Hosiya
1 Ijwi lyaJehova lyakasikila Hosiya* mwana waBbeeri, mumazuba aa-Uziya aJotamu a-Ahazi a-Hezekkiya, baami baJuda amumazuba aaJerobbowamu mwana waJowashi mwaami wa-Israyeli. 2 Jehova naakasaanguna kwaambuula jwi lyakwe kwiinda muli Hosiya, Jehova wakati kuli Hosiya: “Yinka ukakwate mwanakazi muwuule,* ube aabana babuwuule,* nkaambo nyika yalekela limwi kutobela Jehova akaambo kabuwuule.”*
3 Nkinkaako, wakayinka waakukwata Gomeri mwana waDibbulayimu mpawo wakaba aada alubo wakatumbuka mwana mulombe.
4 Jehova wakati kulinguwe: “Muuzike kuti Jezriyeli,* nkaambo muchiindi chifwiifwi chiza, ndizooyipa mulandu ng’anda yaJehu akaambo kaganzi lyakatilwa kuJezriyeli alubo ndizoolobya bweendelezi bwang’anda ya-Israyeli. 5 Mubuzuba oobo, ndizootyola daantambwa lya-Israyeli muKkuti lyaJezriyeli.”*
6 Mwanakazi ooyo wakaba aada lubo mpawo wakatumbuka mwana musimbi. Alubo Leza wakamubuzya kuti: “Muuzike kuti Lo-ruhama,* nkaambo tandichizoobafwidi luzyalo lubo pe bantu bamung’anda ya-Israyeli, nkaambo kwaamba choonzyo, ndizoobatanda. 7 Pesi ndizoobafwida luzyalo bamung’anda yaJuda, ime ndiJehova Leza wabo ndizoobafutula. Tandizoobafutuli aadaantambwa pe naakuti apanga naakuti ankondo naakuti amabbiza naakuti abasimabbiza.”
8 Gomeri naakalesya Lo-ruhama, wakaba aada mpawo wakatumbuka mwana mulombe. 9 Mpawo Leza wakati: “Muuzike kuti Lo-ami,* nkaambo tamuli bantu bangu pe, andime tandizoobi wanu pe.”
10 “Bantu bamu-Israyeli bazooba biingi loko mbuli museele wamulwizi, uutapimiki pe naakuti uutabaliki pe. Alubo kundawu ooko nkubakabuzigwa kuti, ‘Tamuli bantu bangu pe,’ bazoobuzigwa kuti, ‘Muli bana baLeza uupona.’ 11 Mukuyungizya, bantu bamuJuda abamu-Israyeli bazoobunganizigwaamwi, bajatane mpawo bazoolisalila muzulwidi uumwi akuzwa munyika, nkaambo buzuba bwaJezriyeli bunooli bupati.