Aajanika Makani aaKabbuku Kamuswaangano waBuumi Amulimu Wesu
DECEMBER 3-9
LUBONO LUZWA MUJWI LYALEZA | INCITO 9-11
“Sikupenzya Uuyoosya Wakaba Kamboni Uusungweete”
bt 60 ¶1-2
Mbungano “Yakaba Aluumuno”
NKAMU yabantu banyemede yaamba kusika kuDamaskko nkubayanda kuchita chimwi chintu chibi. Nkamu eeyi iyanda kugwisya basikwiiya baJesu mumaanda aabo, ibaange, ibasampawule mpawo kumamanino ibakwelele kuJerusalemu kunkuta mpati yaSanhedrin nkubayoochibona.
2 Muzulwidi wankamu eeyi nguSawulu, ooyu lino uuzwide ganzi mumaboko aakwe. Muchiindi chifwiifwi chayinda, wali kulangilila amoyo uzumina chiindi beenzinyina nibakali kutulula Stefani amabwe kusikila wafwa. (Inc. 7:57–8:1) Sawulu taakakkutisikana pe akupenzegwa kwamaKristu bakali kukkala kuJerusalemu, nkinkaako wakaba abukali kayanda kubamana boonse. Wakali kuyanda kukamaninsya kabunga kakazibinkene azina lyakuti “Benzila eyi.”—Inc. 9:1, 2; langa kabbokesi kati, “Manguzu Ngaakalaawo Sawulu kuDamaskko,” kali aapeji 61.
w16.06 7 ¶4
Kuzumina Kubumbwa aaJehova
4 Chiindi Jehova nalanga-langa bantu talangi mbubaboneka kumeso pesi ulanga-langa moyo, chaamba mbubabede mukati. (Bala 1 Samuele 16:7b.) Eezi nzizyo zyakachitika chiindi Leza naakatalika mbungano yakusaanguna. Wakakwela bantu kulinguwe akumwanaakwe bakali kubonekaanga tabali kabotu. (Joh. 6:44) Umwi muntu wakali boobu, muFarisi uutegwa Sawulu ‘sikusampawula Leza, sikupenzya bantu bakwe asikutukila.’ (1 Tim. 1:13) Nikuba boobo, ‘Jehova uusunka naakuti uulanga-langa myoyo’ taakabona Sawulu mbuuli bulongo butagwasyi. (Tus. 17:3) Leza wakabona kuti ulakonzya kubumbwa kuti abe chilongo chiyandikana, ‘chibelesyo chisalidwe’ kupa bumboni “kulibamasi, akubami, akubana ba-Israyeli.” (Inc. 9:15) Bamwi Leza mbaakabona kuti balakonzya kuba zilongo ‘zibotu’ mbantu bakali bakolwi, basibwaamu ababbi. (Rom. 9:21; 1 Kor. 6:9-11) Chiindi nibakazumanana kwiiya kasimpe kajanika muJwi lyaLeza, bakaba aalusyomo alubo bakazumina kubumbwa aaJehova.
bt 64 ¶15
Mbungano “Yakaba Aluumuno”
15 Yeeya mbubakanyema akugamba bantu chiindi nibakabona Sawulu kasaanguna kukambawuka atala aJesu muchikombelo! Bakabuzya kuti: ‘Sena ooyu tali nguwe wakali kupenzya basyomi bamuJerusalemu bakomba kuzina eli?’ (Inc. 9:21) Sawulu naakali kupandulula chakapa kuti abe amaboneno aalikabotu atala aJesu, “wakasinizya kuti [Jesu] ngo-Kristu.” (Inc. 9:22) Kupandulula teenkuko kukonzya kupa kuti bantu basimpide miyanda muziyanza zyabo naakuti balisumpula babone kasimpe. Pesi Sawulu taakateya mulenga.
