Ajanika Makani aKabbuku Kamuswaangano waBuumi Amulimu Wesu
March 6-12
LUBONO LUZWA MUJWI LYALEZA | JEREMIYA 1-4
“Ndili Ayebo Nzookuvuna”
w11 3/15 29 ¶4
Amukkale Kamulindide Mbuli Kwakachita Jeremiya
4 Jeremiya wakali aminyaka iili 25 chiindi naakabuzigwa aJehova kuti abe mulindi. (Jer. 1:1, 2) Pesi wakali kulibona kuti uchili muniini katakonzyi kwaambuula abaalumi bapati bamuchisi chaIsrayeli bakali azyuuno. (Jer. 1:6) Wakeelede kwaambilizya mulumbe uyoosya kubapayizi, kubasinsimi bakubeja, beendelezi akubantu bakali “kutobela makanze abo” ‘abakakatila kulweno.’ (Jer. 6:13; 8:5, 6) Tempele lyaMwaami Solomoni lyakali busena bwabukombi bwakasimpe kwaminyaka iili 400, lyakali kuyoonyonyoonwa. Muunzi waJerusalemu achisi chaJuda zyakali kuyoonyonyoonwa alimwi bantu bakali kuyootolwa kubuzike. Zilaantanganana kuti mulumbe Jeremiya ngwakatumwa wakali kuyandikana chakufwambaana.
w05 12/15 23 ¶18
Uswiilila Leza Na Naa Kuti Bantu?
18 Leza wakabuzya musinsimi Jeremiya kuti: “Ndi ayebo, nzookuvuna.” (Jeremiya 1:8) Jehova utuvuna biyeni kukupenzegwa mazubaano? Ulakonzya kupa kuti kube mubetesi ubeteka kabotu uli mbuli Gamaliyeli. Chimwi chiindi ulakonzya kupa kuti mweendelezi utali kabotu atolelwe manguzu mpawo kubikkwe mweendelezi ulikabotu. Chimwi chiindi ulazumizya kuti tupenzegwe. (2 Timoteo 3:12) Ikuti Leza wazumizya kuti tupenzegwe uyootupa manguzu aakuti tulisimye. (1 BaKorinto 10:13) Nikuba kuti Leza wazumizya kuti tusunkwe pesi tusyoma kuti: Bantu balwana abantu baLeza balwana aLeza alimwi bantu balwana aLeza tabakazwidilili.
jr 88 ¶14-15
“Njookatalusya Moyo Uukatede”
UYOOBAGWASYA NA BANTU BAKATEDE?
14 Tweelede kubikkila maanu kunzila Jeremiya njaakasungwaazigwaayo ambakasungwaazya bantu ‘bakakatede.’ (Jer. 31:25) Musinsimi wakali kusungwaazigwa aJehova chiindi chiingi. Yeeya mbokusungwaazya kumvwa jwi lyaJehova kalikubuzya kuti: “Buzuba obuno ndakubika kuti ube munzi uuli alubaya . . . Bayookulwisya, pele tabakooyookuzunda pe, nkaambo ndi ayebo, nzookuvuna, mbwaamba Jehova.” (Jer. 1:18, 19) Eezi zyakapa kuti Jeremiya ambe Jehova kuti: ‘Ninguzu zyangu amayubilo aangu, machijilo aangu mumazuba aamapenzi.’—Jer. 16:19.
15 Zilabotezya kuti Jehova wakabuzya Jeremiya kuti: “Ndi ayebo.” Eezi tazikugwasyi na kubona nzukonzya kuchita kuti umwi muntu kayanda kugwasigwa? Tweelede kufwambaana kuyanduula nzila zyakugwasya kuti twabona mukwesu naa muchizi naa nzubo yesu kayiyandikana kugwasigwa. Chiindi chiingi tweelede kuchita mbuli Leza mbaakachita kuli Jeremiya—kubaamwi anguwe. Mpawo weelede kwaambuula majwi asungwaazya pesi toyelede kwaamba zintu zyiingi loko. Kwaambuula majwi mache kulakonzya kumugwasya akumusungwaazya. Toyelede kumusalila zyakuchita. Weelede kwaambuula majwi atondeezya luyando lwachiKristu akubikkila maanu. Kwaambuula munzila iili boobo kulakonzya kumugwasya.—Bala Tusimpi 25:11.
