Esita
8 Mubuzuba oobo, mwaami Ahasuwera wakapa Namalelo Esita ng’anda yaHamani sinkondonyina wamaJuda; alubo Modekkayi wakasika kunembo lyamwaami nkaambo Esita wakali wamubuzya kuti wakalini wakwe. 2 Mpawo mwaami wakagwisya ring’i yakwe iili aachidindo njaakali wanyanga Hamani mpawo wakayipa Modekkayi. Alubo Esita wakabikka ng’anda yaHamani mumaboko aaModekkayi.
3 Mukuyungizya, Esita wakaambuula lubo amwaami. Wakaliwaala kumawulu aakwe kali kulila akumukombelezya kuti abambulule penzi lyakali lyachitwa aaHamani mu-Agagi akuti amwaye makanze aakwe mabi aakunyonyoona maJuda. 4 Mwaami wakatandabika nkoli yabwaami yangolida kuli Esita, mpawo Esita wakanyampuka wiimikila kunembo lyamwaami. 5 Esita wakati: “Kuti kazimubotela mwaami, kuti kali wandifwida luzyalo, kuti kazili kabotu kumwaami akuti kandili ndamubotela, akulembwe mulawu uutazimaazye makanze mabi aaHamani mwana waHamedata mu-Agagi, ngaakalemba aakuti kunyonyoonwe maJuda boonse bali muzilikiti zyamwaami. 6 Nga ndilawumuna biyeni penzi kalili kuzida bantu bangu alubo nga ndilabalanga biyo na babbululu bangu kabali kunyonyoonwa?”
7 Mwaami Ahasuwera wakabuzya Namalelo Esita aModekkayi muJuda kuti: “Ng’anda yaHamani ndayipa Esita alubo ndapa kuti Hamani aanzikwe aachisamu nkaambo wakakanzide kulwana maJuda.* 8 Amulembe muzina lyamwaami kufumbwa nzimubona kuti zilikabotu atala amaJuda alubo muzidinde aring’i yamwaami iili aachidindo, nkaambo kufumbwa mulawu walembwa muzina lyamwaami akudindwa aaring’i yamwaami iili aachidindo tuuchinchwi pe.”
9 Nkinkaako, balembi bamwaami bakayitwa aachiindi nchicheecho mumweezi wachitatu, nkukwaamba mweezi waSivani,* mubuzuba bwachi 23 alubo bakalemba zintu zyoonse Modekkayi nzyaakalayilila maJuda, balupati-pati, beendelezi abeendelezi bazilikiti kuzwa ku-Indiya kusika ku-Itiyopiya, zilikiti zili 127. Chilikiti chimwi achimwi chakali aalugwalo lwacho* alubo bantu bamwi abamwi bakalembelwa mumulaka wabo, ambabo maJuda bakali aalugwalo lwabo* mumulaka wabo.
10 Wakaalemba muzina lyamwaami Ahasuwera mpawo wakaadinda aring’i yamwaami iili aachidindo mpawo wakaatumizya kwiinda mubatumwa beenda aamabbiza. Bakatanta mabbiza aachijaana loko aakavubilwa kuchita milimu yamubwaami. 11 Mumagwalo aayo, mwaami wakazumizya maJuda bali mundawu zyoonse zisiyene-siyene kuti balwanine buumi bwabo akuti balobye, bajaye akunyonyoona masooja aachimwi chisi naakuti chilikiti chakali kukonzya kubalwana kuswaanizya abanakazi abana akuti babanyange lubono lwabo. 12 Eezi zyakeelede kuchitika mubuzuba bukozyenie muzilikiti zyoonse zyamwaami Ahasuwera, mubuzuba bwachi 13 mumweezi wachi 12, nkukwaamba mweezi wa-Ada.* 13 Makani aakali mumagwalo akeelede kuba mulawu muzilikiti zyoonse, akeelede kwaambilizigwa kubantu boonse, kuchitila kuti mubuzuba oobo maJuda balibambile kulwana basinkondonyina. 14 Batumwa bakatanta mabbiza aabelesegwa mumilimu yamwaami alubo bakazwa chakufwambaana kabali kuchijaana kweendelana amalayilile aamwaami. Mulawu ooyu wakaambilizigwa amuShushani,* muunzi uukwabilidwe.*
15 Modekkayi wakazwa kunembo lyamwaami kazweete zigogo zyabwaami zyabbuluu azituba, angwaani mpati yabwaami yangolida ajansi bbotu lyawulu yapepulu. Mpawo muunzi waShushani* wakoompolola chakukondwa. 16 Nkaambo kumaJuda kwakaba kwaangunuka,* kukondwa, kubotelwa akulemekwa. 17 Alubo muzilikiti zyoonse amumyuunzi yoonse mwaakasika mulayizyo wamwaami, maJuda bakali kukondwa akubotelwa, kabali kuchita mapobwe akusekelela. Bantu biingi mundawu eeyo bakali kulyaamba kuti maJuda nkaambo bakali baabubayoowa maJuda.