Kuyanduula Lubono muJwi lyaLeza
bt 60-61 ¶5-6
Mbungano “Yakaba Aluumuno”
5 Chiindi naakimikizya Sawulu ooyo wakali kuya kuDamaskko, Jesu taakabuzya kuti “Nkamboonzi nuli kupenzya basikwiiya bangu?” Pesi mbuuli mbutwabona, wakabuzya kuti “Undipenzezyanzi?” (Inc. 9:4) Eezi zitondeezya kuti chiindi batobeli bakwe nibapenzegwa, Jesu ulaamvwa machise.—Mt. 25:34-40, 45.
6 Kuti kuli kupenzegwa akaambo kalusyomo lwako muli Kristu, baachoonzyo chakuti Jehova aJesu balaabona mapenzi nguswaana. (Mt. 10:22, 28-31) Kupenzegwa ooko kulakonzya kutagwisigwa lino. Yeeya kuti Jesu wakalilangide chiindi Sawulu naakali kuzuminana akujayigwa kwaStefani akuti wakalilangide chiindi basikwiiya bakwe basyomeka nibakali kugwisigwa mumyuunzi yabo aSawulu. (Inc. 8:3) Nikuba boobo, Jesu taakanjilila pe muchiindi eecho. Pesi Jehova wakabelesya Kristu kuti agwasye Stefani abamwi maKristu kuti bakkale kabasyomekede.
nwtsty makani aakwiiya aajanika muli Inc 10:6
Simoni, musuki wazikumba: Musuki wazikumba wakali kusuka zikumba zyabanyama kabelesya musamu uutegwa lime kuti agwisye tunyama-nyama naakuti tufuta-futa twakanamatide aachikumba. Aamaninsya kuchita oobu, wakali kutila umwi musamu wakali kutetya chikumba kuchitila kuti akonzye kupanga zintu zyachikumba. Kusuka zikumba kuyanda maanzi miingi nkaambo zikumba zilanunka. Kweelede kuti eezi nzizyo zyakapa kuti Simoni akkale kumbali aalwizi, busena buyeyeelwa kuti bwakali kumamanino aachisi chaJopa. Kweendelana aMulawu waMusa, kufumbwa muntu wakali kujata munyama uufwide wakali kusofwaala. (Lev 5:2; 11:39) Nkinkaako, maJuda biingi bakali kubalangilaansi basikusuka zikumba alubo teebakali kuyanda pe kukkala ambabo. Mukuya kwachiindi, bbuku lyamilawu yamaJuda litegwa Talmud, lyakaamba kuti sikubweza mafumba ulamwiinda sikusuka zikumba. Pesi Petro taakazumina kuti kusaluula kupe kuti asesemwe kukkala aSimoni. Maboneno ngaakalaawo Petro akazoomugwasya kuti atambule mulimu ngwaakazoopegwa wakuswaya muntu wakali wamasi. Bamwi basikulanga-langa makani aamuBbayibbele bayeeya kuti bbala lychiGrikki liti byr·seusʹ lyakasandululwa kuti “musuki wazikumba” lyakali mutupo waSimoni.
DECEMBER 10-16
LUBONO LUZWA MUJWI LYALEZA | INCITO 12-14
“Bbarnabba aPawulu Bakakambawuka Kumasena Aakali Kule”
bt 86 ¶4
“Bakazyula Kubotelwa a-Muuya Uusalala”
4 Nkamboonzi muuya uusalala niwakalayilila kuti Bbarnabba aSila basalwe kuti bachite ‘mulimu’? (Inc. 13:2) Bbayibbele talyaambi. Pesi nzituzi nzyakuti muuya uusalala nguwo wakasala baalumi aaba. Taakwe bumboni butondeezya kuti basinsimi abayiisi bakuAntiyokkeya bakavoota chiindi nibakali kusala baalumi aaba. Pesi bakazuminana akusalwa kwabo. Ubonaanga Bbarnabba aSawulu bakamvwa biyeni chiindi bakombinyina ‘nibakaliimya kulya akukomba, akubabikka maanza akubatuma’? (Inc. 13:3) Andiswe mazubaano, tweelede kubelekelaamwi abaabo bapegwa milimu mumbungano kuswaanizya abalangizi bambungano. Kwiinda kuti tubachitile bbivwe bakwesu bajana zilongezyo, tweelede ‘kubalemekesya loko chaluyando akaambo kamilimu yabo.’—1 Tes. 5:13.