Kuyanduula Lubono muJwi lyaLeza
w07 3/15 9 ¶8
Makani Aazwa Mubbuku lyaJeremiya
2:13, 18. MaIsrayeli batasyomeki bakachita zibi zibili. Bakasiya Jehova wakali kubalongezya, kubazulwida akubakwabilila. Bakaliyandwiida zitelekezyo zyabo kwiinda mukupanga chizuminano abantu bakuEgepita abakuAsiriya. Mazubaano kusiya Leza wakasimpe katuyanda kutobelezya njiisyo zyabantu, beendelezi banyika azyapolitikisi kuli mbuli kusiya “kasensa kamaanzi abuumi” akuliyandwiida ‘zitelekezyo zifwide.’
w07 3/15 9 ¶4
Makani Aazwa Mubbuku lyaJeremiya
4:10; 15:18—Nkamboonzi nikutegwa Jehova wakeena bantu bakwe batasyomeki? Muchiindi chaJeremiya kwakali basinsimi bakali ‘kusinsima zyakubeja.’ (Jeremiya 5:31; 20:6; 23:16, 17, 25-28, 32) Jehova taakabakasya pe kuti baambilizye mulumbe walweeno.
March 13-19
LUBONO LUZWA MUJWI LYALEZA | JEREMIYA 5-7
“Bakaleka Kuchita Kuyanda kwaLeza”
w88 4/1 11-12 ¶7-8
Jeremiya—Wakali Kusinsima Kubeteka kwaLeza
7 Jehova wakamuchenjezya kuti, “Bayookulwisya, pele tabakooyookuzunda pe.” (Jeremiya 1:19) Nkamboonzi maJuda abeendelezi babo nibakali kuyanda kulwana musinsimi ooyu? Nkaambo businsimi bwakwe bwakatondeezya michito yabo mibi akuti bakali kukomba baleza bakubeja. Jeremiya taakaleka pe: “Ncobeni ijwi lya-Jehova lyababeda cintu cisampaulwa, tababotelwi ndilyo pe. Nkaambo boonse buyo balayandisya kunyanzya-nyanzya, nibaba bapati nibaba baniini, abasinsimi abapaizi [bakeelede kugwasya bantu kuti batobele malayilile aakulijata amubukombi] boonse balacita cakubeja.”—Jeremiya 6:10, 13.
8 Bakali kupa kuti bantu batuule zituuzyo. Nikuba kuti bakali kutobelezya zichitwa mubukombi bwakasimpe, pesi myoyo yabo yakali yaleya. Bakali kubikkila maanu kukuchita mapobwe kutali kutobela milawu. Alubo beendelezi bachiJuda bakali kweena bantu kwiinda mukubasyomezya lukwabililo lwakubeja kabaamba kuti, “Muli aluumuno, muli aluumuno!” kakuli luumuno teelwakaliwo pe. (Jeremiya 6:14; 8:11) Bakali kweena bantu kuti basyome kuti bakali aluumuno aLeza. Bakali kubonaanga tabeelede kukataazikana mbukunga bakali bantu baLeza akuti bakali kukkala mumuunzi uusalidwe alimwi uli atempele. Pesi Jehova mbaakali kubabona na?
w88 4/1 12 ¶9-10
Jeremiya—Wakali Kusinsima Kubeteka kwaLeza
9 Jehova wakalayilila Jeremiya kuti ayinke kumulyango wamuunzi aawo bantu biingi nibakali kuyoomubona akuti aambilizye mulumbe Wakwe kubantu bakali kunjila mutempele. Wakabuzya bantu kuti: “Mutasyomi majwi aakubeja buyo aakuti, Njeyi intempele ya-Jehova, njeyi intempele ya-Jehova! Ncobeni mulasyoma majwi aakubeja aatagwasyi.” MaJuda bakali kulisumpula akaambo katempele lyabo alimwi eezi zitondeezya kuti teebakali alusyomo pe alimwi bakali kusyoma zintu zibonwa ameso. Bakali baaluba majwi aaJehova aakuchenjezya aakuti: “Ijulu ncecuuno cabwami bwangu, anyika ncecilyatililo camaulu aangu. Ino ili kuli ing’anda njimuti ndiyakile?” Jehova Mwaami wabubumbo boonse taakali kusinikizigwa kuti akkale mutempele lyabo nikuba kuti lyakali bbotu biyeni.—Jeremiya 7:1-8; Isaya 66:1.
