Myeelwe
9 Jehova wakaambuula aaMozesi munkanda yaSinayi mumweezi wakusaanguna mumunyaka wachibili kuzwa nibakazwa munyika ya-Ijipita kati: 2 “Ma-Israyeli beelede kubamba chipayizyo chaPasika aachiindi chacho chibikkidwe. 3 Mubuzuba bwachi 14 bwamweezi nguyooyo goko,* mweelede kuchibamba aachiindi chacho chibikkidwe. Mweelede kuchibamba kweendelana amilawu yacho yoonse amalayilile aacho woonse aabikkidwe.”
4 Nkinkaako, Mozesi wakabuzya ma-Israyeli kuti babambe chipayizyo chaPasika. 5 Mpawo bakabamba chipayizyo chaPasika mumweezi wakusaanguna mubuzuba bwachi 14 bwamweezi nguyooyo goko* munkanda yaSinayi. Ma-Israyeli bakachita kweendelana azintu zyoonse Jehova nzyaakalayilila Mozesi.
6 Kwakali baalumi bakasofweede akaambo kakuguma chidumbu chamuntu, nkinkaako, teebakakonzya pe kubamba chipayizyo chaPasika mubuzuba mbuboobo. Baalumi aaba bakayinka kunembo lyaMozesi a-Aroni mubuzuba mbuboobo 7 mpawo bakati kulinguwe: “Tulisofweede akaambo kakuguma chidumbu chamuntu. Nkamboonzi nitutazumizigwi pe kweeta chipo kuli Jehova aachiindi chacho chibikkidwe mbuli bamwi ma-Israyeli?” 8 Nkinkaako, Mozesi wakati kulimbabo: “Amulindile aawa ndimvwe kuti Jehova ulatyeni atala andinywe.”
9 Mpawo Jehova wakati kuli Mozesi: 10 “Buzya ma-Israyeli kuti, ‘Nikuba kuti umwi muntu uuli aakati kanu naakuti uuli aakati kabana banu bachiza, wasofwaala akaambo kakujata chidumbu chamuntu nikuba kali kule akaambo kalweendo, weelede kubambila Jehova chipayizyo chaPasika. 11 Beelede kuchibamba mumweezi wachibili mubuzuba bwachi 14 goko.* Beelede kuchilya aamwi achinkwa chitakwe bumena azisyu zilula. 12 Taakwe nchibeelede kusiya pe kusikila kuseeni alubo tabeelede kutyola chifuwa chachipayizyo eecho. Beelede kuchibamba kweendelana amilawu yoonse yaPasika. 13 Pesi kuti muntu kasalala naakuti katali mulweendo mpawo waleka kubamba chipayizyo chaPasika achaali, muntu ooyo weelede kujayigwa aakati kabantu bakulimbabo, nkaambo taapa chipo chaJehova aachiindi chacho chibikkidwe. Muntu ooyu uzoolisandwida akaambo kamulandu wakwe.
14 “‘Alubo kuti kakuli mweenzu uukkede aakati kanu, anguwe weelede kubambila Jehova chipayizyo chaPasika. Weelede kuchibamba kweendelana amulawu waPasika amalayilile aalyo aabikkidwe. Kweelede kuba mulawu uumwi kupela kulindinywe akubeenzu bakkala aakati kanu.’”
15 Mubuzuba nilyakayimikizigwa tente lyakukombela, joba lyakavumba tente lyakukombela, nkukwaamba tente lyaBukamboni. Pesi kuzwa goko kusika kuseeni kwakali kuboneka chintu chakali mbuli mulilo aajulu aatente lyakukombela. 16 Eezi nzizyo zyakayinkilila kunembo kazichitika: Sikati, joba lyakali kuvumba tente lyakukombela mpawo mansiku chintu chakali mbuli mulilo chakali kulivumba. 17 Kuti joba lyanyampuka aajulu aatente, ambabo ma-Israyeli bakali kunyampuka chakufwambaana alubo mpulyakali kwiimikila, mpimpawo mpubakali kukkempa ma-Israyeli. 18 Kuti ma-Israyeli bamvwa malayilile aaJehova aakuti beende, bakali kweenda alubo kuti bamvwa malayilile aaJehova aakuti bakkempe bakali kukkempa. Kuti joba lyayinkilila kunembo kwiimikila aajulu aatente lyakukombela, ma-Israyeli bakali kwiinkilila kunembo kabakkempede. 19 Kuti joba lyayimikila aajulu aatente lyakukombela kwamazuba miingi, ma-Israyeli bakali kuswiilila Jehova alubo teebakali kweenda pe. 20 Chimwi chiindi, joba lyakali kwiimikila aajulu aatente lyakukombela kwamazuba mache. Kuti bamvwa malayilile aaJehova aakuti bateendi, bakali kwiinkilila kunembo kabakkempede alubo kuti bamvwa malayilile aaJehova aakuti beende bakali kweenda. 21 Chimwi chiindi, joba lyakali kwiimikila kuzwa goko kusika kuseeni alubo kuti joba lyanyampuka kuseeni, bakali kweenda. Kufumbwa kuti lyakali sikati na naakuti mansiku, kuti lyanyampuka ambabo bakali kweenda. 22 Kufumbwa kuti lyakkala kwamazuba aabili naakuti mweezi naakuti kwachiindi chilamfu, kufumbwa kuti joba kalichili aajulu aatente lyakukombela, ma-Israyeli bakali kwiinkilila kunembo kabakkempede, teebakali kweenda pe, pesi kuti lyanyampuka, ambabo bakali kweenda. 23 Kuti bamvwa malayilile aaJehova aakuti bakkempe bakali kukkempa alubo kuti bamvwa malayilile aaJehova aakuti beende bakali kweenda. Bakayinkilila kunembo kuswiilila Jehova kweendelana amalayilile Jehova ngaakabapa kwiinda muli Mozesi.