Makani mabotu aakalembwa aaMateyo
2 Jesu naakazyalwa kuBbetelehema yakuJudiya mumazuba aamwaami Herodi,* basondi babelesya nyenyeezi baKubuzwezuba bakasika kuJerusalema, 2 mpawo bakati: “Ulikuli mwana wakazyalwa kali mwaami wamaJuda? Nkaambo twakabona nyenyeezi yakwe nitwakali Kubuzwezuba alubo twaza kuzoomufugamina.” 3 Naakamvwa makani aaya, Mwaami Herodi wakakataazikana loko kuswaanizya abantu boonse bamuJerusalema. 4 Naakabungania bapati babapayizi boonse abalembi babantu, wakabuzya kuti Kkristu* wakali kuzoozyalilwa kuli. 5 Bakati kulinguwe: “KuBbetelehema yakuJudiya, nkaambo eezi nzizyo zyakalembwa aamupolofita kuti: 6 ‘Anduwe, O Bbetelehema, nuuli munyika yaJuda, toli muunzi muniini loko aakati kabeendelezi bamuJuda nkaambo mulinduwe, muzoozwa mweendelezi uutazooyembele bantu bangu, ma-Israyeli.’”
7 Mpawo chakusisikizya, Herodi wakayita basondi babelesya nyenyeezi, mpawo wakababuzisisya kuti azibe chiindi nyenyeezi niyakasaangunide kuboneka. 8 Naakali kubatuma kuBbetelehema, wakati: “Amwiinke mukamuyanduulisisye mwana, mpawo kuti mwamujana muzoondibuzye, kuchitila kuti andime ndiinke ndikamufugamine.” 9 Nibakamvwa makani aamwaami, bakayinka mpawo nyenyeezi njibakabwene nibakali Kubuzwezuba, yakabazulwida mpawo yakaakwiimikila mpaakabede mwana. 10 Nibakayibona kayili kwiimikila, bakabotelwa akukondwa kupati. 11 Nibakanjila mung’anda, bakabona mwana kali aaMariya banyina mpawo bakawidaansi akumufugamina. Alubo bakajula zibikkilo zyabo zyakali aazintu ziyandikana, mpawo bakapa mwana zipo, nkukwaamba ngolida, tununkilizyo tutuba amure. 12 Nikuba oobo, akaambo kakuti bakali bachenjezegwa aaLeza muchiloto kuti batabweedi kuli Herodi, bakayinka kunyika yabo kababelesya imwi nzila.
13 Nibakeenda, lino bona, ngilozi yaJehova* yakaboneka kuli Josefa muchiloto, kayiti: “Buka, ubweze mwana abanyina uchijile ku-Ijipita, ukakkale nkuko kusikila ndizookubuzye kuti uzwe, nkaambo Herodi waba aafwiifwi kuyanduula mwana kuti amujaye.” 14 Nkinkaako, Josefa wakabuka mansiku ngayaayo, wabweza mwana abanyina aamwana, mpawo wakaya ku-Ijipita. 15 Wakaakukkala nkuko kusikila Herodi naakafwa. Eezi zyakazuzikizya majwi aakaambwa aaJehova* kabelesya mupolofita wakwe, kuti: “Ndakayita mwanaangu kuti azwe mu-Ijipita.”
16 Mpawo Herodi naakabona kuti weenwa aabasondi babelesya nyenyeezi, wakanyema loko mpawo wakatuma bantu kuti bakajaye bana balombe boonse bamuBbetelehema abamumabbooma woonse aamumo, bakali aaminyaka iibili kaziya aansi, kweendelana achiindi nchaakali wabuzisisya kuzwa kubasondi babelesya nyenyeezi. 17 Mpawo eezi zyakazuzikizya zyakaambwa aamupolofita Jeremiya, ooyo wakati: 18 “Jwi lyakamvwigwa kuRama, kulila akoomoka kupati. NguRakkeli wakali kulila bana bakwe alubo taakali kuyanda pe kuumbulizigwa nkaambo tabachiwo pe.”
19 Herodi naakafwa, ngilozi yaJehova* yakaboneka muchiloto kuli Josefa ku-Ijipita 20 mpawo yakati: “Buka, ubweze mwana abanyina, uye kunyika ya-Israyeli nkaambo aabo bakali kuyanda kujaya mwana* bakafwa.” 21 Nkinkaako, wakabuka wabweza mwana abanyina aamwana mpawo wakabweeda kunyika ya-Israyeli. 22 Pesi Josefa naakamvwa kuti Akkilasi nguwe wakali kweendelezya muJudiya, aachuuno chaHerodi wisi, wakayoowa kuya nkuko. Mukuyungizya, wakaya kuchilawu chaGalili nkaambo wakali wachenjezegwa aaLeza muchiloto. 23 Mpawo wakasika wakkala mumuunzi uutegwa Nazareta, kuchitila kuti kuzuzikizigwe eezyo zyakaambwa kwiinda mubapolofita, zyakuti: “Uzoowambwa kuti munaNazareta.”*