Zakkariya
8 Ijwi lyaJehova wamakamu lyakasika lubo kaliti: 2 “Nzezi nzyaamba Jehova wamakamu, ‘Ndizooyisungwaalila aabusungu bupati Ziyoni, alubo ndizooyisungwaalila aabukali bupati.’”
3 “Nzezi nzyaamba Jehova, ‘Ndizooboola kuZiyoni ndikkale muJerusalema, mpawo Jerusalema izootegwa muunzi wakasimpe,* alubo chilundu chaJehova wamakamu chizootegwa nchilundu chisalala.’”
4 “Nzezi nzyaamba Jehova wamakamu, ‘Madaala amachembele bazookkala lubo mumabuwa aaJerusalema, umwi awumwi kajisi mufunko wakwe mukuboko akaambo kakupona minyaka myiingi.* 5 Alubo mabuwa aamuunzi azoozula bana balombe abasimbi basaana mulingawo.’”
6 “Nzezi nzyaamba Jehova wamakamu, ‘Nikuba kuti zintu eezi zibonekaanga nziyumu loko mumeso aabasyeede babantu aaba mumazuba aayo, zyeelede kubonekaanga nziyumu loko na akulindime?’ mbaamba Jehova wamakamu.”
7 “Nzezi nzyaamba Jehova wamakamu, ‘Lino ndilikuvuna bantu bangu kuzwa kunyika zili kubuzwezuba azili kububbila. 8 Ndizoobeeta, mpawo bazookkala muJerusalema; bazooba bantu bangu, alubo andime ndizooba Leza wabo mukasimpe* amubululami.’”
9 “Nzezi nzyaamba Jehova wamakamu, ‘Maboko aanu aasime,* inywe lino nimulikumvwa majwi aaya aazwa kumulomo wabapolofita, majwi ngayaaya akaambwa mubuzuba ntalisyo yang’anda yaJehova wamakamu niyakabikkwa kuti tempele liyakwe. 10 Nkaambo kachitanasika chiindi eecho, teekwakali mbadalo yakubbadala bantu naakuti banyama; alubo kwakali kuyoosya kwiinka akuboola akaambo kasinkondo, nkaambo ndakapa kuti bantu boonse balwane, umwi amweenzinyina.’
11 “‘Pesi basyeede babantu aaba tandizoobachitili mbuli mumazuba aachiindi,’ mbaamba Jehova wamakamu. 12 ‘Nkaambo mbuto yaluumuno izoobyalwa; musaansa uzoozyala michelo yawo anyika izoopa butebuzi bwayo, amajulu azoopa lume* lwawo; alubo ndizoopa kuti basyeede babantu aaba bakone zintu zyoonse eezi. 13 Alubo mbuli mbumwakaba chintu chitukwa aakati kazisi inywe nibamung’anda yaJuda anibamung’anda ya-Israyeli, mbumbubo mbundizoomuvuna, alubo muzooba chilongezyo.* Mutayoowi pe! Maboko aanu aasime.’*
14 “Nkaambo nzezi nzyaamba Jehova wamakamu, ‘“Mbuli mbundakakanzide kumweetela mapenzi akaambo kakuti mawuso bakandinyemya,” mbaamba Jehova wamakamu, “alubo teendakalisola pe, 15 pesi aachiindi eechi, ndakanza kumuchitila zibotu Jerusalema kuswaanizya abamung’anda yaJuda. Mutayoowi pe!”’
16 “‘Nzezi zintu nzimweelede kuchita: Amwaambe kasimpe kuli umwi awumwi, akubeteka nkumuchita mumageedi aanu kweelede kusumpula kasimpe aluumuno. 17 Mumyoyo yanu mutakanzi kubeetela mapenzi beenzinyokwe alubo mutayandi chikonke chakubeja pe; nkaambo eezi zyoonse nzintu nzindizonda,’ mbaamba Jehova.”
18 Ijwi lyaJehova wamakamu lyakandisikila lubo kaliti: 19 “Nzezi nzyaamba Jehova wamakamu, ‘Kulyiimya kulya kuchitwa mumweezi wachine, kulyiimya kulya kuchitwa mumweezi wamusanu, kulyiimya kulya kuchitwa mumweezi wamusanu ayibili, akulyiimya kulya kuchitwa mumweezi wakkumi kuzooba ziindi zyakusekelela, kukondwa kubantu bamung’anda yaJuda—mapobwe aakukondwa. Nkinkaako, amuyande kasimpe aluumuno.’
20 “Nzezi nzyaamba Jehova wamakamu, ‘Bantu bamisyobo iisiyene-siyene abaabo bakkala mumyuunzi myiingi bazoosika; 21 abantu bakkala muli umwi muunzi bazooyinka kuli baabo bakkala mumuunzi uumbi bakababuzye kuti: “Atweende amoyo woonse tukakombelezye Jehova kuti atufwide luzyalo, alubo atuyanduule Jehova wamakamu. Andiswe tulayinka.” 22 Bantu bamisyobo iisiyene-siyene abantu bamuzisi zili aamanguzu bazoosika kuti bayanduule Jehova wamakamu muJerusalema akukumbila Jehova kuti abafwide luzyalo.’
23 “Nzezi nzyaamba Jehova wamakamu, ‘Mumazuba aayo, baalumi bali kkumi bazwa kumilaka yoonse yazisi bazoojata, kwaamba choonzyo, bazoojatisisya chigogo* chamuJuda* kabati: “Tuyanda kwiinka aandinywe nkaambo twamvwa kuti Leza ulaandinywe nibantu.”’”