Aajanika Makani aaKabbuku Kamuswaangano waBuumi Amulimu Wesu
NOVEMBER 5-11
LUBONO LUZWA MUJWI LYALEZA | JOHANE 20-21
“Sena Ulandiyandisya Kwiinda Aba?”
nwtsty makani aakwiiya aajanika muli Joh 21:15, 17
Jesu wakati kuli Simoni Petro: Kwaambuuzyania ooku kwaJesu aPetro kwakachitika chiindi Petro kali wakaka Jesu kwaziindi zitatu. Jesu wakabuzya Petro mibuzyo iitatu kayanda kubona kuti ulamuyanda na choonzyo zyakuti “Petro wakausa.” (Joh 21:17) Mulugwalo lwa Joh 21:15-17, kwakabelesegwa mabala aabili aachiGrikki liti a·ga·paʹo lyakasandululwa kuti ulandiyanda aliti phi·leʹo lyakasandululwa kuti ndilakuyanda kapati. Jesu wakabuzya Petro kwaziindi zibili kuti: “Sena ulandiyanda?” Kwaziindi zibili, Petro wakasandula kazizwa aansi amoyo katondeezya kuti wakali ‘kumuyanda kapati’. Kumamanino Jesu wakabuzya kuti: “Sena ulandiyanda kapati?” Alubo kuchiindi eechi Petro wakaamba kuti wakali kumuyanda loko. Chiindi choonse Petro naakali kusandula, Jesu wakabuzya Petro kuti wakeelede kutondeezya luyando oolu kwiinda mukusanina naakuti ‘kweembela’ basikwiiya baJesu, mulugwalo oolu baambidwe kuti ntwana twambelele naakuti “tubelele.” (Joh 21:16, 17; 1Pet 5:1-3) Kwaziindi zitatu, Jesu wakapa Petro mweenya wakuti atondeezye kuti ulamuyanda mpawo wakamupa mulimu wakuti ayembele mbelele zyakwe. Nzyaakachita Jesu zyakatondeezya Petro kuti wakali wamulekelela nikuba kuti wakamukaka kwaziindi zitatu.
sena ulandiyanda kwiinda zyeezyi?: Majwi aakuti ‘kwiinda zeezi’ alakonzya kwaamba zintu zyiingi. Bamwi basikulanga-langa makani aamuBbayibbele baamba kuti majwi aaya ayelede kwaamba kuti “ulandiyanda na kwiinda mbuyanda bamwi basikwiiya?” naakuti “ulandiyanda na kwiinda mbubandiyanda bamwi basikwiiya?” Nikuba boobo, majwi aaya alakonzya kwaamba kuti “ulandiyanda na kwiinda zintu eezi?” Zintu eezi zyaamba nswi nzibakali bajata naakuti zintu zilaachakuchita abbizinesi yakuteya baswi. Nkinkaako, muzeezo wavesi eeyi ngwakuti ‘ulandiyanda na kwiinda zintu zyakumubili? Kuti kundiyanda choonzyo sanina tubelele twangu.’ Mubuzyo ooyu uleelela kuti twayeeya zyakachitikila Petro. Nikuba kuti Petro wakali umwi wabasikwiiya baJesu bakusaanguna, taakafwambaana kulipeda kutobela Jesu kwachiindi choonse. (Joh 1:35-42) Pesi wakabweeda kubbizinesi yakwe yakuteya baswi. Nikwakiinda chiindi, Jesu wakiita Petro kuti asiye bbizinesi yakwe mpati akuti abe ‘muzubi wabantu.’ (Mt 4:18-20; Lk 5:1-11) Chiindi Jesu naakafwa, Petro wakabweeda lubo kukuteya baswi alubo bamwi baapostolo bakamutobela. (Joh 21:2, 3) Nkinkaako, chiindi Jesu naakali kumubuzya mibuzyo eeyi, wakali kuyanda kuti ayeeyesesye kuchitila kuti abone kuti uyandisya mulimu ngwaakali kuchita na, wakali kwiimininwa adwi lyabaswi lyakali kunembo lyabo naakuti ubikka mulimu wakusanina tubelele naakuti batobeli baJesu mubusena bwakusaanguna.—Joh 21:4-8.
