Mukambawusi

6 Kuli limwi penzi ndindakabona aansi aano bantu ndibakkala kabaswaana: 2 Leza wakasimpe upa muntu bunoti azimwi zintu zyakumubili abulemu, zyakuti taakwe nchalombozya nchatajani pe, pesi Leza wakasimpe tapi kuti azibelesye zintu eezyo, pesi zilakonzya kubelesegwa aamweenzu. Eezi tazigwasyi pe alubo ndipenzi pati. 3 Kuti mwaalumi waba aabana bali 100 alubo wapona minyaka myiingi kusikila wachembaala, pesi katazibelesyi zintu zibotu nzyaakajana natanafwa, kwaamba choonzyo ime nditi, mwana wafwa katanatumbukwa ulikabotu kwiinda nguwe. 4 Nkaambo kubawo kwamwana ooyo teekwakagwasya pe alubo wakayinda mumudima alubo zina lyakwe lyakaputilwa aamudima. 5 Nikuba kuti mwana ooyo taakalibona pe zuba akuti taakwe nchaakazi, pesi ulikabotu kwiinda mwaalumi ooyu. 6 Kugwasyaanzi biya kuti muntu apone kwaminyaka iili 2 000, pesi katali kubotelwa pe? Boonse tabayinki kundawu iikozyenie na?

7 Milimu yoonse njabeleka changuzu muntu, wiibelekela kuti azuzye bula bwakwe, pesi usyaala kali aachiyandisyo chakulya. 8 Musongo umwiinda aali mufuba-fuba, naakuti zigwasyaanzi kuti muntu uufwaba kazi nzila zyakuponaazyo?* 9 Kulikabotu kubotelwa azintu nzyaabwene meso aako, kwiinda kulombozya zintu nzutakonzyi kubaazyo. Anzizyo eezi tazigwasyi pe, nkwaandilila biyo moya.

10 Kufumbwa chiliwo chakawuzikwa kale, alubo kulizibinkene kuti muntu niinzi alubo takonzyi pe kukazyania* ayooyo uuli aamanguzu kwiinda nguwe. 11 Kuvula kwamajwi* kupa kuti atagwasyi pe alubo nga kulamugwasyaanzi biya muntu? 12 Ngwani uuzi chilikabotu chikonzya kuchitwa aamuntu mumazuba mache aabuumi bwakwe butagwasyi aali mbuli mweenzule,* nkaambo ngwani uukonzya kubuzya muntu zitazoochitike aansi aano kali weenda?