Esita
3 Nizyakayinda zintu eezi, mwaami Ahasuwera wakasumpula Hamani mwana waHamedata mu-Agagi, akumupa chuuno chisumpukide kwiinda bamwi beendelezi boonse bakali aamwi anguwe. 2 Babelesi boonse bamwaami bakali kugeedi lyamwaami bakali kooba akumufugamina Hamani, nkaambo eezi nzizyo nzyaakalayilila mwaami atala anguwe. Pesi Modekkayi wakakaka kooba akumufugamina. 3 Nkinkaako, babelesi bamwaami bakali kugeedi lyamwaami bakabuzya Modekkayi kuti: “Nkamboonzi nutaswiilili mulawu wamwaami?” 4 Buzuba abuzuba bakali kumubuzya, pesi taakali kubaswiilila pe. Mpawo babelesi aabo bakabuzya Hamani kuchitila kuti bamvwe kuti nzyaakali kuchita Modekkayi zyakali kuzumizigwa na, nkaambo wakali wababuzya kuti muJuda.
5 Hamani naakabona kuti Modekkayi wakali kukaka kooba akumufugamina, wakanyema loko. 6 Wakabona kuti taakwe nzyanooli wachita pe kuti wajaya Modekkayi alikke, nkaambo bakali bamubuzya atala abantu bamusyobo waModekkayi. Nkinkaako, Hamani wakasaanguna kuyanduula nzila yakunyonyoona maJuda boonse bakali mubweendelezi boonse bwa-Ahasuwera, nkukwaamba bantu boonse baModekkayi.
7 Mumweezi wakusaanguna, nkukwaamba mweezi waNisani,* mumunyaka wachi 12 wabweendelezi bwamwaami Ahasuwera, bakawaala Puri (nkukwaamba Chisale) kunembo lyaHamani, kuchitila kuti babone buzuba amweezi nibakali kuzoozichita mpawo yakawida mumweezi wachi 12, nkukwaamba mweezi wa-Ada.* 8 Hamani wakabuzya mwaami Ahasuwera kuti: “Kuli bamwi bantu bamwayikide, bali koonse-koonse aakati kabantu bali muzilikiti zyabweendelezi bwako. Bali aamilawu iisiyene ayabantu boonse; alubo tabaswiilili milawu yamwaami. Tazili kabotu pe kuti mwaami abasiye kupela. 9 Kuti kazimubotela mwaami, akulembwe mulawu wakuti banyonyoonwe. Ndilapa balupati-pati matalenta* aansiliva aali 10 000 kuti bakaabikke muchibikkilo chamali chamwaami.”*
10 Mpawo mwaami wakagwisya ring’i yakwe iili aachidindo mukuboko kwakwe akwiipa Hamani mwana waHamedata mu-Agagi, ooyo wakali sinkondonyina wamaJuda. 11 Mwaami wakati kuli Hamani: “Nsiliva abantu zyabikkwa mumaboko aako, chita nzubona kuti zilikabotu.” 12 Balembi bamwaami bakayitwa mubuzuba bwachi 13 bwamweezi wakusaanguna. Bakalemba malayilile woonse aaHamani aakeelede kuya kuli balupati-pati bamwaami, beendelezi bazilikiti abeendelezi babantu basiyene-siyene. Chilikiti chimwi achimwi chakalembelwa kweendelana ambuchakali kulemba alubo bantu bamwi abamwi kweendelana amulaka wabo. Malayilile aayo akalembwa muzina lyamwaami Ahasuwera, alubo akadindwa aaring’i yamwaami iili aachidindo.
13 Magwalo aayo akatolwa aabatumwa muzilikiti zyoonse zyamwaami, alubo akali aamalayilile aakali kubazumizya kulobya, kujaya akunyonyoona maJuda boonse, baniini abapati, bana abanakazi, mubuzuba bumwi biyo, mubuzuba bwachi 13 bwamweezi wachi 12, nkukwaamba mumweezi wa-Ada, akuti babweze lubono lwabo. 14 Zintu zyakali mumagwalo aayo zyakeelede kuba mulawu muchilikiti chimwi achimwi alubo zyakeelede kwaambilizigwa kubantu boonse, kuchitila kuti balibambile buzuba oobo. 15 Batumwa bakayinka chakufwambaana mbuli mbaakalayilila mwaami. Mulawu wakazwa muShushani,* muunzi uukwabilidwe.* Mwaami aHamani bakakkala kuti banywe, pesi muunzi waShushani* wakali mumanyongwe.