bt 95 ¶5
‘Kwaambuula Chabusichamba Munguzu zyaJehova’
5 Kumasaangunino, Pawulu aBbarnabba bakiimikila ku-Ikkoniyu dolopo pati lyaGalatiya, busena bwakali kweendelezegwa amaRoma bwakali kukkala maGrikki. Mudolopo eeli, kwakali kukkala bantu biingi bakali maJuda abamwi maKristu bakatali maJuda. Kweendelana ambubakali kuchita lubbe, Pawulu aBbarnabba bakanjila muchikombelo akutalika kuyiisya. (Inc. 13:5, 14) “Kukukambauka kwabo banji ba-Juda aba-Helene [naakuti amaGrikki] bakasyoma.”—Inc. 14:1.
w14 9/15 13 ¶4-5
Syomeka Mukubelekela Leza Nikuba Kuli ‘Mumapenzi Miingi’
4 Pawulu aBbarnabba nibakamana kuswaya Derbe bakabweeda “ku-Lustro, aku-Ikoniyo, aku-Antiokeya. Bali kuya buyumya myoyo yabasikwiiya akubalaya kuti bajatisye kulusyomo bati, kumapenzi manjimanji inga tulanjila mu-Bwami bwa-Leza.” (Inc. 14:21, 22) Majwi aaya aboneka kayoosya nkaambo kwaamba kuti tuyooswaana ‘mapenzi miingi’ takusungwaazyi pe pesi kupa kuti bantu bamane manguzu. Nkinkaako, Pawulu aBbarnabba ‘bakayiyumya’ biyeni “myoyo yabasikwiiya” kwiinda mukubabuzya kuti bakali kuyooswaana mapenzi?
5 Nsandulo yamubuzyo ooyu tulakonzya kwiijana kwiinda mukulangisisya majwi aaPawulu. Pawulu taakaamba kuti: “Tweelede kulisimya kumapenzi miingi.” Pesi wakaamba kuti: “Kumapenzi manjimanji inga tulanjila mu-Bwami bwa-Leza.” Nkinkaako, Pawulu wakasimya basikwiiya kwiinda mukubabuzya bubotu buboola akaambo kakusyomeka. Chisyomezyo eecho chakali chachoonzyo kutali ziloto. Mukuyungizya, Jesu wakaamba kuti: “Oyo uukakatila kusikila kumamanino uyoofutuka.”—Mt. 10:22.
Kuyanduula Lubono muJwi lyaLeza
w08 5/15 32 ¶7
Makani Aazwa Mubbuku lyaIncito
12:21-23; 14:14-18. Herodi wakazumina kupegwa bulemu bweelede kupegwa Leza alikke. Eezi zilisiyene azyakachitwa aPawulu aBbarnabba bakatazumina kupegwa bulemu. Andiswe tatweelede kuyanda kuti tulemekwe akaambo kazintu zibotu nzituchita mumulimu waJehova.
