Myeelwe
30 Mpawo Mozesi wakaambuula aabasilutwe bamisyobo yama-Israyeli kati: “Nzezi Jehova nzyaalayilila: 2 Kuti mwaalumi wakonka kuli Jehova naakuti wasyomezya kuti tazoochiti chimwi chintu, weelede kuchizuzikizya chikonke eecho. Weelede kuchita zintu zyoonse nzyakonka kuti uzoochita.
3 “Kuti mwanakazi wachita chikonke kuli Jehova naakuti wasyomezya kuti tazoochiti chimwi chintu kachili muniini alubo kachikkala aawisi 4 alubo wisi wachimvwa chikonke chakwe naakuti zintu nzyaakasyomezya kuti tazoozichiti, pesi taamukasya pe, zikonke zyakwe zyoonse zyeelede kuzuzikizigwa alubo zintu zyoonse nzyaakasyomezya kuti tazoozichiti pe zyeelede kuzuzikizigwa. 5 Pesi kuti wisi wachikaka chikonke chakwe naakuti zintu nzyaakasyomezya kuti tazoozichiti pe, zikonke zyakwe tazizoozuzikizigwi pe. Jehova ulamulekelela akaambo kakuti wisi wakamukasya.
6 “Nikuba oobo, kuti wakwatwa kali wakakonka naakuti wakasyomezya kuti tazoochiti chimwi chintu 7 mpawo mulumaakwe wamvwa atala anzizyo, pesi taamukasya pe mubuzuba naazimvwa, zikonke zyakwe naakuti zintu nzyaakasyomezya kuti tazoozichiti pe zyeelede kuzuzikizigwa. 8 Pesi kuti mulumaakwe wamukasya mubuzuba naazimvwa, ulakonzya kupa kuti chikonke nchaakachita naakuti zintu nzyaakasyomezya chakufwambaana kuti tazoozichiti zitabeleki alubo Jehova ulamulekelela.
9 “Pesi kuti mukamufu naakuti mwanakazi wakalekwa wachita chikonke, ulalyiiminina muzintu zyoonse nzyaakakonka.
10 “Nikuba oobo, kuti mwanakazi wakonka naakuti wasyomezya kuchita chimwi chintu, pesi kachili kumulumaakwe 11 alubo mulumaakwe wamvwa atala anchicho, pesi taamukasya pe naakuti taazikazya pe, zikonke zyakwe zyoonse naakuti zintu nzyaakasyomezya kuti tazoozichiti zyeelede kuzuzikizigwa. 12 Pesi kuti mulumaakwe wakaka mubuzuba namvwa atala azikonke naakuti chintu nchaakasyomezya kuti tazoochichiti pe, zikonke zyakwe tazizoozuzikizigwi pe. Mulumaakwe unooli wazikasya alubo Jehova ulamulekelela mwanakazi ooyo. 13 Kufumbwa chikonke naakuti chisyomezyo chiswaanizya kulikasya kuchita chimwi chintu, mulumaakwe uli aamanguzu aakuchizumizya naakuti aakuchikasya. 14 Pesi kuti mulumaakwe taachikasya pe mubuzuba naachimvwa, unooli ulikuzuminana aazikonke zyakwe zyoonse naakuti azisyomezyo zyakwe zyoonse zyakuleka kuchita chimwi chintu. Unooli ulikuzuminanaazyo nkaambo taakamukasya pe mubuzuba naakazimvwa. 15 Pesi kuti wazoochikazya kakuli kwayinda chiindi kuzwa mubuzuba naakachimvwa, mulandu wamwanakazi wakwe unooli aalinguwe.
16 “Eeyi njiimilawu Jehova njaakalayilila Mozesi atala amwaalumi amwanakazi wakwe, awisi amwanaakwe musimbi ngwachikkalaawe.”