Levitikko

22 Jehova wakayinkilila kunembo kwaambuula aaMozesi kati: 2 “Buzya Aroni abana bakwe kuti beelede kuchenjelela nzila njibazijataayo* zipo zisalala zyama-Israyeli kuti batasofwaazyi zina lyangu lisalala akaambo kazintu zisalala nzibandipa. Ndime Jehova. 3 Babuzye kuti, ‘Kufumbwa mwana wanu uusofweede kumazyalani aanu woonse, uuswena aafwiifwi azintu zisalala ma-Israyeli nzibapa Jehova, weelede kujayigwa kunembo lyangu. Ndime Jehova. 4 Taakwe mwaalumi uuzwa kubana ba-Aroni uuli aachipele naakuti uuli aabulwazi bwakuzwa zintu zili mbuli busina kuchizo chakwe chakuzyazya, weelede kulya zintu zisalala, kusikila asalale, abe mwaalumi uusofweede akaambo kakuguma chidumbu chamuntu naba mwaalumi wali kuzwa bwaalumi, 5 naba mwaalumi uuguma chimwi chazilenge zisofweede zyeenda kazili zyiingi naakuti uuguma mwaalumi uusofweede akaambo kakufumbwa chintu alubo uukonzya kupa kuti anguwe asofwaale. 6 Muntu uuguma chimwi chazintu eezi, tanoosalali pe kusika goko alubo tayelede kulya zintu zisalala, pesi weelede kusamba aamaanzi. 7 Kuti zuba lyabbila ulasalala, kuzwa waawo, ulakonzya kulya chimwi chazintu zisalala nkaambo nchiichakulya chakwe. 8 Tayelede kulya kufumbwa munyama walifwida naakuti kufumbwa chintu chazavuulwa aamunyama wamusokwe mpawo asofwaale akaambo kanchicho. Ndime Jehova.

9 “‘Beelede kuswiilila malayilile aangu kuchitila kuti batachiti chibi akaambo kakutaswiilila akufwa akaambo kakusofwaazya zintu zisalala. Ndime Jehova uulikubasalazya.

10 “‘Taakwe muntu uutazumizigwi,* weelede kulya kufumbwa chintu chisalala. Taakwe muzwakule uukkala aamupayizi naakuti muntu uumubelekela, weelede kulya chintu chisalala. 11 Pesi kuti mupayizi wawula muntu amali yakwe, muntu ooyo ulakonzya kuzilya. Muzike wakazyalilwa mung’anda yamupayizi ulakonzya kulya chakulya chamupayizi. 12 Pesi kuti mwana wamupayizi wakwatwa aamuntu uutali mupayizi,* tayelede kunoolya pe zipo zisalala. 13 Nikuba oobo, kuti mwana musimbi wamupayizi wafwidwa mulumi naakuti walekwa katakwe mwana mpawo wabweeda kuyookkala kung’anda yawisi mbuli chiindi naakachili mwana, ulakonzya kulya chakulya chawisi, pesi taakwe muntu uutazumizigwi pe weelede kuchilya.

14 “‘Kuti muntu walya zintu zisalala katazi, weelede kuzibbadala mpawo ayungizye chipanzi chimwi chazipanzi zili musanu alubo ape mupayizi chipo chisalala. 15 Nkinkaako, tabeelede kusofwaazya zintu zisalala ma-Israyeli nzibapa Jehova 16 akupa kuti bantu bapegwe chisubulo akaambo kamulandu wakulya zintu zisalala, nkaambo ndime Jehova uulikubasalazya.’”

17 Jehova wakayinkilila kunembo kwaambuula aaMozesi kati: 18 “Ambuula aa-Aroni abana bakwe ama-Israyeli boonse ubabuzye kuti, ‘Kuti mu-Israyeli naakuti mweenzu uukkala mu-Israyeli wayanda kupa chipo chitentwa kuli Jehova, kuti azuzikizye chikonke chakwe naakuti kayanda kupa chipo chakuliyandila, 19 weelede kweeta pule wang’ombe uulikabotu, mugutu uuchili muniini naakuti pule wampongo kuchitila kuti atambulike. 20 Tamweelede kweeta chintu chili aanchichisolwaacho pe nkaambo chilapa kuti mutatambuliki pe.

21 “‘Kuti muntu kayanda kupa chipayizyo chalumvwanano kuli Jehova kuti abbadale chikonke naakuti ape chipo chakuliyandila, cheelede kuba ng’ombe naakuti mbelele naakuti mpongo iilikabotu, kuchitila kuti atambulike. Tacheelede kuba aachintu nchichisolwaacho pe. 22 Tamweelede kupa munyama moofu, ufuyukide, uuli aachilonda, uuli aampu, uuli aazikwa naakuti uuli aazikuyu. Tamweelede kupa kufumbwa munyama uuli boobu pe kuli Jehova naakuti kumupayizya kuli Jehova aachipayililo. 23 Mulakonzya kupa ng’ombe naakuti mbelele iili aakuulu kulamfu naakuti kufwiifwi kwiinda kumwi kayili chipo chakuliyandila, pesi tayitambuliki pe kuti kayili chipo chachikonke. 24 Tamweelede kupa Jehova munyama uuli aamachende aapambanikide naakuti aakapwayigwa naakuti aakagwisigwa naakuti aakanengwa. Tamweelede kupa munyama uuli boobu pe munyika yanu. 25 Tamweelede kupa kufumbwa munyama uuli boobu wazwa kumweenzu kali chakulya chaLeza wanu, nkaambo ulipambanikide alubo uli aanchasolwaacho. Takoopa kuti mutambulike pe.’”

26 Jehova wakayinkilila kunembo kwaambuula aaMozesi kati: 27 “Kuti kwazyalwa pule wang’ombe naakuti kagutu kambelele naakuti kapule kampongo keelede kukkala abanyina kwamazuba aali musanu aabili, pesi mubuzuba bwamusanu aatatu kaziya kunembo kayootambulika kakali chipo, nkukwaamba chipo chitentwa aamulilo kuli Jehova. 28 Tamweelede kujaya ng’ombe naakuti mbelele amwanaayo mubuzuba bumwi.

29 “Kuti mwapayizya chipayizyo chakulumba kuli Jehova, mweelede kuchipayizya munzila iitape kuti mutambulike. 30 Cheelede kuligwa mubuzuba mbuboobo, tacheelede kusiigwa kusikila kuseeni. Ndime Jehova.

31 “Mweelede kubamba milawu yangu akwiitobela. Ndime Jehova. 32 Tamweelede kusofwaazya zina lyangu lisalala alubo ndeelede kusalazigwa aakati kama-Israyeli. Ndime Jehova uulikumusalazya, 33 ooyo wakamugwisya munyika ya-Ijipita kuti nditondeezye kuti ndili Leza wanu. Ndime Jehova.”