Ciindi catatu: Nikuba kuti Petro wakakaka Mwaami wakwe kwaziindi zitatu pesi Jesu wakamupa mweenya kwaziindi zitatu kuti atondeezye kuti wakali kumuyanda na chachoonzyo. Petro naakazumina kuti ulamuyanda, Jesu wakamubuzya kuti wakeelede kutondeezya luyando oolo kwiinda mukubikka mulimu waLeza mubusena bwakusaanguna mubuumi bwakwe. Petro antoomwe abamwi baalumi beelela, bakali kuyoosanina, kusimya akweembela basikutobela baKristu basyomeka. Bantu aabo bakali maKristu bananikidwe pesi bakali kuyanda kusaninwa mubukombi.—Lk 22:32.
Kuyanduula Lubono muJwi lyaLeza
nwtsty makani aakwiiya aajanika muli Joh 20:17
Koleka kundijatilila: Bbala lyachiGrikki liti haʹpto·mai lilakozya kusandululwa kuti “kujata” naakuti “kunamatila, kujatilila.” Bamwi basanduluzi bakasandulula majwi aaJesu kuti: “Utandijati.” Nikuba boobo, Jesu taakali kwaamba kuti Mariya Magadalene atamujati nkaambo bamwi banakazi ‘bakamujata kumawulu’ naakabusigwa. (Mt 28:9) Kubonekaanga Mariya Magadalene wakali kubonaanga Jesu wakali kuyanda kuya kujulu. Akaambo kakuti Mariya wakali kuyanda kukkala aMwaami wakwe, wakamujatilila kuchitila kuti atamusiyi. Kuti atondeezye Mariya kuti taakali kuyanda kweenda, Jesu wakamubuzya kuti atamujatilili pesi wakeelede kuyoobuzya basikwiiya bakwe kuti wakali wabusigwa.
nwtsty makani aakwiiya aajanika muli Joh 20:28
O Mwami wangu, O Leza wangu!: Bamwi basikulanga-langa makani aamuBbayibbele baamba kuti majwi aaya aakali kwaamba Leza nikuba kuti akabuzigwa Jesu. Pesi bamwi baamba kuti kweendelana achiGrikki chachiindi, majwi aaya aamba Jesu. Nikuba kuti zilakonzya kuba oobo, majwi aakuti: “O Mwami wangu, O Leza wangu,” tulakonzya kwaamvwisisisya kwiinda mukulanga-langa amwi makani aambwa aMagwalo woonse aasalala akazulwidwa amuuya uusalala. Mbukunga amwi mavesi atondeezya kuti Jesu wakali watuma umwi muntu kuti akabuzye basikwiiya bakwe kuti: ‘Ndilaunka kujulu kuli Taata alimwi aBauso, kuli Leza wangu aLeza wanu,’ taakwe kaambo katupa kusyoma kuti Tomasi wakali kwaamba kuti Jesu nguwe Leza singuzusyoonse. (Langa makani aakwiiya aajanika muli Joh 20:17.) Tomasi wakali wamumvwa Jesu kakomba kuli Wisi kati: “O Leza mwini-mwini ooli olikke”. (Joh 17:1-3) Nkinkaako, chiindi Tomasi nakiita Jesu kuti “O Leza wangu” kweelede kuti wakali kubona Jesu kuti uli mbuuli “leza” kutali kuti nguLeza singuzuzyoonse. (Langa makani aakwiiya aajanika muli Joh 1:1.) Naakuti wakabona Jesu munzila iikozyenie ambubakali kuchita babelesi baLeza bachiindi, aabo bakali kubona bangelo bakali kutumwa aaJehova mbuuli mbukulembedwe muMagwalo aachiHebbrayo. Kulakonzeka kuti Tomasi wakalaazi Magwalo akali kutondeezya kuti chiindi bamwi bantu naakuti balembi baBbayibbele bakali kwaamba kuti baambuula aaJehova Leza nikuba kuti bakali baambuula abangelo. (Kozyanisya Matl 16:7-11, 13; 18:1-5, 22-33; 32:24-30; Bab 6:11-15; 13:20-22.) Nkinkaako, kulakonzeka kuti Tomasi wakiita Jesu kuti “ O Leza wangu” nkaambo wakali kumubona mbuuli mwiiminini waLeza wakasimpe.