nwtsty makani aakwiiya aajanika muli Inc 13:9
Sawulu, ooyo alimwi uutegwa Pawulu: Kuzwa muchiindi eechi, Sawulu wakasaanguna kwiitwa kuti Pawulu. Mwaapostolo Pawulu wakazyalwa kali muHebbrayo alubo wakali muRoma. (Inc 22:27, 28; Flp 3:5) Kuyeeyelwa kuti kuzwa kachili muniini, wakali azina lyachiHebbrayo liti Sawulu alyachiRoma liti Pawulu. Muchiindi eecho, maJuda bakatali kukkala muIsrayeli bakali kukonzya kuba amazina aabili. (Inc 12:12; 13:1) Zimwi zibbululu zyaPawulu zyakali amazina aachiRoma aachiGrikki. (Rom 16:7, 21) Mbukunga Pawulu wakali “mwaapostolo kuli bamasi,” wakeelede kuzibisya makani mabotu kubantu bakatali maJuda. (Rom 11:13) Kulakonzeka kuti wakasala kubelesya zina lyachiRoma nkaambo eezi zyakali kuyoopa kuti atambulike kubantu bakatali maJuda. (Inc 9:15; Gal 2:7, 8) Bamwi bayeeya kuti wakasala kubelesya zina lyakuti Pawulu kuti alemeke Sergiyo Pawulu pesi kubonekaanga teembubo pe nkaambo Pawulu wakiinkilila kunembo kalibelesya zina eeli nikuba naakabweeda kuKkupro. Bamwi bayeeya kuti Pawulu wakaleka kubelesya zina lyakwe lyachiHebbrayo nkaambo mbulyiitwa muchiGrikki lilakonzya kwaamba muntu (naakuti munyama) ulisumpula nayoobweenda.—Langa makani aakwiiya aajanika muli Inc 7:58.
Pawulu: Bbala lyakuti Pauʹlos lizwa mubbala lyachiLatin liti Paulus, lyaamba zintu “Ziche naakuti Ziniini,” alubo bbala eeli lyakabelesegwa kwaziindi zili 157 muMagwalo aachiKristu aachiGrikki alubo lyakabelesegwa kwachiindi chomwe kumweendelezi wakuKkupro Sergiyo Pawulu.—Inc 13:7.
DECEMBER 17-23
LUBONO LUZWA MUJWI LYALEZA | INCITO 15-16
“Kusala Kweendelana aJwi lyaLeza”
bt 102-103 ¶8
‘Bakakazyania’
8 Lukka wakiinkilila kunembo kati: “Nkabela ba-Paulo a-Barnaba nobakakazyanisya akubuzyanya abo [bamwi baalumi], kwakaambwa [naakuti baalu bakaamba] kuti Paulo a-Barnaba abamwi babo bainke ku-Jerusalemu kubaapostolo akubapati, bakabuzye makani ayo.” (Inc. 15:2) ‘Kukazyania akubuzyania’ ooku kwakatondeezya kuti tubunga ootu tubili twakali kwaasyoma makani ngitwakali kwaamba alubo mbungano yakuAntiyokkeya yakakachilwa kwiibambulula nkani eeyi. Kuti kube luumuno akujatana, mbungano yakasala kuti nkani eeyo itolwe “ku-Jerusalemu kubaapostolo akubapati” bakali bamukabunga keendelezya. Zyakachitwa abaalu bakuAntiyokkeya zituyiisyaanzi?
w12 1/15 5 ¶6-7
MaKristu Bakasimpe Balemeka Jwi lyaLeza
6 Lugwalo lwakabelesegwa nikwakali kubambululwa nkani eeyi ndulwa Amosi 9:11, 12. Majwi aajanika muli Incito 15:16, 17 akazubululwa mulugwalo oolu luti: “Njoobusya itente lyambungano lya-Davida limwaikide, akuyakulula mazwazwa aalyo. Njoobusya matongo aakwe akwaayakulula, abe mbuli kuciindi cakalekale, kuti bavube abo basyeede. . . azisi zyoonse izina lyangu mpolyaambwa, mbwaamba Jehova.”
