Esita
1 Mumazuba aa-Ahasuwera,* nkukwaamba Ahasuwera wakali kweendelezya zilikiti zili 127, kuzwa ku-Indiya kusika ku-Itopiya,* 2 mumazuba aayo, mwaami Ahasuwera naakakkede aachuuno chakwe chabwaami muShushani,* muunzi uukwabilidwe,* 3 mumunyaka wachitatu wabweendelezi bwakwe, wakabachitila pobwe beendelezi bakwe boonse ababelesi bakwe. Masooja aakuPesiya akuMediya, balemekwa abalupati-pati bazilikiti, bakalaamwi anguwe 4 alubo wakabatondeezya bunoti bwabwaami bwakwe bugambya abupati bwakwe abubotu bwabulemu bwakwe kwamazuba miingi, mazuba aali 180. 5 Mazuba aayo naakamana, mwaami wakabachitila pobwe lyamazuba aali musanu aabili bantu boonse bakali muShushani,* muunzi uukwabilidwe,* kuzwa kumupati kusikila kumuniini, mubbuwa bbotu lyamuunzi wamwaami. 6 Kwakali milembo mibotu, milembo mibotu yatonje amilembo yabbuluu yakasungidwe antambo zyabusumyo bubotu azyawulu yapepulu zyakanjide mumaring’i aansiliva, mapila aapangidwe aamabwe mabotu, zyuuno zyangolida azyansiliva, lubuwa luyalidwe aamabweluuma, mabwe mabotu, maparela amabwe mabotu aasiya.
7 Wayini yakali kunywidwa munkomeki* zyangolida. Nkomeki imwi ayimwi yakasiyene aayimwi, wayini yamwaami yakali nyingi loko kweendelana abunoti bwamwaami. 8 Taakwe wakabikkilidwe mulawu* wakuti anywe zili biyeni, nkaambo mwaami wakali wabamba abalupati-pati bamung’anda yakwe kuti umwi awumwi wakeelede kuchita mbuli mbayanda.
9 Namalelo Vashiti anguwe wakabachitila pobwe banakazi bakali mung’anda yaMwaami* Ahasuwera.
10 Mubuzuba bwamusanu aabili, chiindi moyo wamwaami nwaakaboteledwe akaambo kawayini, wakabuzya Mehumani, Bbizita, Habbona, Bbigita, Abbagata, Zetari aKkakkasi, balupati-pati bali musanu ababili bakali babelesi baMwaami Ahasuwera, 11 kuti bamweetele Namalelo Vashiti, kazweete ngowani yabwaami, kuchitila kuti bantu abeendelezi abatondeezye bubotu bwakwe, nkaambo wakali mubotu loko. 12 Pesi Namalelo Vashiti wakali kukaka kwiinka, taakawuswiilila pe mulayizyo wamwaami ngwaakabuzigwa aabalupati-pati bamung’anda yamwaami. Eezi zyakamunyemya loko mwaami alubo wakalutila.
13 Mpawo mwaami wakaambuula aabaalumi basongo bakali aaluzibo atala amakani aachiindi* (nkaambo oobu mbombubo makani aamwaami mbaakali kweetwa kubantu boonse bakazi mulawu akubeteka makani 14 alubo bantu mbaakali kumvwanana loko ambabo, nguKkashena, Shetari, Adimata, Tashishi, Meresi, Masena aMemukkani, beendelezi bali musanu ababili baPesiya aMediya, bakali kuzumizigwa kusika kumwaami alubo bakali aazyuuno zisumpukide mubwaami). 15 Mwaami wakabuzya kuti: “Kweendelana amulawu, niinzi nzyayelede kuchitwa Namalelo Vashiti, mbukunga taaswiilila nzyaamba mwaami Ahasuwera kabelesya balupati-pati bamung’anda yamwaami?”
16 Mpawo Memukkani wakati kunembo lyamwaami akubeendelezi: “Namalelo Vashiti taabisizya mwaami kupela, pesi wabisizya beendelezi boonse abantu boonse bali muzilikiti zyaMwaami Ahasuwera. 17 Nkaambo nzyaachita namalelo zizoozibinkana abanakazi boonse, mpawo bazoowubaansya balumi babo akwaamba kuti, ‘Temwaami Ahasuwera wakaamba kuti Namalelo Vashiti ayetwe kulinguwe, pesi wakakaka.’ 18 Buzuba oobuno, banakazi babeendelezi baPesiya aMediya, bazi nzyaachita namalelo, bazoowamba oobo kubalumi babo, nkukwaamba beendelezi boonse bamwaami akupa kuti kube kunyansyania kupati akunyemezyania. 19 Kuti kazimubotela mwaami, abikke mulawu alubo awulembwe aakati kamilawu yaPesiya aMediya, eeyo iitakonzyi kuzimwa, wakuti Vashiti atachizoosiki lubo pe kunembo lyamwaami Ahasuwera; alubo mwaami amunyange chuuno chakwe chamubwaami, achipe umwi mwanakazi uulikabotu kwiinda nguwe. 20 Alubo kuti mulawu wamwaami wamvwigwa mubweendelezi bwakwe boonse bupati, banakazi boonse bazoolemeka balumi babo, kuzwa kumupati kusikila kumuniini.”
21 Muzeezo ooyu wakamubotela mwaami abeendelezi, alubo mwaami wakachita nzyaakaamba Memukkani. 22 Nkinkaako, wakatumizya magwalo muzilikiti zyoonse zyamubweendelezi bwakwe, chilikiti chimwi achimwi chakalembelwa kweendelana ambuchilemba, alubo bantu bamwi abamwi kweendelana amulaka wabo, kuti mwaalumi woonse weelede kuba simalelo* mung’anda yakwe alubo weelede kwaambuula mulaka wabantu bakulimbabo.