10 Jeremiya wakiinkilila kunembo amulumbe uuchisa wakuti: “Na mulabba akujaya akucita bumambe akukonka cakubeja akutentela Baala tununkilizyo akuya butobela baleza bambi mbemutezi, . . . akwaamba kuti, Twafutulwa, lino tulakonzya kunoocicita zisesemyo ezi zyoonse?” Mbukunga maJuda bakali ‘bantu baLeza bakasalidwe,’ bakali kuyeeya kuti Jehova takwe ndaba amichito yabo pesi ubikkila maanu kuzituuzyo kutempele. Bakeelede kuchincha maboneno aabo akuleka kuyeeya kuti Leza uli mbuli ndeende uuyinkilila kunembo kulangania mwanaakwe utaswiilili.—Jeremiya 7:9, 10; Kulonga 19:5, 6.
jr 21 ¶12
Kusinsima “Kumamanino aaciindi”
12 Jehoyakimi naakasanguna kweendelezya, Jehova wakabuzya Jeremiya kuti ayinke kutempele akabuzye maJuda atala amichito yabo mibi. Tempele lyaJehova bakali kulibona mbuli chintu chikonzya kubakwabilila. Pesi kuti teebaleka ‘kubba, kujaya, kuchita bumambe, kukonka cakubeja, kutentela Baala tununkilizyo akuya butobela baleza bambi mbemutezi’ Jehova wakali kuyoolikaka tempele. Wakali kuyoobakaka bantu bakali kukomba mutempele mbuli mbaakakaka tempele lyakali kuShilo muchiindi chaMupayizi Mupati Eli. Chisi chaJuda chakali ‘kuyooba nkanda buyo.’ (Jer. 7:1-15, 34; 26:1-6) Jeremiya taakeelede kuyoowa kwaambilizya mulumbe ooyu. Wakakambawukila bantu bakali ampuwo. Mazubaano bakwesu abachizi bayandika kuti batayoowi chiindi nibachita bukambawusi bwantanganana anibakambawukila bantu balemekwa. Tulakonzya kubaachoonzyo kuti: Leza uyootugwasya mbuli mbaakagwasya Jeremiya.—Heb. 10:39; 13:6.
Kuyanduula Lubono muJwi lyaLeza
w05 11/1 23 ¶11
Uyooyenda aLeza Na?
11 Tulikuzumizya Jwi lyaLeza na kuti litugwasye kweenda aLeza? Tweelede kulipa chiindi chakulilanga-langa mbutubede. Atulange lugwalo lukonzya kutugwasya kuchita oobo: “Mbuboobo mbwaamba Jehova. Amwiime munzila, mubone, mubuzye inzila zyaciindi, nzenzizyo ziindika kabotu. Amweende mumonya, elyo myoyo yanu iyoojana cilyokezezyo.” (Jeremiya 6:16) Majwi aaya atuyeezya muntu uli mulweendo wiimikila apambukana nzila kuti abuzye nzila. MaIsrayeli bakapapila Jehova bakeelede kuchita oobu mubukombi bwabo. Bakeelede kuyanduula “nzila zyaciindi.” Nzila ‘iindika kabotu’ yakali kutobelezegwa abamawisi alimwi maIsrayeli bakali baleka kweenda mulinjiyo. Chilawusisya kuti maIsrayeli teebakabikkila maanu kunzila yaluyando Jehova njaakali kubachenjezyaayo. Lugwalo oolu lwiinkilila kunembo kaluti: “Pele bati, Tatukooyooenda mumo pe.” Pesi mazubaano babelesi baLeza balutambula kabotu lulayo oolo.
