Babetesi
1 Joshuwa naakafwa, ma-Israyeli bakabuzya kuli Jehova kuti: “Ngwani aakati kesu uutasaangune kwiinka kuti akalwane maKkenani?” 2 Jehova wakasandula kuti: “Juda nguwe uutayinke. Amubone! Ndilikubikka* nyika mukuboko kwakwe.” 3 Mpawo Juda wakati kumukulanaakwe Simiyoni: “Atwiinkaamwi kuchilawu nchindakapegwa tukalwane maKkenani. Mpawo ndizooyinka aanduwe kuchilawu nchwaakapegwa.” Nkinkaako, Simiyoni wakayinka aamwi anguwe.
4 Juda naakayinka, Jehova wakabikka maKkenani amaPerezi mumaboko aabo, mpawo bakazunda baalumi bali 10 000 muBbezekki. 5 Bakajana Adoni-bbezekki muBbezekki mpawo bakalwanaawe nkukooko, bazunda maKkenani amaPerezi. 6 Adoni-bbezekki naakachija, bakamwaandilila bamujata, mpawo bakamugonka zyaala zyakumaboko azyakumawulu. 7 Mpawo Adoni-bbezekki wakati: “Kuli baami bali 70 bakagonkwa zyaala zyakumaboko azyakumawulu, ibabwezelela chakulya munsi aatebbulu lyangu. Leza wandichitila mbuli mbundakachita.” Kuzwa waawo, bakamutola kuJerusalema waakufwida nkukooko.
8 Mukuyungizya, baalumi baJuda bakalwana muunzi waJerusalema bawubweza; bakawunyonyoona apanga bawutenta amulilo. 9 Mpawo baalumi baJuda bakakunuka baakulwana maKkenani bakakkede muchilawu chili aazilundu, muNegebbu amuShefela. 10 Mpawo maJuda bakalwana maKkenani ibakali kukkala muHebburoni (chiindi Hebburoni yakali kwiitwa kuti Kkiriyati-abba), bakajaya Sheshayi, Ahimani, aTalimayi.
11 Bakazwa nkukooko baakulwana bantu bakali kukkala muDebbiri. (Chiindi Debbiri yakali kwiitwa kuti Kkiriyati-seferi.) 12 Mpawo Kkalebbu wakati: “Muntu uutalwane muunzi waKkiriyati-seferi akuuzunda, ndilamupa mwanaangu musimbi Akkisa kuti abe mwanakazi wakwe.” 13 Mpawo Otiniyeli mwana waKkenazi mwanike waKkalebbu wakawuzunda. Mpawo wakamupa mwanaakwe musimbi Akkisa kuti abe mwanakazi wakwe. 14 Akkisa naakali kuya kung’anda, wakakombelezya mulumaakwe kuti akumbile muunda kuli wisi. Akkisa wakaseluka aadonki lyakwe.* Mpawo Kkalebbu wakamubuzya kuti: “Uyandaanzi?” 15 Akkisa wakati kulinguwe: “Inche kaka ndilongezye, nkaambo wakandipa nyika iili kumusanza;* ndipe lubo aGuloti-mayimu.”* Nkinkaako, Kkalebbu wakamupa Guloti Yaatala aGuloti Yamunsi.
16 Mpawo bana baKkeni wisizyala waMozesi bakazwa mumuunzi watukunka aamwi abantu baJuda, baya munkanda yaJuda kumusanza kwa-Aradi. Bakakkala nkukooko abantu bamundawu eeyo. 17 Pesi Juda wakeendaamwi amukulana wakwe Simiyoni baakulwana maKkenani bakali kukkala kuZefati mpawo bawunyonyoona. Bakawuzika muunzi ooyo kuti Homa.* 18 Mpawo Juda wakabweza Gaza achilawu chayo, Ashikkeloni achilawu chayo, a-Ekkironi achilawu chayo. 19 Jehova wakali aaJuda, bakabweza chilawu chili aazilundu pesi bakakachilwa kutanda bantu bakali kukkala munyika eeyo yantandabale,* nkaambo bakali aangolo zyankondo zyakali aansimbi zibosya mumavili.* 20 Hebburoni bakayipa Kkalebbu mbuli Mozesi mbaakasyomezya, mpawo Kkalebbu wakatanda bana ba-Anakki batatu bakali kukkala mundawu eeyo.
