Mukambawusi

11 Waalila chinkwa chako mumaanzi, nkaambo uzoochijana lubo nikwayinda mazuba miingi. 2 Abanisya zintu nzulaazyo kubantu bali musanu ababili naakuti bali musanu abatatu, nkaambo tulizi pe penzi litazoochitike aanyika.

3 Kuti mayoba kaazwide maanzi, mvula ilawa aanyika alubo kuti munsamu wawida kumusanza naakuti kunyika, mpuwawida mpawo mpuutanoobede.

4 Ooyo uulanga luuwo tazoobyali mbuto pe alubo ooyo uulanga mayoba tazootebuli pe.

5 Mbuli mbutazi pe mbuubeleka muuya mumafuwa aamwana uuli mubula bwamwanakazi uuli aada, nkinkaako, twiizi pe milimu yaLeza wakasimpe ooyo uuchita zintu zyoonse.

6 Byala mbuto yako kuseeni alubo utakupumuzyi pe kuboko kwako kusika goko, nkaambo tuzi pe kuti njiili iitazwidilile, kuti njeyi na naakuti njiilya, naakuti zyoonse zilachita kabotu.

7 Mumuni ulabotezya alubo zilikabotu kuti meso abone zuba. 8 Kuti muntu wapona minyaka myiingi, weelede kubotelwa anjiyo yoonse. Pesi weelede kuyeeya kuti mazuba aamapenzi alakonzya kuba miingi. Zyoonse zitazoochitike tazigwasyi pe.

9 Botelwa mulombe nuchili muniini, botelwa nuchili aamanguzu. Chita zyoonse ziyandwa aamoyo wako alubo wiinke kufumbwa meso aako nkwaakutola, pesi ziba kuti Leza wakasimpe uzookubeteka akaambo kazintu zyoonse eezi. 10 Nkinkaako, gwisya zintu zikataazya mumoyo wako alubo gwisya zintu zikonzya kuchisa mumubili wako, nkaambo kuba muniini anguzu zyabuniini tazigwasyi pe.