Myeelwe
18 Jehova wakati kuli Aroni: “Iwe abana bako ang’anda yamawuso, ndinywe mutabe aamulandu kuti kwaba chintu chachitika mundawu iisalala. Alubo iwe abana bako ndinywe mutabe aamulandu kuti kwaba chintu chachitika mumulimu wanu wabupayizi. 2 Alubo weelede kubeeta aafwiifwi babbululu bako bamusyobo waLevi, musyobo wako wamasianyookulu kuchitila kuti baliswaanizye aanduwe, bakugwasye iwe abana bako kunembo lyatente lyaBukamboni. 3 Beelede kuchita milimu yoonse njutababuzye amilimu yoonse yaatente. Nikuba oobo, tabeelede kuswena aafwiifwi azibelesyo zyamundawu iisalala, aafwiifwi achipayililo, kuchitila kuti iwe ambabo mutafwi. 4 Balaliswaanizya aanduwe akubeleka milimu yabo mutente lyakuswaanganina amilimu yoonse yaatente. Alubo taakwe muntu uutazumizigwi* weelede kuswena aafwiifwi andinywe. 5 Mweelede kuchita milimu yanu aandawu iisalala akuchipayililo kuchitila kuti kutabi bumwi bukali butasikile ma-Israyeli. 6 Ime lwangu, ndabweza babbululu banu maLevi aakati kama-Israyeli kuti babe chipo chanu. Bapegwa kuli Jehova kuti bachite milimu yaatente lyakuswaanganina. 7 Iwe abana bako ndinywe mweelede kubeleka milimu yanu yabupayizi aachipayililo akuzintu zili kusule aakketeni alubo ndinywe mweelede kuchita mulimu ooyo. Ndamupa mulimu ooyo wabupayizi kuti chibe chipo biya kulindinywe alubo kufumbwa muntu uutazumizigwi* uuswena aafwiifwi, weelede kujayigwa.”
8 Jehova wakayinkilila kunembo kwaambuula aa-Aroni kati: “Ime lwangu ndakupa mulimu wakulanga zipo zipegwa kulindime. Iwe abana bako, ndamupa chipanzi chazintu zyoonse zisalala zipegwa aama-Israyeli kuti chibe chaabilo chanu chitamani. 9 Eezi zizooba zyanu kuzwa kuzipo zisalalisya zitentwa aamulilo: zipo zyoonse nzibapa kuswaanizya zipo zyabo zyazilyo azipayizyo zyabo zyachibi azipo zyamilandu nzibeeta kulindime. Nzintu zisalalisya kulinduwe abana bako. 10 Mweelede kuzilida mundawu iisalalisya. Muntu woonse wachaalumi ulakonzya kuzilya. Zinooli zintu zisalala kulindinywe. 11 Azeezi nzizyako: zipo nzibapa aamwi azipo zyoonse zyakuyumba zyama-Israyeli. Ndazipa nduwe abana bako balombe abana bako basimbi kuti zibe chaabilo chanu chitamani. Muntu uusalala wamung’anda yako ulakonzya kuzilya.
12 “‘Mafuta woonse mabotu awayini mpya mbotu azilyo amichelo yakusaanguna nzibapa kuli Jehova, ndazipa nduwe. 13 Zintu zyoonse zisaanguna kubizwa mumyuunda yabo anzibatazooyete kuli Jehova zilaba zyako. Muntu woonse uusalala mung’anda yako ulakonzya kuzilya.
14 “Chintu choonse chipegwa* aama-Israyeli cheelede kuba chako.