7 Pesi bamwi balakonzya kwaamba kuti lugwalo oolu talwaambi kuti bantu bazisi teebakeelede kupalulwa pe. Nisimpe, pesi maKristu bachiJuda bakazimvwisisisya zyakali kwaambwa. MaKristu bachiJuda bakali kubona bantu bazimwi zisi bakapalulwa mbuuli bakombinyina kutali mbuuli kuti mbantu ‘bazisi.’ (Kul. 12:48, 49) Muchikozyano, muSeptuagint yaBagster lugwalo lwa Esita 8:17 luti: “Bantu biingi Bazisi bakapalulwa alubo bakaba maJuda.” Nkinkaako Magwalo naakaambuula kuti basyeede bamung’anda yaIsrayeli (chaamba maJuda abantu bazisi bakapalulwa) kuswaanizya “azisi zyoonse” (chaamba bamasi batapalwidwe) bakali kuyooba bantu bayitwa azina lyaLeza, bakazimvwisisisya zyakali kwaambwa. Bantu bakatali maJuda teebakeelede kupalulwa kuti babe maKristu.
bt 123 ¶18
‘Kusimya Mbungano’
18 Pawulu aTimotewo bakabelekaamwi kwaminyaka myiingi. Mbukunga bakali balangizi beendeenda bakali kuswaya mbungano, bakachita milimu iisiyene-siyene kabiiminina kabunga keendelezya. Bbayibbele lyaamba kuti: “Nobakali kuya bwiinda muminzi, bali kubapa milao iyakaambwa baapostolo abapati bamu-Jerusalemu, kuti biicite.” (Inc. 16:4) Zilaantanganana kuti mbungano zyakaatobelezya malayilile akazwa kubaapostolo abapati bamuJerusalemu. Akaambo kakuswiilila, “imbungano zyakayumizigwa kulusyomo, akuvuzigwa mazuba oonse.”—Inc. 16:5.
Kuyanduula Lubono muJwi lyaLeza
w12 1/15 10 ¶8
Atwiiye Kulindila Kuzwa Kubaapostolo baJesu
8 Nkani eeyi ituyiisyaanzi? Muuya uusalala waLeza wakagwasya Pawulu kali wanyampuka akuya kuAsiya. Kuzwa waawo, Jesu wakagwasya Pawulu kali waba afwiifwi akuBbituniya. Alubo Jesu wakabuzya Pawulu kuti ayinke kuMakkedoniya kali wasika kuTrowa. Mbukunga Jesu Mutwe wambungano, ulakonzya kubelesya nzila iikozyenie ayeeyi kuti atugwasye. (Kol. 1:18) Muchikozyano, amwi ulikuyeeya kupayona naakuti kulongela kubusena buyanda basikugwasilizya. Jesu uyookugwasya kabelesya muuya uusalala kuti kuli wachita zintu zitondeezya kuti uyanda kuzuzikizya zintu nzulikupeekezya. Muchikozyano: Dilayiva ulakonzya kukkonisya moota yakwe kuti iyinke kufumbwa nkwayanda kuti kiiyenda kutali kuti kiiyimvwi. Mbukubede, Jesu ulakonzya kutugwasya kuti tuchite zyiingi mumulimu wakukambawuka kuti katuchita zintu zitondeezya kuti tuyanda kuzuzikizya zintu nzitupeekezya.
nwtsty makani aakwiiya aajanika muli Inc 16:37
tuli banaRoma: Pawulu wakali muRoma alubo kuyeeyelwa kuti Sila alakwe wakali muRoma. Mulawu wamaRoma wakali kuzumizya kuti maRoma babetekwe kabotu alubo teebakeelede kupanichwa kunembo lyabantu kabatanabetekwa. MuRoma wakali azyeelelo zyakatali kujanwa abamwi bantu nzyaakali kukonzya kubelesya kufumbwa kumasena aakali kweendelezegwa amaRoma. MuRoma wakeelede kuswiilila milawu yakuRoma kutali yachisi nkwaakali kukkala. Kuti wachita mulandu, wakali kuzumina kubetekwa ankuta yakubusena nkwaakali kukkala pesi kuti kayanda wakali kukonzya kutola nkani yakwe kunkuta yamaRoma. Kuti watongelwa lufu, wakali kukonzya kutola nkani yakwe kumweendelezi mupati. Mwaapostolo Pawulu wakakambawuka mumasena miingi aakali kweendelezegwa amaRoma. Mwaapostolo Pawulu wakabelesya kuba muRoma kwaziindi zitatu zilembedwe muBbayibbele. Chakusaanguna, wakazichita kuFilipi chiindi naakabuzya bapati bamfulumende yakuFilipi kuti bakali batyola mulawu kwiinda mukumuuma.—Kuti ubone zimwi ziindi naakachita oobu, langa makani aakwiiya aajanika muli Inc 22:25; 25:11.
