zitazoochitike kunembo, weelede kujayigwa. Bantu beelede kubatulula mabwe kusikila bafwe. Mulandu waganzi lyabo uli aalimbabo.’”