Myeelwe
35 Jehova wakayinkilila kunembo kwaambuula aaMozesi kumabuwa aakuMowabbu, kumbali aaMulonga waJodani aafwiifwi akuJerikko kati: 2 “Buzya ma-Israyeli kuti ape maLevi myuunzi yakukkala kuzwa kulukono ndubatakone alubo beelede kupa maLevi machezezyo aazyungulukide myuunzi. 3 Bazookkala mumyuunzi eeyi alubo machezezyo aayo alaba aazivuubwa zyabo, aazintu zyabo aabanyama babo bamwi boonse. 4 Machezezyo aamyuunzi njutazoope maLevi anooli makkiyubbiti* aali 1 000 kuzwa kumuduli uuzyungulukide muunzi. 5 Mweelede kupima kunze aamuunzi makkiyubbiti aali 2 000 kubuzwezuba, makkiyubbiti aali 2 000 kubbazu lyakumusanza, makkiyubbiti aali 2 000 kububbila, makkiyubbiti aali 2 000 kubbazu lyakunyika, muunzi kuuli aakati. Eeyi njiyo iitabe myuunzi yabo.
6 “Myuunzi yakuyubila njimutape maLevi iili musanu awumwi, ooko muntu wajaya mweenzinyina nkwakonzya kuchijila ayimwi myuunzi iili 42. 7 Myuunzi yoonse njimutape maLevi yeelede kuba 48 kuswaanizya amachezezyo aayo. 8 Myuunzi njimutabape izoozwa kulukono lwama-Israyeli. Kuzwa kunkamu mpati ulabweza myiingi, kuzwa kunkamu niini ulabweza miche. Nkamu imwi ayimwi izoopa imwi yamyuunzi yayo kumaLevi kweendelana alukono ndwiijana.”
9 Jehova wakayinkilila kunembo kwaambuula aaMozesi kati: 10 “Ambuula aama-Israyeli ubabuzye kuti, ‘Mulikuzubuka Mulonga waJodani kuti munjile munyika yaKkenani. 11 Mweelede kusala myuunzi iitakataazyi pe kusika iitabe myuunzi yakuyubila, ooko muntu wajaya umwi muntu katakanzide nkwakonzya kuchijila. 12 Myuunzi eeyi njakuti muyube sikubweedezya mulandu waganzi, kuchitila kuti ooyo wajaya muntu atafwi pe kusikila abetekwe kunembo lyambungano. 13 Ooyu nguumulimu wamyuunzi iili musanu awumwi njimutasale. 14 Mweelede kusala myuunzi iitatu kubbazu eeli lyaMulonga waJodani ayimwi iitatu kunyika yaKkenani kuti ibe myuunzi yakuyubila. 15 Myuunzi eeyi iili musanu awumwi ilaba yamayubilo kumu-Israyeli, kumweenzu akumuntu uukkede aakati kabo. Inooli yakuti kufumbwa muntu wajaya umwi muntu katakanzide achijile nkuko.
16 “‘Pesi kuti wamuuma aachibelesyo chansimbi mpawo wafwa, mujayi. Nkinkaako, mujayi weelede kujayigwa anguwe. 17 Alubo kuti wamutulula aabbwe likonzya kupa kuti afwe mpawo wafwa, mujayi. Nkinkaako, mujayi weelede kujayigwa anguwe. 18 Alubo kuti wamuuma aachibelesyo chachisamu chikonzya kupa kuti afwe mpawo wafwa, mujayi. Nkinkaako, mujayi weelede kujayigwa anguwe.
19 “‘Sikubweedezya mulandu waganzi nguwe uutajaye mujayi. Kuti wamuswaana, ulamujaya. 20 Kuti muntu wafwa akaambo kakuti wakamutonta nkaambo wakali kumuzonda naakuti wakawaala chimwi chintu aalinguwe kali aamakanze mabi,* 21 naakuti wakamuuma aakuboko kwakwe akaambo kakuti wakali kumuzonda mpawo wafwa, ooyo wakamuuma weelede kujayigwa, mujayi. Sikubweedezya mulandu waganzi weelede kujaya mujayi naamuswaana.
22 “‘Pesi kuti taakachita aachaali alubo taakamutonta akaambo kakuti wakali kumuzonda naakuti taakamuuma aachimwi chintu kali aamakanze mabi,* 23 naakuti taakamubwene pe alubo wakapa kuti bbwe liwide aalinguwe nikuba kuti taakali sinkondonyina naakuti taakali kuyanda kumuchisa pe mpawo muntu ooyo wafwa, 24 mbungano yeelede kubeteka aakati kamuntu wamuuma asikubweedezya mulandu waganzi kweendelana amalayilile aaya aakubeteka. 25 Mbungano yeelede kuvuna mujayi kuzwa kukuboko kwasikubweedezya mulandu waganzi mpawo imubweedezye kumuunzi wakuyubila nkwaakachijila alubo weelede kukkala nkukooko kusikila mupayizi mupati wakananikwa aamafuta aasalala naafwa.
26 “‘Pesi kuti mujayi wayinda mugaano wamuunzi wakuyubila ngwaakachijila 27 mpawo sikubweedezya mulandu waganzi wamujana aanze aamugaano wamuunzi wakuyubila mpawo wamujaya, takwe mulandu pe. 28 Nkaambo weelede kukkala mumuunzi wakuyubila ngwaakachijila kusikila mupayizi mupati afwe. Pesi kuti mupayizi mupati wafwa, mujayi ulakonzya kubweeda kunyika yakwe. 29 Eeyi njiimilawu yanu yakubeteka kumazyalani aanu woonse kundawu zyoonse nzimukkala.
30 “‘Kufumbwa muntu uujaya mweenzinyina, anguwe weelede kujayigwa kuti kwaba bakamboni, pesi taakwe muntu weelede kujayigwa kuti kakuli bukamboni bwamuntu uumwi. 31 Tamweelede kutambula chinunuzyo chabuumi bwamujayi weelela kujayigwa, nkaambo kwaamba choonzyo, weelede kujayigwa. 32 Alubo tamweelede kutambula chinunuzyo kuzwa kumuntu wakachijila kumuunzi wakuyubila kamuli kumuzumizya kuti asaangune lubo kukkala munyika yakwe, mupayizi mupati katanafwa pe.
33 “‘Tamweelede kusofwaazya nyika njimukkala nkaambo ganzi lisofwaazya nyika. Taakwe chintu chikonzya kubbadala ganzi lyatika aanyika kunze kwaganzi lyayooyo walitila. 34 Tamweelede kusofwaazya nyika njimukkala, eeyo njindikkala nkaambo ime ndiJehova ndikkede aakati kama-Israyeli.’”