w88 4/1 13 ¶15
Jeremiya—Wakali Kusinsima Kubeteka kwaLeza
MaJuda Bakasubulwa
15 Mumunyaka wa632 B.C.E., banaAsiriya bakazundwa amaKkaledi amaMede alimwi chisi chaJuda chili kumusanza chakali chaba amanguzu kwiinda banaEgepita. Nkinkaako, zisi zili kunyika nzizyo zyakali kuyoolwana amaJuda. Jeremiya wakeelede kubuzya maJuda mulumbe utabotezyi. “Kulazwa bantu mucisi cakulubazu lwakunyika . . . Mbayumumyoyo, tabajisi luzyalo pe. . . . Balilibambide mumindando yabo mbuli basilumamba kuti bakulwisye, O mwana musimbi waZioni.” Chisi chaBbabbiloni nchicho chakalaamanguzu akweendelezya nyika zyoonse. Leza wakali kuyoobelesya Bbabbiloni kuti isubule maJuda bakatali kusyomeka.—Jeremiya 6:22, 23; 25:8, 9.
March 20-26
LUBONO LUZWA MUJWI LYALEZA | JEREMIYA 8-11
“Bantu Balakonzya Kuzwidilila Kuti Kabazulwidwa aJehova”
it-1 555
Makowa
Zitanda naa zimwi zintu zyakali kubikkwa mumuunda kuti zikonge banyama, nkinkaako musinsimi Jeremiya wakakozyanisya zikozyano zyakali kukombwa amaIsraeli ‘aziyamizyo mumunda wamakowa’ zitaambuuli alimwi zitaponi.—Jer 10:5.
w04 10/1 11 ¶10
Mazubaano Mbaani Balemeka Leza?
10 Nikuba kuti twalanga kujulu naa kuti twalanga zilenge zili aanyika, zyoonse zitutondeezya kuti kuli Mulengi. (Jeremiya 10:12) Tweelede kuzumina majwi akaambwa azilenge zyakujulu aakuti: “Nduwe uuelede, O Mwami, kutambula bulemu alulemeko anguzu, nkaambo wakalenga zintu zyoonse.” (Ciyubunuzyo 4:11) Pesi bazyasayensi balakachilwa kubona bumboni ‘ameso amyoyo yabo,’ nikuba kuti balagamba chiindi nibabona mbuzipangidwe zintu zyakalengwa. (BaEfeso 1:18) Tulakonzya kuzikozyanisya munzila eeyi: Kubona zintu zibotu zyakalengwa ambuzipangidwe pesi katukaka kuti kuli Sikupanga Mupati, kuli mbuli kubona chintu chakapendwa kabotu pesi katukaka kuti kuli muntu wakachipenda. Nzizyo zipa kuti bantu bakaka kuti Leza mpali kabaamwa kuti tabakwe ‘chilitamizyo.’
w15 9/1 15 ¶1
Ulikusola Leza Na?
Zintu zibi zili kuchitika munyika mazubaano, zitondeezya kuti bweendelezi bwabantu bulikachidwe. Mfulumende zili munyika teezyakachilwa kweeta luumuno, lukwabililo akubotelwa luzutu, pesi zili kupa kuti nyika inyonyooke. Eezi zitondeezya kuti makani ali muBbayibbele ngamasimpe aakuti: “Muntu ulaya bweenda, pele tabwene kweenzya intaamu zyakwe.” (Jeremiya 10:23) Bweendelezi bwaLeza mbubo abulikke bukonzya kweeta luumuno, kubotelwa akuti bantu bakkale kabotu, nkaambo ngimakanze aLeza.—Isaya 45:18.
