Nehemiya

12 Aaba mbiibapayizi amaLevi bakazwa mubuzike kabalaamwi aZerubbabbeli mwana waShelatiyeli, aJeshuwa: Seraya, Jeremiya, Ezra, 2 Amariya, Malukki, Hatushi, 3 Shekkaniya, Rehumu, Meremoti, 4 Ido, Ginetoyi, Abbija, 5 Mijamini, Maadiya, Bbiliga, 6 Shemaya, Joyiyaribbu, Jedaya, 7 Salu, Amokki, Hilikkiya, aJedaya. Aaba mbiibasilutwe babapayizi ababbululu babo mumazuba aaJeshuwa.

8 MaLevi mbaba: Jeshuwa, Bbinuyi, Kkadimiyeli, Sherebbiya, Juda, aMataniya ooyo wakali kuzulwida nyimbo zyakulumba kalaamwi ababbululu bakwe bachaalumi. 9 Bbakkibukkiya a-Uni babbululu babo bakaliimvwi kabalangene aabo kabali kulinda.* 10 Jeshuwa wakazyala Joyiyakkimu, Joyiyakkimu wakazyala Eliyashibbu, mpawo Eliyashibbu wakazyala Joyiyada. 11 Joyiyada wakazyala Jonatani mpawo Jonatani wakazyala Jaduwa.

12 Mumazuba aaJoyiyakkimu, mbaba bakali bapayizi, basilutwe bamaanda aamawisi: yaSeraya wakali Meraya; yaJeremiya wakali Hananiya; 13 ya-Ezra wakali Meshulamu; ya-Amariya wakali Jehohanani; 14 yaMalukki wakali Jonatani; yaShebbaniya wakali Josefa; 15 yaHarimu wakali Adina; yaMerayoti wakali Helikkayi; 16 ya-Ido wakali Zakkariya; yaGinetoni wakali Meshulamu; 17 ya-Abbija wakali Zikkiri; yaMiniyamini, . . . ;* yaMowadiya wakali Pilitayi; 18 yaBbiliga wakali Shamuwa; yaShemaya wakali Jehonatani; 19 yaJoyiyaribbu wakali Matenayi; yaJedaya wakali Uzi; 20 yaSalayi wakali Kkalayi; ya-Amokki wakali Ebberi; 21 yaHilikkiya wakali Hashabbiya; yaJedaya wakali Netaneli.

22 Basilutwe bamaanda aamawisi aamaLevi mumazuba aa-Eliyashibbu, Joyiyada, Johanani, aJaduwa bakalembwa mbuli mbubakalembwa bapayizi, kusika muchiindi chabweendelezi bwaDariyasi muPesiya.

23 MaLevi bakali basilutwe bamaanda aamawisi bakalembwa mubbuku lyamakani aachiindi aamuchiindi eecho, kuzoosika mumazuba aaJohanani mwana wa-Eliyashibbu. 24 Basilutwe bamaLevi mbaba: Hashabbiya, Sherebbiya, aJeshuwa mwana waKkadimiyeli ababbululu babo bakayimvwi kabalangene aambabo kuti bayimbe nyimbo zyakutembawula Leza akulumba kweendelana amalayilile aaDavida muntu waLeza wakasimpe, kabunga kabalindi kakalangene aakabunga kabalindi akamwi. 25 Mataniya, Bbakkibukkiya, Obbadiya, Meshulamu, Talimoni, a-Akkubbi bakaliimvwi kabali balindi bamageedi. Bakali kulinda maanda aakubambila zintu kabali aamageedi. 26 Baalumi aaba bakabeleka mumazuba aaJoyiyakkimu mwana waJeshuwa mwana waJozadakki amumazuba aaNehemiya mweendelezi a-Ezra mupayizi kumwi kali mulembi.*

27 Nikwakali kupobwedwa miduli yaJerusalema, bakayanduula maLevi babeeta kuJerusalema kuzwa mundawu zyoonse nzibakali kukkala kuti bazoosekelele pobwe eeli kabali kwiimba nyimbo zyakulumba kababelesya nsimbi zyuumanisigwaamwi, zibelesyo zyantambo, atuntimbwa. 28 Mpawo bana babayimbi* bakabunganaamwi kuzwa muBbooma,* kuzwa mundawu zyoonse zizyungulukide Jerusalema, kuzwa mumyuunzi yamaNetofa, 29 kuzwa kuBbeti-giligali, akuzwa kuzilawu zyaGebba azya-Azimaveti, nkaambo bayimbi bakali baliyakila myuunzi mundawu zyoonse zizyungulukide Jerusalema. 30 Bapayizi amaLevi bakalisalazya mpawo bakasalazya bantu, mageedi amuduli.

