Myeelwe
17 Mpawo Jehova wakati kuli Mozesi: 2 “Ambuula aama-Israyeli mpawo ubweze mufunko uumwi kuzwa kung’anda yamawisi imwi ayimwi, kuzwa kuli basilutwe bang’anda yamawisi imwi ayimwi, nkukwaamba mifunko iili 12. Ulembe zina lyawumwi awumwi wabo aamufunko wakwe. 3 Weelede kulemba zina lya-Aroni aamufunko waLevi nkaambo kuli mufunko uumwi wasilutwe wang’anda yamawisi imwi ayimwi. 4 Bikka mifunko eeyo mutente lyakuswaanganina kunembo lyabbokesi lyaBukamboni ooko nkundikkala kandilibonia kulinduwe. 5 Mpawo mufunko wamuntu ngunditasale ulasyuuka alubo ndilawumuzya kunding’ung’unina nkubali kuchita ma-Israyeli akukung’ung’unina nkubali kuchita.”
6 Nkinkaako, Mozesi wakaambuula aama-Israyeli alubo basilutwe boonse bakamupa mifunko, silutwe wang’anda yamawisi imwi ayimwi wakeeta mufunko wakwe. Mifunko eeyo yakali 12, anguwo mufunko wa-Aroni wakaliwo aamifunko eeyo. 7 Mpawo Mozesi wakabikka mifunko eeyo kunembo lyaJehova mutente lyaBukamboni.
8 Mubuzuba bwakatobela, Mozesi naakanjila mutente lyaBukamboni, mufunko wa-Aroni wang’anda yaLevi wakali wasyuuka, waba aazisyuukila, wafulula maluba akuzyala ma-alumondi aabizidwe. 9 Mpawo Mozesi wakagwisya mifunko yoonse kunembo lyaJehova wayiyeta kuma-Israyeli woonse. Bakayilanga-langa mpawo umwi awumwi wakabweza mufunko wakwe.
10 Jehova wakati kuli Mozesi: “Bweedezya mufunko wa-Aroni kunembo lyabbokesi lyaBukamboni kuti ulondolwe kawuli chitondeezyo kubana bataswiilili, kuchitila kuti kunding’ung’unina kwabo kumane akuti batafwi.” 11 Aachiindi nchicheecho, Mozesi wakachita mbuli mbaakalayililwa aaJehova. Wakachita oobo.
12 Mpawo ma-Israyeli bakati kuli Mozesi: “Lino tulafwa, kwaamba choonzyo, tulanyonyooka, toonse tulanyonyooka! 13 Kufumbwa muntu uuswena aafwiifwi atente lyakukombela lyaJehova ulafwa! Toonse tufwe mbuboobu na?”