Kuyanduula Lubono muJwi lyaLeza
w13 1/15 20 ¶16
Yinkilila Kunembo Kuswena Afwiifwi aJehova
16 Kulidunda akaambo kakuchita zintu zili kabotu kuli kabotu. Muchikozyano, tweelede kulidunda akwaambwa kuti tuli Bakamboni baJehova. (Jer. 9:24) Kulilemeka kupa kuti tusale kabotu alimwi kupa kuti tuzibelesye kabotu zyeelelo zyakulilemeka. Pesi kulisumpula kulakonzya kupa kuti tusiye Jehova.—Int. 138:6; Rom. 12:3.
w07 3/15 9 ¶2
Makani Aazwa Mubbuku lyaJeremiya
3:11-22; 11:10-12, 17—Nkamboonzi Jeremiya naakaswaanizya amisyobo yabwaami iili kkumi yakumusanza mukusinsima kwakwe nikuba kuti muunzi waSamariya wakali wazundwa mu 740 B.C.E.? Eezi zyakachitika nkaambo muunzi waJerusalemu niwakanyonyoonwa mu607 B.C.E. Jehova wakasubula chisi choonse chamaIsrayeli kutali chisi chaJuda luzutu. (Ezekiele 9:9, 10) Kuyungizya waawo, Bwaami bwamisyoobo iili kkumi bwakiinkilila kunembo kabuli muJerusalemu nkaambo basinsimi bakali kuswaanizya achisi chamaIsrayeli chiindi nibakali kusinsima.
March 27–April 2
LUBONO LUZWA MUJWI LYALEZA | JEREMIYA 12-16
“MaIsrayeli Akamuluba Jehova”
jr 51 ¶17
Bamba Moyo Wako Utakweeni
17 Mulimu waJeremiya wakali kuswaanizya kuswiilila malayilile aazwa kuli Leza. Kaansinga wakali Jeremiya, wakali kunooswiilila na kufumbwa malayilile ngwaakali kupegwa? Chimwi chiindi Jehova wakabuzya Jeremiya kuti ayanduule bbanti akulizwaata. Kuzwa waawo, Jehova wakamubuzya kuti ayinke kuFirate. Ikuti twalanga mumepu tulakonzya kubona kuti ooyu wakali musinzo wamakkilomita aali 500 (300 miles). Naakasika nkuko, Jeremiya wakeelede kusisa bbanti eelyo munsi abbwe mpawo abweede kuJerusalemu. Alubo Leza wakamulayilila kuti abweede akatole bbanti eelyo. (Bala Jeremiya 13:1-9) Kweenda nkwaakachita Jeremiya, wakali musinzo wamakkilomita aali 1 900 (1,200 miles). Basikukazya Bbayibbele tabazumini pe kuti Jeremiya wakeenda amawulu musinzo ooyu mulamfu kwamyeezi myiingi. (Ezara 7:9) Pesi Leza wakabuzya Jeremiya kuti achite oobo alimwi wakazichita.
jr 52 ¶18
Bamba Moyo Wako Utakweeni
18 Bona musinsimi kalikutanta zilundu zyakuJudaya alimwi kalikweenda munkanda iili afwiifwi akuFirate. Keendela kuyoosisa bbanti luzutu! Mbukunga taakaliwo pe kwamazuba miingi, kulakonzya kuti mbaakayakilene abo bakali kulibuzya kuti wakaya kuli. Naakaboola taakalikwe bbanti pe. Mpawo Leza wakamubuzya kuti abweede ayende musinzo mulamfu kuti akatole bbanti eelyo lyakazakede ‘kalitachijisi mulimu abuniini.’ Jeremiya wakali kukonzya kuyeeya kuti: ‘Eezi zichitilwanzi? Bbanti eeli talichigwasyi pe.’ Pesi taakachita oobo nkaambo wakazumizya Leza kuti amubumbe. Taakasyoloka pe, pesi wakachita mbuli mbaakalayililwa!
jr 52 ¶19-20
Bamba Moyo Wako Utakweeni
19 Jeremiya naakeenda kachibili, Leza wakamupandulwida mbuzyakali kwaamba. Kuzumina kwaJeremiya kwakamugwasya kuti akonzye kwaambilizya mulumbe uyandikana wakuti: “Aba bantu babi, bakaka kuswiilila majwi aangu, beenda muzinguni zyamyoyo yabo, baya butobela baleza bambi kuti babamanine milimo akubakomba, bayooba mbubonya mbuli mulembo oyu uutacikwe mulimo abuniini.” (Jer. 13:10) Jehova wakayiisya bantu bakwe munzila iimvwisisika. Kuswiilila kwaJeremiya nikuba kuti teekwakali kuuba, kwakagwasya mulumbe waJehova kuti ubasike amoyo bantu.—Jer. 13:11.