15 “Mwana wakusaanguna wachintu choonse chipona ngubeeta kuli Jehova kazitakwe ndaba kuti ngwamuntu na, naakuti ngwamunyama weelede kuba wako. Nikuba oobo, weelede kunununa bana bakusaanguna babantu alubo weelede kunununa bana bakusaanguna babanyama batasalali. 16 Bana aabo nibaba aamweezi uumwi kaziya kunembo, mweelede kubanununa aamuulo wakunununa uubikkidwe wamashekeli* aansiliva aali musanu, kweendelana ashekeli lyamundawu iisalala.* Magera aali 20.* 17 Pule wang’ombe wakusaanguna kuzyalwa amugutu wakusaanguna kuzyalwa amwana wampongo wakusaanguna kuzyalwa mbabo abalikke mbutayelede kunununa. Nzintu zisalala. Weelede kusansiila ganzi lyazyo aachipayililo alubo weelede kupa kuti mafuta aazyo asuke busi kuti abe chipo chitentwa aamulilo chili aabweema bununkilila* kuli Jehova. 18 Nyama yazyo yeelede kuba yako. Yeelede kuba yako mbuli kaango kachipo chakuyumba amweendo wachilisyo. 19 Zipo zyoonse zisalala ma-Israyeli nzibapa kuli Jehova ndazipa kulinduwe akubana bako balombe akubana bako basimbi kuti zibe chaabilo chanu chitamani. Nchizuminano chamunyo* chitamani kunembo lyaJehova, chako abana bako mbulaabo.”
20 Jehova wakayinkilila kunembo kubuzya Aroni kuti: “Tuzoobi aalukono munyika yabo alubo tuzoobi aachaabilo chanyika aakati kabo. Ime ndime chaabilo chako alukono lwako aakati kama-Israyeli.
21 Lino bona, ndapa bana baLevi chakkumi mu-Israyeli kuti chibe lukono lwabo akaambo kamilimu njibali kubeleka, milimu yaatente lyakuswaanganina. 22 Ma-Israyeli tabacheelede kuswena aafwiifwi atente lyakuswaanganina nkaambo kuti bachita oobo, balakonzya kubisya mpawo bafwe. 23 MaLevi mbabo beelede kubeleka milimu yaatente lyakuswaanganina alubo mbabo batazoolisandwide kumilandu yabo. Ooyu mulawu wamazyalani aanu woonse kukabe kutamani wakuti, tabanoolikwe lukono aakati kama-Israyeli. 24 Nkaambo ndapa maLevi chakkumi chazintu zipegwa aama-Israyeli kuli Jehova kuti chibe lukono lwabo. Nchindakati kulimbabo, ‘Tabeelede kuba aalukono aakati kama-Israyeli.’”
25 Mpawo Jehova wakati kuli Mozesi: 26 “Weelede kubuzya maLevi kuti, ‘Mulatambula chipanzi chakkumi nchindakamupa kuzwa kuma-Israyeli kuti chibe lukono lwanu mpawo kuzwa muli chakkumi eecho, mweelede kupa chakkumi kachili chipo kuli Jehova. 27 Alubo chilabonwa mbuli chipo chanu aanga nzipo zyazwa kulubuwa lwakupolela naakuti mbuli butebuzi bukkwene bwakuchikandilo chamasaansa naakuti chamafuta. 28 Eezi zizoopa kuti andinywe mupe Jehova chipo kuzwa kuli zyakkumi zyoonse nzimujana kuzwa kuma-Israyeli alubo mweelede kupa Aroni mupayizi chipo chaJehova kuzwa kulinzizyo. 29 Mweelede kupa zipo zisiyene-siyene kuli Jehova kuzwa kuzintu zyoonse zibotu nzimupegwa kazili zipo zisalala.’
30 “Alubo weelede kubabuzya kuti, ‘Nimupa zipo zyanu zibotu, zizoobonekaanga maLevi bazipa kazili butebuzi buzwa kulubuwa lwakupolela naakuti butebuzi buzwa kuchikandilo chawayini naakuti chamafuta. 31 Inywe abamung’anda yanu mulakonzya kuzilida kufumbwa ndawu nkaambo nimbadalo yamilimu yanu njimuchita aatente lyakuswaanganina. 32 Tamukooba aamulandu pe munkani eeyi, kufumbwa biyo kuti mwapa zintu zibotu kuzwa kulinzizyo alubo tamweelede kusofwaazya zintu zisalala zyama-Israyeli kuchitila kuti mutafwi.’”