Nehemiya
4 Sanibbalati mbaakamvwa biyo kuti twakali kuyakulula muduli, wakanyema loko alubo wakayinkilila kunembo kusampawula maJuda. 2 Kalaamwi abeenzinyina ankamu yamasooja yamaSamariya wakati: “Niinzi loko nzibali kuchita maJuda batakwe manguzu? Nga balawubeleka na mulimu ooyu kabali aabalikke? Nga bazoopa zipayizyo na? Nga balawumaninsya na mubuzuba bumwi? Nga balakonzya na kufukununa mabwe aakapya aali kunsi aamagadi kuti baabelesye lubo?”
3 Mpawo Tobbiya mu-Amoni wakayimvwi kumbali lyakwe wakati: “Naba mwaaba kuti watanta aamuduli wamabwe ngubalikuyaka, ulawukolomona.”
4 Mpawo ndakakomba kanditi, “Swiilila O Leza wesu, nkaambo tulikufubaazigwa, pa kuti masampu aabo abweede aamitwe yabo alubo pa kuti bazundwe aabasinkondonyina akuti babe bazike kuliimwi nyika. 5 Utavumbi mulandu wabo nikuba kupa kuti chibi chabo chizimwe kunembo lyako nkaambo batukila bayaki.”
6 Twakayinkilila kunembo kuyaka muduli mpawo woonse wakajatana, wakayakululwa kusika aahafu yabulamfu bwawo. Bantu bakayinkilila kunembo kubeleka mulimu amoyo wabo woonse.
7 Sanibbalati, Tobbiya, ma-Arabbiya, ma-Amoni, ama-Ashidodi mbubakamvwa biyo kuti miduli yaJerusalema ilikubambululwa akuti myeenya ilikusinkwa, bakanyema loko. 8 Bakazuminana kuti babunganaamwi kuti balwane Jerusalema akwiinyongania. 9 Pesi twakakomba kuli Leza wesu alubo twakabikka balindi bakali kutukwabilila kuzwa kulimbabo sikati amansiku.
10 Nikuba oobo, maJuda bakali kwaamba kuti: “Basikubeleka* tabachikwe manguzu pe, kuchili magadi miingi loko, tatuzookonzyi pe kumaninsya kuyaka muduli.”
11 Basinkondoma bakaliswini kwaamba kuti: “Kabatanaziba nikuba kutubona, tulayinka tunjile aakati kabo tubajaye, tulesye mulimu.”
12 Chiindi choonse maJuda bakali kukkala aafwiifwi ambabo nibakali kunjila, bakali kukkala kabatubuzya* kuti: “Bazooboola batulwane kabazwa kumabazu woonse.”
13 Nkinkaako, ndakabikka bantu mundawu zili munsi kusule aamuduli, mundawu zyakachili aamyeenya. Ndakababikka kweendelana ampuli zyabo kabajisi mapanga, masumu atwaanta. 14 Nindakabona kuti baliyoowede, ndakanyampuka mpawaawo mpawo ndabuzya baalumi balemekwa abatobeli babeendelezi abantu boonse kuti: “Mutabayoowi pe. Amuyeeye Jehova, mupati alubo uyoosya, amulwanine babbululu banu, bana banu balombe abasimbi, banakazi banu amyuunzi yanu.”
15 Lino basinkondoma nibakamvwa kuti twakali twaziziba nzibakali kuchita akuti Leza wakasimpe wakali wamwaya mabambe aabo, toonse twakabweeda kumulimu wakuyaka muduli. 16 Kuzwa mubuzuba oobo kaziya kunembo, hafu yabaalumi mbindakali aabo bakali kubeleka mpawo imwi hafu yabo yakajisi masumu, ntobo, twaanta alubo bakazweete tubaki twansimbi twakunkondo. Basilutwe bakaliimvwi kabali kugwasya maJuda 17 aabo bakali kuyaka muduli. Aabo bakali kususa zintu bakali kubeleka aakuboko kumwi mpawo kumwi kakujisi chilwanisyo. 18 Sikuyaka umwi awumwi wakali aapanga lyakwe lyakasekkedwe aakasolo naakali kuyaka, mpawo sikulizya mweembo wakaliimvwi kumbali lyangu.
19 Ndakabuzya baalumi balemekwa abatobeli bamweendelezi abantu boonse kuti: “Kuchili mulimu mwiingi loko aamuduli alubo tulitantamukene, umwi kuzwa kumweenzinyina. 20 Nimwamvwa kulila kwamweembo, amuzoobunganine ookuno nkutubede, Leza wesu ulatulwanina.”
21 Twakayinkilila kunembo kubeleka mpawo imwi hafu yabantu bakajisi masumu kuzwa kubuchedo kusika mansiku nizizwa nyenyeezi. 22 Aachiindi eecho, ndakabuzya bantu kuti: “Mwaalumi umwi awumwi amubelesi wakwe abakkale muJerusalema mansiku, batulinde mansiku mpawo babeleke sikati.” 23 Ime nibaba babbululu bangu, babelesi bangu abalindi bakali kunditobela, taakwe nitwakachincha zigogo zyesu pe, umwi awumwi wesu wakajisi chilwanisyo chakwe mukuboko kwachilisyo.