20 Mazubaano maKristu tababuzigwi kuti beende misinzo milamfu kuchitila kuti bayiisigwe aLeza. Pesi nzila njuponaayo ilikubagambya na bantu mbuyakilene aabo, naa ipa kuti bamwi bakulangile ansi? Zilakonzya kuswaanizya nzila njuzwataayo, lwiiyo ndusala, mulimu ngusala naa maboneno aako atala akunywa bukande. Uyookkala kuswiilila malayilile aaLeza na mbuli kwakachita Jeremiya? Kusala kwako kutondeezya kuti uzumina kubumbwa aLeza, kuyoopa kuti ube chikozyano chibotu. Ziindi zyiingi kuswiilila malayilile aamuBbayibbele naa amuzike uuchenjede alimwi uusyomekede kugwasya ndiswe. Utazumizyi moyo kuti ukweene, pesi tobelezya zyakachitwa aJeremiya. Nkinkaako, zumizya kuti Leza akubumbe kuchitila kuti ube chibelesyo chilemekwa chili amulimu mupati.
it-1 1121 ¶2
Chikungu
Jehova wakakozyanisya chisi maIsrayeli amaJuda mbuli bbanti lyaangidwe muchikungu, zyakali kutondeezya kuti wakali kubayanda akuti wakali kuyanda kuti bamukombe akuti babe zisi ziyandikana. (Jer 13:11) Businsimi bukozyanisya Jesu Kristu kalikweendelezya kaangide bululami mbuli bbanti lyaangidwe muchikungu chakwe akusyomeka mbuli bbanti lyaangilidwe mutusolo. Eezi zyaamba kuti bweendelezi bwaJesu Kristu bunooli abululami akusyomeka chiindi choonse. Mbukunga bbanti lyaangilwa kuti lisimye chimwi chintu, nkinkaako bululami buyoomusimya kuti achite mbuli Mubetesi wakasalwa aJehova.—Is 11:1, 5.
Kuyanduula Lubono muJwi lyaLeza
jr 118 ¶11
Buzuba Abuzuba Ulabuzya Na Kuti, “Uli Kuli Jehova?”
11 Jeremiya naakabona basizibi kabazwidilila wakaba amubuzyo. (Bala Jeremiya 12:1, 3) Nikuba kuti taakali kusola bululami bwaJehova, pesi musinsimi wakali kuyanda kumvisisisya atala ‘akusyoloka’ kwakwe. Nzila njaakambuulaayo yakali kutondeezya kuti wakali abweenzinyina buli kabotu aLeza mbuli kuchita mwana kuli wisi siluyando. Jeremiya taakali kumvwisisisya pe kuti nkamboonzi maJuda bakali kuchita zibi nibakali kuzwidilila. Jeremiya wakiijana na nsandulo? Jehova wakamusyomezya kuti wakali kuyoobanonkola basizibi. (Jer. 12:14) Jeremiya naakabona mbukugwasya kukomba kuli Leza, zyakamugwasya kusyoma kuti Leza uliluleme. Eezi zyakapa kuti chiindi choonse akombe kuli Leza kabuzya Wisi zyakali mumoyo wakwe.
w04 5/1 12 ¶16
Utayoowi Mbuli Kwakabede Jeremiya
Atuchenjelele Bantu Mbituliswaanizyaabo
16 Jeremiya wakaamba chimwi chintu chakamugwasya kuti akkale katayoowi. Wakati: “Teendakali kukala akati kabasikusobana, teendakali kusekelela pe, ndakali kukala endike nkaambo kajanza lyako ilyakandikede, nkaambo wakandizuzya bukali.” (Jeremiya 15:17) Jeremiya wakasala kukkala alikke kutali kuti kaliswaanizya abantu bakali kuchita zintu zibi. Aswebo mazubaano tuchita mbuli mbaakachita. Nikuba kuti twakali kuchita kabotu kwachiindi chilamfu, tulayiyeeya nchenjezyo mwaapostolo Paulo njaakapa yakuti “mweenda abamineme, anywebo mulaminama.”—1 BaKorinto 15:33.