Myeelwe
10 Mpawo Jehova wakati kuli Mozesi: 2 “Lipangile myeembo iibili, wiipange kubelesya nsiliva iifulidwe alubo wiibelesye kwiita mbungano akwaambila mbungano kuti inyampuke. 3 Kuti yoonse kayili iibili yalizigwa, mbungano yoonse yeelede kuza kulinduwe kumanjililo aatente lyakuswaanganina. 4 Pesi kuti kwalizigwa uumwi biyo, basilutwe, nkukwaamba basilutwe bazyuulu zyama-Israyeli, mbabo beelede kubungana kulinduwe.
5 “Kuti mwalizya mweembo munzila iichincha-chincha, nkamu iili kubuzwezuba yeelede kweenda. 6 Kuti mwalizya mweembo munzila iichincha-chincha kachibili, nkamu iili kumusanza yeelede kweenda. Beelede kulizya mweembo munzila eeyi chiindi choonse nkamu imwi ayimwi niyeenda.
7 “Nimwiita mbungano yoonse kuti ibunganaamwi, mweelede kulizya mweembo, pesi kutali munzila iichincha-chincha pe. 8 Bana ba-Aroni bapayizi beelede kulizya myeembo alubo kulizigwa kwayo kuzooba mulawu wanu mumazyalani aanu woonse kukabe kutamani.
9 “Kuti mwaabuya kunkondo munyika yanu kuti mukalwane aabasikumudyaaminina balikumupenzya, mweelede kulizya myeembo kuti bantu baye kuyoolwana mpawo Jehova Leza wanu ulamuyeeya akumuvuna kuzwa kuli basinkondonyokwe.
10 “Mukuyungizya, mumazuba aanu aakubotelwa, nkukwaamba chiindi nimuchita mapobwe aanu aakumasaangunino aamyeezi yanu, mweelede kulizya myeembo chiindi nimupa zipo zyanu zitentwa azipayizyo zyanu zyalumvwanano. Zipo eezi zizoopa kuti Leza wanu amuyeeye. Ndime Jehova Leza wanu.”
11 Mumunyaka wachibili, mumweezi wachibili mubuzuba bwachi 20 bwamweezi ooyo, joba lyakanyampuka aajulu aatente lyakukombela lilaabbokesi lyaBukamboni. 12 Nkinkaako, ma-Israyeli bakasaanguna kweenda kuzwa munkanda yaSinayi kweendelana amabambe aakabikkwa aali atala ambubeelede kunyampuka alubo joba lyakaakwiimikila munkanda yaParani. 13 Aaka kakali kakusaanguna kweenda kabatobelezya malayilile Jehova ngaakabapa kabelesya Mozesi.
14 Nkinkaako, nkamu iili aamisyobo iitatu iizulwidwa aabana baJuda njiyo yakasaanguna kweenda, kweendelana ankamu zyabo alubo Nashoni mwana wa-Aminadabbu nguwe wakali kuzulwida nkamu eeyo. 15 Wakali kuzulwida nkamu yamusyobo wabana ba-Isakkara, wakali Nataniyeli mwana waZuwari. 16 Wakali kuzulwida nkamu yamusyobo wabana baZebbuloni, wakali Eliyabbu mwana waHeloni.
17 Tente lyakukombela nilyakadilisigwa, bana baGeshoni abana baMerari, aabo bakali kunyampula tente lyakukombela, bakeenda.
18 Mpawo nkamu iili aamisyobo iitatu iizulwidwa aaRubbeni yakanyampuka kweendelana ankamu zyabo alubo Elizure mwana waShedawuri nguwe wakali kuzulwida nkamu eeyo. 19 Wakali kuzulwida nkamu yamusyobo wabana baSimiyoni, wakali Shelumiyeli mwana waZurishadayi. 20 Wakali kuzulwida nkamu yamusyobo wabana baGadi, wakali Eliyasafu mwana waDeyuweli.
21 Mpawo maKkohati, aabo bakali kubweza zintu zyamundawu iisalala, bakeenda. Tente lyakukombela lyakeelede kuti kalili lyayimikizigwa nibasika.
22 Mpawo nkamu iili aamisyobo iitatu iizulwidwa aabana ba-Efremu yakanyampuka kweendelana ankamu zyabo alubo Elishama mwana wa-Amihudi nguwe wakali kuzulwida nkamu eeyo. 23 Wakali kuzulwida nkamu yamusyobo wabana baManase, wakali Gamaliyeli mwana waPedazuri. 24 Wakali kuzulwida nkamu yamusyobo wabana baBbejamini, wakali Abbidani mwana waGidiyoni.
25 Mpawo nkamu iili aamisyobo iitatu iizulwidwa aabana baDani yakanyampuka kweendelana ankamu zyabo. Yakali kweendela musule kuti ikwabilile nkamu zyoonse alubo Ahiyezeri mwana wa-Amishadayi nguwe wakali kuzulwida nkamu eeyo. 26 Wakali kuzulwida nkamu yamusyobo wabana ba-Asha, wakali Pagiyeli mwana wa-Okkirani. 27 Wakali kuzulwida nkamu yamusyobo wabana baNafutali, wakali Ahira mwana wa-Enani. 28 Oobu mbumbubo ma-Israyeli ankamu zyabo mbubakali kweenda nibakali kunyampuka.
29 Mpawo Mozesi wakati kuli Hobbabbu, mwana waRuweli* muMidiyani, wisizyala waMozesi: “Twaabuya kundawu Jehova njaakaamba kuti ndilamupa. Atwiinkaamwi alubo tulakujata kabotu nkaambo Jehova wasyomezya kupa Israyeli zintu zibotu.” 30 Pesi wakati kulinguwe: “Tandikooyinka pe, ndilabweeda kuchisi changu akubabbululu bangu.” 31 Mpawo wakati: “Ndakombelela utatusiyi pe nkaambo nduwe nuuzi nkutweelede kukkala munkanda alubo ulakonzya kuba muzulwidi wesu.* 32 Kuti wayinka aandiswe, kufumbwa bubotu Jehova mbwatatutondeezye, kwaamba choonzyo, tulabutondeezya andiswe kulinduwe.”
33 Nkinkaako, bakasaanguna kweenda lweendo lwamazuba aatatu kuzwa kuchilundu chaJehova alubo bbokesi lyachizuminano chaJehova lyakali kunembo lyabo mumazuba aaya aatatu, kabayanduula ndawu yakuti bapumune. 34 Nibakali kuzwa aakkeempu sikati, joba lyaJehova lyakali kubazulwida.
35 Chiindi choonse Bbokesi nilyakali kubwezegwa, Mozesi wakali kuti: “Nyampuka, O Jehova, basinkondonyokwe abamwayikizyane alubo boonse bakuzonda abachije kunembo lyako.” 36 Mpawo nilyakali kukkala wakali kuti: “Boola, O Jehova, kuzyuulu* zitabaliki zyama-Israyeli.”