Babetesi
18 Mumazuba aayo, teekwakalikwe mwaami pe mu-Israyeli. Alubo musyobo waDani wakali kuyanduula lukono lwakuti ukkale mulindulo, nkaambo kusika aachiindi eecho, teebakalinapegwa pe lukono aakati kamisyobo ya-Israyeli.
2 Bamusyobo waDani bakatuma baalumi basimide bali musanu kuzwa mumpuli yabo, kabazwa kuZora aku-Eshitayoli, kuti bakalange-lange nyika babone mbiibede. Bakababuzya kuti: “Amweende mukabone mbiibede nyika.” Nibakasika muchilawu chili aazilundu cha-Efremu kung’anda yaMikka, bakoona nkukooko. 3 Nibakasika aafwiifwi ang’anda yaMikka, bakaliziba jwi lyamulombe* muLevi mpawo bakamwiinkila bamubuzya kuti: “Ngwani wakakweeta ookuno? Uchitaanzi ookuno? Ukkalilideenzi ookuno?” 4 Wakabasandula kuti: “Mikka wakandichitila eechi acheechi, wazoondinjizya mulimu wakuti ndibe mupayizi wakwe.” 5 Mpawo bakamubuzya kuti: “Tubuzizye kuli Leza tuzibe kuti lweendo lwesu lulazwidilila na.” 6 Mupayizi wakababuzya kuti: “Amwiinke muluumuno. Jehova unooli aandinywe mulweendo lwanu.”
7 Nkinkaako, baalumi bali musanu bakayinka basika kuLayishi. Bakabona bantu bakali kulisyoma mbuli maSidoni. Bakakkede muluumuno kabalyiibide, kakutakwe sinkondonyina wakali kubadyaaminina munyika yabo. Bakali kukkala kule amaSidoni alubo taakwe muntu ngubakali kumvwananaawe pe.
8 Nibakabweeda kubabbululu babo kuZora aku-Eshitayoli, babbululu babo bakababuzya kuti: “Mwakeenda biyeni?” 9 Bakasandula kuti: “Atwiinke tukabalwane, nkaambo twakabona kuti nyika yabo nimbotu. Mulengwaaninaanzi? Mutanonoki pe kweenda kuti mukayibweze. 10 Nimwasika nkuko, mulajana bantu balyiibide, nyika yabo nimpati. Leza wayibikka mukuboko kwanu, ninyika iili aazintu zyoonse zijanika aanyika.”
11 Mpawo baalumi bali 600 balibambilide nkondo bazwa mumpuli yamusyobo waDani, bakazwa kuZora aku-Eshitayoli. 12 Bakatanta baakukkempa kuKkiriyati-jeyarimu iili muJuda. Nkinkaako, ndawu eeyo iili kububbila kwaKkiriyati-jeyarimu yiitwa kuti Mahane-dani* kusikila sunu. 13 Bakazwa nkukooko bayinka kuchilawu chili aazilundu cha-Efremu mpawo bakasika kung’anda yaMikka.
14 Mpawo baalumi bali musanu bakali bayinka kukulanga-langa nyika yaLayishi, bakabuzya babbululu babo kuti: “Mulizi na kuti mumaanda aaya muli kabaki kabupayizi, zibumbwa,* chikozyano chibezedwe, achifanikisyo chansimbi?* Amuyeeye nzimweelede kuchita.” 15 Nkinkaako, bakayimikila nkukooko, mpawo bakayinka kung’anda yamulombe muLevi kung’anda yaMikka baakubuzya mbaakali kupona. 16 Aachiindi eecho, baalumi bamusyobo waDani bali 600 balibambilide nkondo bakaliimvwi kugeedi. 17 Baalumi bali musanu ibakayinkide kukulanga-langa nyika bakanjila mukati babweza chikozyano chibezedwe, kabaki kabupayizi, zibumbwa,* achikozyano chansimbi.* (Mupayizi wakaliimvwi kugeedi abaalumi bali 600 balibambilide kulwana nkondo.) 18 Bakanjila mung’anda yaMikka babweza chikozyano chibezedwe, kabaki kabupayizi, zibumbwa,* achikozyano chansimbi.* Mupayizi wakababuzya kuti: “Muchitaanzi?” 19 Pesi bakamubuzya kuti: “Wumuna. Jala mulomo wako ututobele ube ndeende* amupayizi wesu. Nziizili zili kabotu, kuti ube mupayizi wamuntu uumwi naakuti wamusyobo ampuli ya-Israyeli?” 20 Muzeezo ooyu wakamubotela mupayizi. Nkinkaako, wakabweza kabaki kabupayizi, zibumbwa,* achikozyano chibezedwe mpawo wakayinka aabantu aabo.
21 Nibakanyampuka kuti beende, bakabikka bana, zivuubwa, azintu ziyandikana kunembo lyabo. 22 Nibakeenda musinzo mulamfu kuzwa kung’anda yaMikka, baalumi bakkala aafwiifwi ang’anda yaMikka bakabunganaamwi kuti babatobele. Bakatobela bamusyobo waDani mpawo bakabeenzya. 23 Nibakasompezya, bamusyobo waDani bakachengunuka mpawo bakabuzya Mikka kuti: “Niinzi chakataazya? Nkamboonzi nwaaza aabantu biingi oobu?” 24 Mpawo wakasandula kuti: “Kujana mwandibuzya kuti, ‘Niinzi chakataazya,’ kakuli mwabweza mupayizi wangu abaleza bangu mbindakapanga?” 25 Mpawo bamusyobo waDani bakamuvwiila kuti: “Watusabila, baalumi aaba banyemede balakuchisa mpawo bakujaye abamung’anda yako.” 26 Nkinkaako, bamusyobo waDani bakayinkilila kunembo alweendo lwabo; mpawo Mikka wakabweeda kung’anda yakwe naakabona kuti baalumi aabo bakali aamanguzu kwiinda nguwe.
27 Nibakabweza mupayizi azintu nzyaakapanga Mikka, bakayinka kuLayishi kubantu bakakkede muluumuno kabalyiibide. Bakabajaya apanga mpawo muunzi ooyo bakawutenta aamulilo. 28 Taakwe muntu wakabavuna pe, nkaambo bakali kule akuSidoni alubo taakwe muntu ngubakali kulidilanaawe pe. Muunzi ooyo wakali mukkuti* lyakali lyaBbeti-rehobbu. Bamusyobo waDani bakawuyakulula lubo muunzi ooyo, bakkala mulinguwo. 29 Mukuyungizya, muunzi ooyo bakawuuzika zina lyawisi lyakuti Dani, mwana wa-Israyeli. Pesi chiindi, muunzi ooyo wakali kwiitwa kuti Layishi. 30 Bamusyobo waDani bakalyiimikizizya chikozyano chibezedwe. Jonatani mwana waGeshomu mwana waMozesi abana bakwe bakaba bapayizi bamusyobo waDani kusikila mubuzuba bantu bamunyika eeyo nibakatolwa mubuzike. 31 Alubo bakayimikizya chikozyano chibezedwe chakapangwa aaMikka, chakali nkukooko mazuba woonse ng’anda yaLeza wakasimpe niyakali kuShilo.