Mukambawusi

4 Ndakabona kudyaamininwa koonse nkubakali kuchitwa bantu aansi aano. Ndakabona misozi yabaabo bakali kudyaamininwa, teebakalikwe sikubawumbulizya pe. Bantu bakali kubadyaaminina bakali aamanguzu alubo teekwakalikwe sikubawumbulizya pe. 2 Alubo ndakabona kuti bafwide balikabotu kwiinda aabo bachipona. 3 Pesi uubayinda boonse ngooyo uutanazyalwa pe, uutanabona zintu zibi zichitwa aansi aano.

4 Alubo ndayibona milimu njibabeleka changuzu amilimu iitondeezya kuti bali aaluzibo akaambo kakuzundaana nkubachita bantu; azeezi tazigwasyi pe, nkwaandilila biyo moya.

5 Mufuba-fuba upeta maboko aakwe nyama yakwe niiyabumana.*

6 Kupumuna mbichaani kulikabotu kwiinda kulijaya kubeleka* akwaandilila moya.

7 Ndakalanga chimwi chikozyano lubo chazintu zitagwasyi aansi aano: 8 Kuli muntu uuli aalikke uutakwe mweenzinyina, uutakwe mwana naba bbululu, pesi milimu yakwe yoonse njabeleka changuzu tayimani pe. Meso aakwe taakkutisikani pe abunoti. Pesi ulalibuzya na kuti, ‘Ngwani ngundilikubelekela changuzu kandilikulikasya zintu zibotu’? Azeezi tazigwasyi alubo mulimu uumizya.

9 Babili balikabotu kwiinda uumwi, nkaambo balajana bulumbu bubotu* akaambo kamulimu wabo ngubabeleka changuzu. 10 Nkaambo kuti umwi wawa, mweenzinyina ulamubusya. Pesi niinzi chichitika kuli yooyo uuwa kakutakwe uumugwasya kuti abuke?

11 Mukuyungizya, kuti babili boonaamwi, balakasaalilwa, pesi uumwi nga ulakasaalilwa biyeni? 12 Alubo umwi muntu ulakonzya kuzunda ooyo uuli aalikke, pesi babili balakonzya kumulwana. Ntambo yoosedwe aatutambo tutatu, tayifwambaani* pe kudunsuka.

13 Mwana uufwaba, pesi kali musongo ulikabotu kwiinda mwaami wachembaala, pesi kali mufuba-fuba, uutachikwe maanu aakuswiilila nchenjezyo. 14 Nkaambo wakazwa* mujele kuti abe mwaami, nikuba kuti wakazyalilwa mung’anda yabwaami kafwaba. 15 Ndakalanga-langa boonse bapona beenda aansi aano, kuswaanizya ambuzimweendela uuchikula uunga wazooba mweendelezi mubusena bwawumwi. 16 Nikuba kuti aabo bali kubbazu lyakwe tabamani pe, aabo baza kusule lyakwe tabazoobotelwi aanguwe pe. Azeezi tazigwasyi pe, nkwaandilila biyo moya.