DECEMBER 24-30
LUBONO LUZWA MUJWI LYALEZA | INCITO 17-18
“Tobelezya Mwaapostolo Pawulu Mukukambawuka Amukuyiisya”
nwtsty makani aakwiiya aajanika muli Inc 17:2, 3
Kubasalazyila: Pawulu taakababuzya makani mabotu luzutu. Pesi wakabapandulwida akubatondeezya bumboni buzwa muMagwalo, kwaamba Magwalo aachiHebbrayo aakazulwidwa amuuya uusalala. Taakabala luzutu Magwalo pesi wakabasalazizya naakuti kubonesyania ambabo kali kuchincha zyiimo zyakwe kuti zyeendelane abaswiilizi. Bbala lyachiGrikki liti di·a·leʹgo·mai lyaamba “kwaambuuzyania naakuti kuyooma.” Alubo lipa muzeezo wakwaambuula kulikupa bamwi mweenya wakuti baambe nzibayeeya. MuchiGrikki bbala eeli lyakabelesegwa muli Inc 17:17; 18:4, 19; 19:8, 9; 20:7, 9.
kapandulula akutondeezya kwiinda muzilembedwe: Majwi aaya muchiGrikki aamba “kubikka kumbali.” Majwi aaya alakonzya kwaamba kuti Pawulu wakali kukozyanisya businsimi buli atala aMesiya bwakali kujanika muMagwalo aachiHebbrayo azintu zyakachitika mubuumi bwaJesu, katondeezya kuti businsimi oobu bwakazuzikizigwa biyeni kuli Jesu.
nwtsty makani aakwiiya aajanika muli Inc 17:17
kumusika: Musika wakuAtene (muchiGrikki a·go·raʹ) wakali kunyika nkwiili kububbila alubo wakali abupati bwama-ekka aali 12 naakuti kwiindaawo. Kumusika ooyu kwakali kuchitwa zyiingi kutali kuula akuuzya luzutu. Busena oobu nkuko bantu nkubakali kuswaanana kuti baambuule atala azyabbizinesi, zyatwaambo twanyika azyabukkale bwabantu. Bantu bakuAtene bakali kuswaanana aabusena oobu kuti baambuule atala amakani azyalwiiyo.
nwtsty makani aakwiiya aajanika muli Inc 17:22, 23
Kuli Leza Uutazibidwe: Mabala aachiGrikki aakuti A·gnoʹstoi the·oiʹ akalembedwe aachipayililo chakali kuAtene. Bantu bakuAtene bakali kutondeezya kuyoowa baleza kwiinda mukubayakila matempele aazipayililo alubo kwakali zipayililo zyabaleza batazibinkene mbuuli baleza baMpuwo, Bakulibombya, Bamanguzu, Bakukombelezya aBaluzyalo. Bakayaka chimwi chipayililo akuchipeda “kuli Leza Uutazibidwe” nkaambo bakali kuyeeya kuti zilakonzya kutabeendela kabotu kuti baluba umwi leza. Kuyaka chipayililo eecho kwakali kutondeezya kuti kwakali umwi Leza ngubakatazi pe. Pawulu wakabelesya chipayililo eechi kuti akonzye kubakambawukila atala aLeza, Leza wakasimpe ngubakatazi pe.