NOVEMBER 12-18
LUBONO LUZWA MUJWI LYALEZA | INCITO 1-3
“Mbungano yachiKristu Yakatambula Muuya Uusalala”
w86 12/1 29 ¶4-5, 7
Kupa Moyo Kuutuba
Mubuzuba niyakatalika mbungano yachiKristu mumunyaka wa33 C.E., bantu basika ku3 000 bakabbabbatizigwa alubo ‘bakalisungweete kuyanzaana, kulya antoomwe amukukomba.’ Bakazichitilaanzi eezi? Kuti ‘bazumanane kubikkila maanu kukuyiisya kwabaapostolo.’ Eezi zyakali kuyoopa kuti lusyomo lwabo lusime mbukunga bakachili bapya.—Inc 2:41, 42.
MaJuda abantu bakatali maJuda bakasika kuJerusalemu kuti bazoosekelele Pobwe lyaPentekkoste. Pesi maKristu bakachili bapya bakasala kuti bakkale kwachiindi chilamfu kuchitila kuti bayiye zyiingi zyakali kuyoosimya lusyomo lwabo. Eezi zyakapa kuti kube penzi lyachakulya aakukkala. Bamwi beenzu bakali aazintu ziche pesi bamwi bakali aazyiingi. Nkinkaako, kwakali mabambe aakuti bakali aazintu zyiingi bape aabo bakali aaziche.—Inc 2:43-47.
Kuuzya lubono ndwaakalaalo muntu akupa bamwi zyakali zyakuliyandila. Taakwe muntu wakali kusungilizigwa kuti awuzye zintu nzyaakalaazyo alubo mabambe aaya taakali kusumpula kufwaba pe. Eezi tazyaambi kuti bantu bakanotede bakasyaala kabafwaba pe akaambo kakuti bakawuzya zintu zyoonse nzibakalaazyo. Pesi kweetelela bakombinyina kwakapa kuti bawuzye zintu nzibakalaazyo kuchitila kuti mulimu waBwaami uyinkilile kunembo.—Kozyanisya 2 BaKorinto 8:12-15.
Kuyanduula Lubono muJwi lyaLeza
it-2 61 ¶1
Jesu Kristu
“Mwami wabuumi.” Chiindi Jesu naakapa buumi bwakwe bumaninide wakatondeezya luzyalo Wisi ndwalaalo kulindiswe. Eezi zyakajula mweenya wakuti batobeli baKristu bakasalwa bakeendelezye kujulu akuti mabambe aakupona aanyika akazuzikizigwe muBwaami bwakwe. (Mt 6:10; Joh 3:16; Ef 1:7; Heb 2:5; langa RANSOM) Eezi zyakapa kuti abe “Mwami wabuumi” kubantu boonse. (Inc 3:15) Bbala lyachiGrikki lyakabelesegwa mulugwalo oolu, chiindi chiingi lyaamba “muzulwidi mupati,” alubo mabala aaya aleendelana abbala lyakabelesegwa kuli Musa (Inc 7:27, 35) lyakuti “mweendelezi” wamaIsrayeli.
cl 265 ¶14
Leza ‘Uufwambaana Kulekelela’
14 Nzila Jehova njalekelelaayo ilatondeezegwa muli Incito 3:19 yaamba kuti: “Aboobo, amweempwe akusanduka kutegwa zibi zyanu zimwaigwe.” Bbala lyakuti “zimwaigwe” lilakonzya kwaamba kuti “kuchumuna, . . . kuzima naakuti kunyonyoona.” Bamwi basikulanga-langa makani aamuBbayibbele bati bbala eeli lilakonzya kwaamba kuzima zintu zilembedwe. Eezi zyakali kuchitwa biyeni? Ink yakali kubelesegwa chiindi, yakapangidwe aacarbon, gum amaanzi. Kuti muntu wamaninsya kulemba wakali kukonzya kuzima nzyaalemba kabelesya chilembo chitete. Chikozyano eechi chitondeezya nzila njatulekelelaayo Jehova. Chiindi natulekelela kuli mbuuli kuti uzima zibi zyesu kabelesya chilembo chitete.
NOVEMBER 19-25
LUBONO LUZWA MUJWI LYALEZA | INCITO 4-5
“Bakatalika Kwaamba Makani AaLeza Chakutayoowa”
w08 9/1 15, kabbokesi
Nzibakaambuula Zyakalembwa muMagwalo Aasalala—Lwiiyo AmaKristu Bakusaanguna
Baapostolo Teebakali Kukonzya Na Kubala Akulemba?