21 Pesi bamusyobo waBbenjamini teebakabatanda pe maJebbusi bakali kukkala muJerusalema. Nkinkaako, maJebbusi bachikkalaamwi abamusyobo waBbenjamini muJerusalema kusikila sunu.
22 Aachiindi eecho, bana baJosefa bakayinka baakulwana Bbeteli, Jehova wakali aambabo. 23 Bana baJosefa bakasaanguna kulanga-langa muunzi waBbeteli (chiindi, muunzi ooyu wakali kwiitwa kuti Luzi), 24 mpawo basikulanga-langa muunzi bakabona umwi mwaalumi wakali kuzwa mumuunzi. Bakati kulinguwe: “Inche kaka tutondeezye nzila iinjila mumuunzi, tulakufwida luzyalo.”* 25 Mwaalumi ooyo wakabatondeezya nzila iinjila mumuunzi, mpawo muunzi ooyo bakawunyonyoona apanga. Pesi mwaalumi ooyo ampuli yakwe yoonse bakabaleka kuti beende. 26 Mwaalumi ooyo wakayinka kunyika yamaHeti, waakuyaka muunzi akuuwuzika kuti Luzi. Muunzi ooyo uchiitwa aazina eeli kusikila sunu.
27 Bamusyobo waManase teebakayibweza pe Bbeti-sheyani amyuunzi yayo miniini, Taanakki amyuunzi yayo miniini, bantu bamuDori amyuunzi yayo miniini, bantu bamu-Ibbiliyamu amyuunzi yayo miniini, abantu bamuMegido amyuunzi yayo miniini. MaKkenani bakayinkilila kunembo kukkala munyika eeyi. 28 Ma-Israyeli nibakaba aamanguzu, bakapa kuti maKkenani babeleke milimu yabuzike, pesi teebakabatanda pe boonse.
29 Bamusyobo wa-Efremu teebakabatanda pe maKkenani bakali kukkala muGezeri. MaKkenani bakayinkilila kunembo kukkala aakati kabo muGezeri.
30 Bamusyobo waZebbuloni teebakabatanda pe bantu bakali kukkala kuKkitironi abakali kukkala kuNahaloli. MaKkenani bakayinkilila kunembo kukkala aakati kabo alubo bakabapa milimu yabuzike.
31 Bamusyobo wa-Asha teebakabatanda pe bantu baku-Akko abakuSidoni, baku-Ahalabbu, baku-Akkizibbu, bakuHelibba, baku-Afikki, abakuRehobbu, 32 Nkinkaako, bamusyobo wa-Asha bakayinkilila kunembo kukkala aakati kamaKkenani bakakkede munyika eeyo, nkaambo teebakabatanda pe.
33 Bamusyobo waNafutali teebakabatanda pe bantu bakuBbeti-shemeshi abakuBbeti-anati, pesi bakayinkilila kunembo kukkala aakati kamaKkenani bakakkede munyika eeyo. Bantu bakuBbeti-shemeshi abakuBbeti-anati bakaba babelesi babo babeleka milimu yabuzike.
34 Ma-Amori bakasinkila bamusyobo waDani muchilawu chili aazilundu, teebakabazumizya pe kuti baseluke baze muntandabale.* 35 Nkinkaako, ma-Amori bakakaka kuzwa muChilundu chaHeresi, mu-Ayijaloni, amuShaalibbimu. Pesi bamung’anda yaJosefa nibakayungizya kuba aamanguzu,* bakapa kuti babeleke milimu iiminia. 36 Chilawu chama-Amori chakali kutalikila kumatantilo aa-Akkirabbimu, kuzwa kuSela kuya aajulu.