Nkamboonzi Leza Nali Aambunga?

1. Nkamboonzi Leza ncakabunganizya banaIsrayeli ciindi?

Leza wakabunganizya luzubo lwasyanene Abrahamu mukuba cisi alimwi wakabapa milawo. Wakuuzika cisi eeci kuti “Israyeli” alimwi ncico acilike cakalaa luzibo atalaa bukombi bwakasimpe alimwi atalaa jwi lyaLeza. (Intembauzyo 147:19, 20) Nkikaako bantu bazisi zyoonse bakalikuyoogwasigwa kuzwa kubanaIsrayeli.​—Bala Matalikilo 22:18.

Leza wakasala banaIsrayeli kuti babe bakamboni bakwe. Zyakacitika kulimbabo zitondezya kuti kugwasya biyeni kuswiilila milawo yaLeza. (Deuteronomo 4:6) Akambo kaako, bamwi bakali kuyooziba Leza wakasimpe kwiinda kubanaIsrayeli.​—Bala Isaya 43:10, 12.

2. Nkamboonzi banaKristo bacoonzyo ncobabambikene?

Mukweenda kwacindi banaIsrayeli bakasweekelwaa coolwe caLeza, alimwi Jehova wakasowa cisi eeco akubikka bubambe bwambungaano yabanaKristo. (Matayo 21:43; 23:37, 38) Mazubaano banaKristo bacoonzyo bakomba kabali bakamboni baJehova kutali banaIsrayeli baciindi.​—Bala Incito 15:14, 17.

Jesu wakabamba basikumutobela kuti bakakambauke alimwi bagwasye bantu bazisi zyoonse kuti babe basikwiiya. (Matayo 10:7, 11; 24:14; 28:19, 20) Mazubaano mulimu ooyo ulikucitwa munzila igambya loko mubweende oobu bwamamanino. Aaka nkikakutalika mubuumi kuti Jehova aswaanizye antoomwe mamiliyoni abantu kuzwa kuzisi zyoonse mubukombi bwakasimpe. (Ciyubunuzyo 7:9, 10) BanaKristo bacoonzyo balibambikene ikuti basungwazyaanye akukugwasyanya. Munyika yoonse mbiizulwa balagwasigwa abubambe bomwe bweendelana bwaziiyo zijanika muBbaibbele kumiswaangano yabo.​—Bala baHebrayo 10:24, 25.

3. Mbunga yaBakamboni baJehova yakatalika biyeni?

Mumyaka yama 1870, kabunga kabasikwiiya Bbaibbele kakatalika kuyubununa masimpe amuBbaibbele akaswekeede ciindi loko. Bakalizi kuti Jesu wakali bambide mbungaano yabanaKristo kuti kikambauka, nkikaako bakatalika mulimu wakukambauka atalaa Bwami munyika yoonse. Mumwaka wa 1931 bakatalika kwiitwa kuti Bakamboni baJehova.​—Bala Incito 1:8; 2:1, 4; 5:42.

4. Bakamboni baJehova babambidwe biyeni?

Mumwaanda wamnyaka wakutanguna, imbungaano zyabanaKristo muzisi zisiyene siyene zyakalikugwasigwa kazizwa kukabunga keendelezya kakali kulemeka Jesu kuti ngonguwe Mutwe wambungaano. (Incito 16:4, 5) Mbukubede mazubaano, Bakamboni baJehova munyika yoonse balikugwasigwa kazizwa kuKabunga Keendelezya kabaalumi basimide kumuuya. Aaka kabunga keendelezya maofesi asiyene siyene aBakamboni baJehova, ooko kucitwa milimu yabupanduluzi, yakulemba alimwi yakumwayigwa kwamabbuku agwasya mukwiiya Bbaibbele mumilaka iyiinda ku600. Nkikaako Kabunga Keendelezya kalasungwazya alimwi kapa malailile kazizwa Mumagwalo kumbungaano zyiinda ku100 000 munyika yoonse. Imwi ayimwi mbungaano ilabaalumi beleela bakomba kabalibaalu na beendelezi. Baalumi aaba babikkila maanu kumbelele zyaLeza caluyando.​—Bala 1 Petro 5:2, 3.

Bakamboni baJehova balibambilidwe kukambauka makani mabotu akwiisya bantu kuti babe basikwiiya. Mbuli mbubakalikucita baapostolo, tulakambauka kun’anda an’anda. (Incito 20:20) Twiiya Bbaibbele ababo bayanda kwiiya kasimpe camoyo woonse. Pesi Bakamboni baJehova tabali mbunga yabuyo. Tulimpuli ilaNdeende siluyando. Tuli bakwesu abacizi babikilana maanu. (2 baTesalonika 1:3) Akambo kakuti bantu baJehova balibambilidwe kucita zibotezya Leza akugwasya bamwi, nkikaako nimpuli iibotelwa loko munyika.​—Bala Intembauzyo 33:12; Incito 20:35.