Beendelezi abaalumi bapati bamuJerusalemu ‘nibakabona kutayoowa kwaPetro aJohane, akuziba kuti mbantu buyo batakayiya, bakagamba.’ (Inc 4:13) Nisimpe na kuti baapostolo teebakali kukonzya kubala akulemba? Kalyaambuula atala amakani aaya, bbuku litegwa The New Interpreter’s Bible lyakati: “Kulakonzeka kuti majwi aaya tawambi kuti Petro [aJohane] teebakali kukonzya kubala akulemba. Pesi atondeezya kusiyana kupati kwakaliwo muchiindi eecho aakati kabaapostolo abeendelezi.”
w08 5/15 30 ¶6
Makani Aazwa Mubbuku lyaIncito
4:13—Petro aJohane teebakali kukonzya na kubala akulemba? Bakali kukonzya. Bakategwa ‘tabayiide’ nkaambo teebakayiya kuzikolo zyabapati bazikombelo kuti babe aaluzibo lwakuyiisya.
it-1 128 ¶3
Mwaapostolo
Nzyaakali Kuchita Mumbungano yachiKristu. Lusyomo lwabaapostolo lwakasima chiindi nibakatambula muuya uusalala uuzwa kuli Leza lyaPentekkoste. Zyaandaano zili 5 zyakusaanguna zyabbuku lyaIncito, zitondeezya kuti baapostolo teebakayoowa kukambawuka makani mabotu aali atala akubusigwa kwaJesu, nikuba kuti bakali kusungwa, kuumwa akujayigwa abeendelezi. Niyakiinda Pentekkoste, maKristu bakavula nkaambo baapostolo bakali kugwasigwa amuuya uusalala. (Inc 2:41; 4:4) Bakasaanguna kukambawukila muJerusalemu mpawo bakazookambawukila kuSamariya mane kusikila munyika yoonse.—Inc 5:42; 6:7; 8:5-17, 25; 1:8.
Kuyanduula Lubono muJwi lyaLeza
it-1 514 ¶4
Mutwe wacooko
Intembauzyo 118:22 itondeezya kuti bbwe lyakakakwa abasikuyaka lyakali kuyooba “mutwe wacooko” (Heb., roʼsh pin·nahʹ). Jesu wakazubulula majwi aali mubusinsimi oobu kalikutondeezya kuti nguwe wakali “mutwe wacooko.” (Gr., ke·pha·leʹ go·niʹas, mutwe wakkona). (Mt 21:42; Mk 12:10, 11; Lk 20:17) Mbukunga bbwe lyakali kubikkwa akkona lyang’anda lyakali kuyandikana, Kristu alakwe ndibbwe liyandikana lyambungano yamaKristu bananikidwe iikozyanisigwa atempele lyakumuuya. Petro wakaamba kuti ‘bbwe’ lyaambidwe mulugwalo lwa Intembauzyo 118:22, lyakakakwa abantu pesi lyakasalwa aLeza kuti libe “mutwe wacooko,” nguKristu.—Inc 4:8-12; langa 1Pet 2:4-7.
w13 3/1 15 ¶4
Petro aAnaniya Bakabeja—Niinzi Nchitwiiya?
Ananiya amukayintu wakwe bakawuzya zimwi zintu nzibakalaazyo kuti bagwasye bantu bakazwa kubbabbatizigwa. Ananiya naakeeta mali kubaapostolo wakaamba kuti njimali njaakajana kuzintu zyoonse nzyaakawuzya. Pesi wakali kubeja. Wakasisa imwi mali kuti ayibelesye! Leza wakabuzya Petro makani aaya nkinkaako Petro wakabuzya Ananiya kuti: “Tobejede kubantu pe, wabejela Leza.” Ananiya wakawa akufwa mpawaawo. Nikwakiinda ma-awa aatatu, mukayintu wakwe wakasika. Katazi chakachitikila mulumaakwe alakwe wakabeja mpawo wakafwa.