Kuyanduula Lubono muJwi lyaLeza
w08 5/15 32 ¶5
Makani Aazwa Mubbuku lyaIncito
18:18—Chikonke Pawulu nchaakachita chakali chanzi? Bamwi basikulanga-langa makani aamuBbayibbele bayeeyela kuti Pawulu wakali wakonkezya kuba muNaziri. (My. 6:1-21) Nikuba boobo, Bbayibbele talyaambi kuti wakali wachita chikonke chanzi. Alubo Magwalo tatubuzyi kuti Pawulu wakachita chikonke eechi kali wasanduka naakuti katanasanduka akuti wakali kusaanguna kuchichita na naakuti wakali kuchimaninsya. Kufumbwa kuti chakali chanzi chikonke eecho, taakachita chibi chiindi naakachichita.
nwtsty makani aakwiiya aajanika muli Inc 18:21
ikuti kakuli kuyanda kwaJehova: Majwi aaya atondeezya kuti tweelede kuyeeya atala akuyanda kwaLeza nituchita anitubamba kuchita chimwi chintu. Mwaapostolo Pawulu wakali kukkala kaayeeya majwi aaya. (1Kor 4:19; 16:7; Heb 6:3) Sikwiiya Jakkobo wakasungwaazya bakombinyina kuti baambe kuti: “Ikuti Jehova kayanda, tuyoopona akucita ceeci aceeci.” (Jak 4:15) Chiindi nitwaamba majwi aakuti, “ikuti kakuli kuyanda kwa Jehova,” tweelede kweezya kuchita kweendelana anzyayanda Jehova kutali kuti zimanine kumulomo. Nikuba kuti chimwi chiindi majwi aaya alakonzya kwaambwa zimvwika pesi chiindi chiingi alakonzya kwaambwidwa mumoyo. Langa makani aakwiiya aajanika muli Inc 21:14; 1Kor 4:19; Jak 4:15 aMakani Aakuyungizya C.
DECEMBER 31–JANUARY 6
LUBONO LUZWA MUJWI LYALEZA | INCITO 19-20
“Kamulibikkila Maano Nobeni Alimwi Abutanga Boonse”
w11 6/15 20-21 ¶5
“Amwembele Butanga bwa-Leza Buli Akati Kanu”
5 Mwaapostolo Petro wakalemba kuti baalu bakeelede ‘kweembela butanga bwaLeza buli akati kabo.’ Baalu bakeelede kuziba kuti butanga mbubwaJehova aJesu Kristu. Baalu bakali kuyoolyaambilila atala ambubeembela mbelele zyaLeza. Atuteedi mweenzinyokwe wakukumbila kuti umusyaalile aabana, teewali kunoobalangania kabotu akubasanina na? Kuti umwi wachiswa, teewalikunoomutola kuchibbadela na kuti akasilikwe? Munzila iikozyenie, baalu bambungano beelede ‘kweembela mbungano yaLeza, eeyo njaakawula abulowa bwaMwanaakwe mwini.’ (Inc. 20:28, NW) Baalu beelede kuziba kuti mbelele imwi ayimwi yakawulwa aaganzi lyaJesu liyandikana. Baalu bali aamulimu wakusanina, wakukwabilila awakulangania butanga.
w13 1/15 31 ¶15
Baalu bachiKristu ‘Balatugwasya Kuti Tubotelwe’
15 Kuba mweembezi kuyanda kubeleka changuzu. Chimwi chiindi baalu tabalali pe kabali kukataazikana atala abutanga bwaLeza naakuti kuyeeya mbubakonzya kugwasya bakombinyina mumakani aabukombi. (2Kor. 11:27, 28) Pesi baalu bachita mulimu ooyu amoyo woonse kabali kubotelwa mbuuli mbaakachita Pawulu. Wakalembela mbungano yakuKkorinto kuti: “Mebo cilandibotezya kusowa zintu zyangu zyoonse akulisowa ndemwini nkaambo kamyuuya yanu.” (2Kor. 12:15) Chaluyando, Pawulu wakalipeda amoyo woonse kuti asimye bakombinyina. (Bala 2 BaKorinto 2:4; Flp. 2:17; 1 Tes. 2:8) Eezi nzizyo zyakapa kuti bakombinyina bamuyande Pawulu.—Inc. 20:31-38, NW.
