Babetesi
3 Eezi nziizisi Jehova nzyaakazumizya kuti zisyaale, kuchitila kuti zisunke ma-Israyeli boonse batalwanide nkondo zyamuKkenani 2 (wakachita oobo kuchitila kuti mazyalani aama-Israyeli aakali kutobela aakatazi nkondo azibe nkondo): 3 baami bali musanu bamaFilisiti, amaKkenani boonse, maSidoni, amaHivi bakali kukkala muChilundu chaLebbanoni kuzwa kuChilundu chaBbaala-hemoni kuyoosika kuLebbo-hamati.* 4 Bakaba sunko kuma-Israyeli, kuchitila kuti kuboneke kuti ma-Israyeli bakali kuzooyiswiilila na milawu yaJehova njaakapede mawisi kwiinda muli Mozesi. 5 Nkinkaako, ma-Israyeli bakakkala aakati kamaKkenani, maHeti, ma-Amori, maPerezi, maHivi, amaJebbusi. 6 Bakali kukwata bana babo basimbi alubo bana babo basimbi bakali kubakwatya kubana babo balombe. Mpawo bakasaanguna kubelekela baleza babo.
7 Nkinkaako, ma-Israyeli bakachita zintu zibi mumeso aaJehova, bakamuluba Jehova Leza wabo, mpawo bakabelekela baBbaala azisamu zisalala.* 8 Bukali bwaJehova bwakavutukila ma-Israyeli mpawo wakabawuzya kuli Kkushani-rishatayimu mwaami waMesopotamiya.* Ma-Israyeli bakabelekela Kkushani-rishatayimu kwaminyaka iili musanu ayitatu. 9 Ma-Israyeli nibakayita Jehova kuti abagwasye, Jehova wakabapa mufutuli Otiniyeli mwana waKkenazi mwanike waKkalebbu kuti avune ma-Israyeli. 10 Muuya waJehova wakasika aalinguwe mpawo wakaba mubetesi wa-Israyeli. Naakayinka kunkondo, Jehova wakabikka Kkushani-rishatayimu mwaami waMesopotamiya* mukuboko kwakwe mpawo wakamuzunda. 11 Kuzwa waawo, nyika yakapumuna* kwaminyaka iili 40. Mpawo Otiniyeli mwana waKkenazi wakafwa.
12 Ma-Israyeli bakasaanguna lubo kuchita zintu zibi mumeso aaJehova. Mpawo Jehova wakalekela Egiloni mwaami waMowabbu kuti azunde ma-Israyeli, nkaambo bakali kuchita zintu zibi mumeso aaJehova. 13 Mukuyungizya, wakabeetela ma-Amoni ama-Amalekki. Bakalwana ma-Israyeli babweza muunzi watukunka. 14 Ma-Israyeli bakabelekela Egiloni mwaami waMowabbu kwaminyaka iili 18. 15 Mpawo ma-Israyeli bakayita Jehova kuti abagwasye. Nkinkaako, Jehova wakabapa mufutuli Ehudi mwana waGera wamusyobo waBbenjamini sichimweensi. Mukuya kwachiindi, ma-Israyeli bakamutuma kuti atole mutelo kuli Egiloni mwaami waMowabbu. 16 Kuchiindi eecho, Ehudi wakalipangila panga linenga koonse-koonse lilampa kkiyubbiti iimwi* mpawo wakalisekka kunsi aachigogo chakwe kuchibelo chakuchilisyo. 17 Mpawo wakapa Egiloni mwaami waMowabbu mutelo. Egiloni wakalineneede loko.
18 Ehudi naakazwa aakupa mutelo, wakabuzya bantu bakanyampwide mutelo kuti beende. 19 Pesi naakasika kuzikozyano zibezedwe* kuGiligali, wakabweeda mpawo wakati: “O Mwaami, ndili aamulumbe wansiswa ngundiyanda kukubuzya.” Mpawo mwaami wakati: “Musindo!” Mpawo babelesi bakwe boonse bakazwa. 20 Nkinkaako, Ehudi wakasika kulinguwe naakakkede alikke mukaanda kakwe kamujulu katontolela. Mpawo Ehudi wakati: “Ndili aamulumbe wako wazwa kuli Leza.” Mwaami wakanyampuka aachuuno chakwe chabwaami.* 21 Mpawo Ehudi wakasomona panga akuboko kwachimweensi lyakali kuchibelo chakuchilisyo mpawo wakamuyasa aandilyo mwida. 22 Chijatisyo apanga zyakabbila zyakuti mafuta akavumba panga nkaambo taakalisomona pe mwida lyakwe, mpawo doti lyakazwa. 23 Ehudi wakajala mulyango wang’anda yamujulu wakkiya mpawo wakazwida aamweenya. 24 Naakeenda, babelesi bakaboola bajana milyango yang’anda yamujulu ilikkiidwe. Nkinkaako, bakati: “Kweelede kuti ulikuligwasya* mukaanda kakwe kamujulu katontolela.” 25 Bakamulindila kusikila bakataazikana,* pesi nibakabona kuti talikujula milyango yamukaanda kamujulu, bakabweza kkii bajula mpawo bakabona mwaami wabo kanduumene kafwide.
26 Nibakachili kuwaya-waya, Ehudi wakachija wayinda aazikozyano zibezedwe* mpawo wakasika kuSeyira. 27 Naakasika wakalizya mweembo muchilawu chili aazilundu cha-Efremu; mpawo ma-Israyeli bakakunuka muchilawu chili aazilundu kalikubazulwida. 28 Mpawo wakati kulimbabo: “Amunditobele, nkaambo Jehova wabikka basinkondonyokwe maMowabbu mukuboko kwanu.” Nkinkaako, bakamutobela baakwiimikila kumazubukilo aaJodani kuti basinkile maMowabbu, taakwe ngubakazumizya kuti azubuke. 29 Aachiindi eecho, bakajaya maMowabbu basika ku 10 000, boonse bakali baalumi basimide bali aamanguzu; taakwe naaba uumwi wakachija. 30 Mubuzuba oobo, maMowabbu bakazundwa aama-Israyeli; mpawo nyika yakapumuna* kwaminyaka iili 80.
31 Nikwakazwa nguwe kwakatobela Shamuga mwana wa-Anati, ooyo wakajaya baalumi bamaFilisiti bali 600 kabelesya chibinzyo chang’ombe; anguwe wakavuna ma-Israyeli.