NOVEMBER 26–DECEMBER 2
LUBONO LUZWA MUJWI LYALEZA | INCITO 6-8
“MaKristu Bamumbungano Yakusaanguna Bakaswaana Mapenzi”
bt 41 ¶17
“Tuleelede Kumvwa Leza Kwiinda Bantu”
17 Mumbungano yakachili mpya kwakabuka limwi penzi. Lyakali penzi lyanyamaanzi? Basikwiiya biingi bakabbabbatizigwa, bakaswayide kuJerusalemu bakasala kuti bakkale kwachiindi chilamfu kuchitila kuti bayiye zyiingi kabatanabweeda kulimbabo. Basikwiiya bakali kukkala muJerusalemu bakasanga mali kuti kuulwe chakulya azimwi. (Inc. 2:44-46; 4:34-37) Muchiindi eecho kwakabuka imwi nkani. Bamukabafu baambuula chiGrikki ‘teebakali kupegwa chakulya chakali kupegwa buzuba abuzuba.’ (Inc. 6:1) Pesi bamukabafu bachiHebbrayo bakali kupegwa chakulya. Penzi lyakali lyakuti bakali kusaluula bamukabafu bachiGrikki. Kusaluula nchiimwi chintu chipati cheeta kutamvwanana.
bt 42 ¶18
“Tuleelede Kumvwa Leza Kwiinda Bantu”
18 Mbukunga baapostolo bakali bamukabunga keendelezya kambungano eeyi yakali kukomena, bakabona kuti teezyakali kabotu kuti ‘baleke makani aaLeza akuti baye kukwaaba zilyo.’ (Inc. 6:2) Kuti babambulule nkani eeyi, baapostolo bakalayilila basikwiiya kuti basale baalumi bali 7 ‘bazwide muuya uusalala abusongo’ bakali kuyoobikkwa kuti bachite ‘mulimo ooyo.’ (Inc. 6:3) Kwakali kuyandikana baalumi beelela nkaambo kulakonzeka kuti mulimu ooyu wakali kuswaanizya kubelesya mali, kuula ziyandikana akulemba aansi zyoonse zyachitwa. Boonse baalumi bakasalwa bakali amazina aachiGrikki, amwi eezi zyakachitilwa kuti balimvwe kabotu bamukabafu bakatali kujatwa kabotu. Nibakakomba akulanga-langa kuti baleelela na baalumi aabo, baapostolo bakasala kuti baalumi aabo babikkwe “mumulimo oyo.”
Kuyanduula Lubono muJwi lyaLeza
bt 45 ¶2
Stefani—‘Wakazwide Luzyalo lwaLeza Anguzu’
2 Muchiindi eechi kuli chimwi chintu chigambya atala abusyu bwaStefani. Beendelezi bamulanga mpawo babona kuti busyu bwakwe buboneka “mbuli busyu bwaangelo.” (Inc. 6:15) Bangelo baambilizya mulumbe waJehova Leza nkinkaako balakaambo kabapa kuti batayoowi akuti babe aluumuno. Mbaakabede Stefani alubo beendelezi bakamuzondede bakazibona eezi. Niinzi chakapa kuti abatame?
bt 58 ¶16
Kwaambilizya ‘Makani Mabotu Atala aJesu’
16 Mazubaano maKristu bali achilongezyo chakuchita mulimu uuli mbuuli wakachitwa aaFilipi. Chimwi chiindi, balakonzya kukambawukila bantu kabatalibambilide, mbuuli chiindi nibali mulweendo. Chiindi chiingi, tazilichitikili pe kujana muntu mubombe moyo. Eezi zilachitika nkaambo Bbayibbele litondeezya antanganana kuti bangelo balagwasilizya mumulimu wakukambawuka kuchitila kuti mulumbe ooyu usike ‘kubantu bamasi oonse akumisyobo yoonse akumyaambo yoonse akumikowa yoonse.’ (Ciy. 14:6) Alubo Jesu wakaamba kakuchili chiindi kuti bangelo bakali kuyoogwasilizya mumulimu wakukambawuka. Muchikozyano chakwe chawiti amasokwe, Jesu wakati muchiindi chakutebula, chaamba mamanino, “batebuzi mbibaangelo.” Alubo wakayungizya kuti bangelo ‘bayoogwisya zintu zyoonse muBwaami bwakwe zilebya abachita ziteelede.’ (Mt. 13:37-41) Alubo bangelo bayoobungania batakeendelezye muBwaami bwakujulu mpawo bayoobungania “inkamu mpati” ‘yambelele zimwi,’ Jehova mbakwelela mumbunga yakwe.—Ciy. 7:9; Joh. 6:44, 65; 10:16.