bt 172 ¶20
“Ndasalala Kubulowa Bwabantu Boonse”
20 Nzila Pawulu njaakali kubujaataayo butanga yakali siyene anzila njibakali kuyoobujataayo bamwi muchiindi chili kunembo. Pawulu wakali kubeleka kuti ajane ziyandikana mubuumi kuchitila kuti atamizyi mbungano. Taakali kulangilila kubbadalwa akaambo kakugwasya mbungano nkwaakali kuchita. Pawulu wakasungwaazya baalu bambungano yakuEfesu kuti babe amuuya wakulipeda. Wakati: “Mweelede kubagwasya aabo batajisi nguzu,” mpawo wakayungizya kuti, “alimwi lyoonse mweelede kuyeeya majwi aa Mwami Jesu, eelyo lwakwe mwini naakaamba kuti: ‘Kupa kulakkomanisya kapati kwiinda kupegwa.’”—Inc. 20:35, NW.
Kuyanduula Lubono muJwi lyaLeza
bt 161 ¶11
‘Kukomena Akuzunda’ Nikuba Kakuli Kukazigwa
11 Kulakonzeka kuti Pawulu wakali kwaambuula abantu mung’anda eeyo yachikolo buzuba abuzuba kuzwa kuma 11:00 kuseeni kusikila kuma4:00 goko. (Inc 19:9) Aachiindi eecho, kulakonzeka kuti zuba mpawo mpulyakali kupya loko alubo biingi bakali kwiimikila kubeleka kuti balye akuti balyookezye. Kuti kakuli kuti Pawulu wakatobelezya pulogilamu iili boobu kwaminyaka iibili, kweelede kuti wakabeleka ma-awa aayinda ku3 000 kali kuyiisya. Eezi nzizyo zyakapa kuti Jwi lyaJehova lizumanane kukomena akuzunda. Pawulu wakali musungu alubo wakali kuchincha-chincha zyiimo zyakwe. Wakachincha pulogilamu yakwe kuchitila kuti akonzye kukambawukila bantu bakkala kubusena oobu. Eezi zyakagwasya biyeni? “Boonse abakakede mu-Asiya bakamvwa makani aa-Mwami, ba-Juda aba-Helene” naakuti maGrikki. (Inc. 19:10) Pawulu wakakambawuka chabusungu!
bt 162-163 ¶15
‘Kukomena Akuzunda’ Nikuba Kakuli Kukazigwa
15 Kufwisigwa bweeme kwabana baSikeva, kwakapa kuti bantu biingi bayoowe Leza, babe aalusyomo akuti baleke kuchita zintu zyachidimoni. Bantu bakuEfesu bakabbide loko muzintu zyachidimoni. Bakali kuyandisya kubelesya zitumwa, misamu yakulikwabilila yamasalamusi akupiila kababelesya mabbuku. Nikuba boobo, bantu bakuEfesu bakabungania mabbuku ngibakali kubelesya kuchita masalamusi akwaatenta kunembo lyabantu nikuba kuti mabbuku aaya bakali baawula azyuulu zyamadola. Lukka wakalemba kuti: “Mbombubo obo makani aa-Mwami mbwaakakomena akuzunda enguzu.” (Inc. 19:17-20) Oobu mbumboni butondeezya kuti bukombi bwakasimpe bwakazunda bukombi bwakubeja achidimoni! Bantu aaba bakali kusyomeka bakatusiila chikozyano chilikabotu mazubaano. Andiswe tupona munyika iyandisya zintu zyachidimoni. Kuti katuli azimwi zintu zilaachakuchita achidimoni, tweelede kuzisowa mbuuli mbubakachita bantu bakuEfesu! Tweelede kubeleka changuzu kuti tutantamuke michito iisesemya.