31 Mpawo ndakatola basilutwe bamaJuda aajulu aamuduli. Mukuyungizya, ndakasala nkamu zibili zipati zyabayimbi banyimbo zyakulumba atubunga twabantu bakali kubatobela. Kamwi kabunga kakeendela kubbazu lyakuchilisyo aamuduli kakatozya kuGeedi lyaMilwi yaDyota. 32 Hoshaya ahafu yabasilutwe bamaJuda yakali kweenda musule lyabo, 33 kabalaamwi a-Azariya, Ezra, Meshulamu, 34 Juda, Bbenjamini, Shemaya, aJeremiya. 35 Bakalaamwi abana babapayizi bamwi bakali aamyeembo: Zakkariya mwana waJonatani mwana waShemaya mwana waMataniya mwana waMikkaya mwana waZakkuri mwana wa-Asafu, 36 bamwi mbaakali aabo mbaba: Shemaya, Azareli, Milalayi, Gilalayi, Maayi, Netaneli, Juda, aHanani, bakali aazibelesyo zyakwiimbya zyaDavida muntu waLeza wakasimpe, mpawo Ezra mulembi* wakaya kunembo lyabo. 37 Kuzwa kuGeedi lyakuKasawu, bakeenda balulama kumatantilo aaMuunzi waDavida mpawo bakatanta bayinda aamuduli aajulu aang’anda yaDavida baakusika kuGeedi lyaMaanzi kubuzwezuba.

38 Mpawo imwi nkamu yabayimbi banyimbo zyakulumba yakali kweendela kuli limwi bbazu.* Ndakabatobela kandili aahafu yabantu, twakayinda aajulu aamuduli waNgazi yama-Oveni kuyoosika kuMuduli Uukwankwamukide 39 alubo twakayinda aajulu kuGeedi lya-Efremu akuGeedi lyaMuunzi Wachiindi akuGeedi lyaBaswi, kuNgazi yaHananeli, Ngazi yaMiya, akuGeedi lyaMbelele; mpawo bakayimikila kuGeedi lyaBalindi.

40 Nkamu zibili zyabayimbi banyimbo zyakulumba bakayimikila kwachiindi chilamfu kunembo lyang’anda yaLeza wakasimpe; mpawo ime ahafu yabatobeli babeendelezi njindakalaayo twakayimikila, 41 abapayizi aaba, Eliyakkimu, Maaseya, Miniyamini, Mikkaya, Eliyonayi, Zakkariya, aHananiya bakali aamyeembo, 42 aMaaseya, Shemaya, Eliyezari, Uzi, Jehohanani, Malikkija, Elamu, a-Ezeri. Bayimbi bakayimba ajwi lili aajulu kabali aansi aamulangizi Izrahaya.

43 Mubuzuba oobo, bakapa zipayizyo zyiingi loko alubo bakasekelela, nkaambo Leza wakasimpe wakapa kuti bakondwe loko. Banakazi abana ambabo bakasekelela, zyakuti kusekelela kwakali muJerusalema kwakali kumvwikka kundawu zili kule loko.

44 Mubuzuba oobo, kwakasalwa baalumi kuti balanganie maanda aakubambila zintu, maanda aakubikkila zipo, michelo iisaanguna kubizwa, azyakkumi. Mumaanda aayo, bakeelede kubikka zintu nzibajana kuzwa mumyuunda yamumyuunzi nzibakeelede kupa bapayizi amaLevi kweendelana azyakalembedwe muMulawu, nkaambo kwakali kusekelela kupati muJuda akaambo kabapayizi amaLevi bakali kubeleka. 45 Mukuyungizya, bakasaanguna kubeleka milimu yaLeza wabo amulimu wakusalazya, mbuli mbubakali kuchita bayimbi abalindi bamageedi, kweendelana amalayilile Davida amwanaakwe Solomoni ngibakapa. 46 Nkaambo chiindi mumazuba aaDavida a-Asafu, kwakali beendelezi* babayimbi abanyimbo zyakutembawula azyakulumba Leza. 47 Mumazuba aaZerubbabbeli amumazuba aaNehemiya, ma-Israyeli boonse bakali kupa zyaabilo kubayimbi akubalindi bamageedi kweendelana azyakali kuyandikana buzuba abuzuba. Alubo bakali kusanga zipo zyakupa maLevi. Ambabo maLevi bakali kusanga kuzwa kuzipo nzibakali kupegwa kuti zipegwe bana ba-Aroni.